மண்ணில் புதைந்திருந்த சோழர்கால பெருமாள் கோயில் கண்டு பிடிப்பு

உடுமலை : உடுமலையில் கண்டுபிடிக்கப்பட்டது 13ம் நூற்றாண்டை சேர்ந்த சோழர் கால பெருமாள் கோயில் என ஆய்வாளர்கள் தெரிவித்துள்ளனர்.
திருப்பூர் மாவட்டம் உடுமலை அடுத்த கல்லாபுரம் வேல்நகரில், சிவகுமார் என்பவருக்கு சொந்தமான தோட்டம் உள்ளது. இங்கு பொக்லைன் இயந்திரம் மூலம் நிலத்தை சீரமைக்கும் பணியில் ஈடுபட்டிருந்தபோது, பூமியில் புதையுண்டு கிடந்த பெரிய சுவர், கல்வெட்டு, அம்பாள் சிலை தென்பட்டது.

பழமையான கோயிலாக இருக்கலாம் என கூறப்பட்டது. இதுபற்றி விஏஓவிடம் சிவகுமார் தெரிவித்தார். ஆர்டிஓ, தாசில்தார் உள்ளிட்டோர் வந்து சம்பவ இடத்தை பார்வையிட்டனர். கல்வெட்டு ஆய்வாளர்கள் ஜெகதீசன், கொங்கு மண்டல ஆய்வு மைய அமைப்பாளர் உடுமலை ரவி ஆகியோர் ஆய்வு செய்தனர். அவர்கள் கூறியதாவது: இங்கு கண்டெடுக்கப்பட்ட கல்வெட்டு கி.பி. 13ம் நூற்றாண்டில் ஆட்சி செய்த கொங்கு சோழர்களின் இறுதி மன்னரான மூன்றாம் விக்ரக சோழனின் கல்வெட்டாகும். இக்கோயில் கரைவழி நாட்டில் இருந்து பிரிந்த ராஜ ராஜ வளநாட்டை சேர்ந்த பிரம்மதேயமான ஸ்ரீஉலகுடைய பிராட்டி சதுர்வேதி மங்கலம் என்ற ஊரில் அமைந்திருந்ததாகவும்,

விக்ரக சோழ விண்ணக பெருமாள் கோயில் என்றும் கல்வெட்டில் குறிப்பிடப்பட்டுள்ளது. எனவே, இக்கோயில் கி.பி. 13ம் நூற்றாண்டை சேர்ந்த விக்ரக சோழன் காலத்தில் கட்டப்பட்ட கோயில் என கருதலாம். பல கல்வெட்டுகள் மண்மூடிய நிலையில் உள்ளன. இவற்றை முழுமையாக ஆராய்ந்தால்தான் இவ்விடத்தின் வரலாறு வெளிப்படும்.
இவ்வாறு ஜெகதீசன், ரவி ஆகியோர் தெரிவித்தனர். தினகரன்

அடேங்கப்பா 13ம் நூற்றாண்டில் கட்டப்பட்டதா