வலுவான லோக்பால் மசோதா கொள்கை அளவில் ஏற்பு, மக்களுக்கு கிடைத்த வெற்றி - அன்னா ஹசாரே

வலுவான லோக்பால் மசோதா கொள்கை அளவில் ஏற்பு, மக்களுக்கு கிடைத்த வெற்றி - பிரதமரின் கடிதம் கிடைத்த பின் உண்ணாவிரத மேடையில் அன்னா ஹசாரே பேச்சு

வலுவான லோக்பால் மசோதாவை கொள்கை அளவில் ஏற்றுக் கொள்வதாக பாராளுமன்றத்தில் தீர்மானம் நிறைவேற்றப்பட்டது பற்றி பிரதமர் மன்மோகன்சிங் அன்னா ஹசாரேக்கு கடிதம் எழுதினார். அதை பெற்றுக்கொண்ட அவர் பின்னர் பேசுகையில், "இது மக்களுக்கு கிடைத்த வெற்றி'' என்று கூறினார்.

பிரதமர் எழுதிய கடிதம்

சமூக ஆர்வலர் அன்னா ஹசாரே தெரிவித்த 3 முக்கிய அம்சங்களுடன் வலுவான லோக்பால் மசோதாவை கொள்கை அளவில் ஏற்றுக்கொள்வதாக நேற்று பாராளுமன்றத்தின் இரு சபைகளிலும் தீர்மானம் நிறைவேற்றப்பட்டது.

இதுபற்றி பிரதமர் மன்மோகன்சிங் எழுதிய கடிதத்தை விஞ்ஞானம் மற்றும் தொழில்நுட்ப துறை மந்திரி விலாஸ்ராவ் தேஷ்முக், ராம்லீலா மைதானத்தில் உண்ணாவிரதம் இருந்து வரும் அன்னா ஹசாரேயிடம் கொடுத்தார். அன்னா ஹசாரேயின் தாய் மொழியான மராத்திய மொழியில் எழுதப்பட்டு இருந்த அந்த கடிதத்தில், அன்னா ஹசாரேயின் கோரிக்கைகள் தொடர்பாக சாதகமான நிலை எடுக்கப்பட்டு இருப்பதால் உண்ணாவிரதத்தை கைவிடுமாறு அவரை பிரதமர் கேட்டுக்கொண்டு இருந்தார்.

மக்களுக்கு கிடைத்த வெற்றி

அந்த கடிதத்தை பெற்றுக்கொண்ட அன்னா ஹசாரே பின்னர் கூட்டத்தினர் மத்தியில் பேசினார். அப்போது அவர் கூறியதாவது:-

நாம் தெரிவித்த 3 முக்கிய கோரிக்கைகளை ஏற்று வலுவான லோக்பால் மசோதாவை நிறைவேற்ற பாராளுமன்றம் ஒப்புக்கொண்டு இருக்கிறது. மிகப்பெரிய போராட்டத்தில் நாட்டு மக்களுக்கு வெற்றி கிடைத்து இருக்கிறது. இது மக்களுக்கும், இளைஞர்கள் சக்திக்கும் கிடைத்த வெற்றி ஆகும். இந்த வெற்றியை மக்கள் நாடு முழுவதும் அமைதியாக கொண்டாட வேண்டும். நமது கோரிக்கைகள் ஏற்கப்பட்டதற்காக அனைத்து எம்.பி.க்களுக்கும் எனது நன்றியை தெரிவித்துக் கொள்கிறேன்.

உண்ணாவிரதம் வாபஸ்

வலுவான லோக்பால் மசோதாவை வலியுறுத்தி நான் நடத்திய போராட்டத்திற்கு ஆதரவு தெரிவித்த அனைவருக்கும் நன்றி தெரிவித்துக் கொள்கிறேன். நாம் நமது போராட்டத்தில் பாதிதான் வெற்றி பெற்று இருக்கிறோம். இன்னும் பாதி வெற்றியை நாம் பெற வேண்டி இருக்கிறது. உங்கள் அனைவரின் அனுமதியுடன் நான் ஞாயிற்றுக்கிழமை (இன்று) காலை 10 மணிக்கு எனது உண்ணாவிரத போராட்டத்தை முடித்துக்கொள்ள இருக்கிறேன்.

இவ்வாறு அன்னாஹசாரே கூறினார்.

கொண்டாட்டம்

அன்னா ஹசாரேயின் கோரிக்கைக்கு கிடைத்த வெற்றியை ராம்லீலா மைதானத்தில் இருந்தவர்கள் மகிழ்ச்சியுடன் நடனமாடி கொண்டாடினார்கள். அப்போது தேசபக்தி பாடல்களும் பாடப்பட்டன.

முன்னதாக, தீர்மானத்தின் மீது பாராளுமன்றத்தில் விவாதம் நடைபெற்றதை, அன்னா ஹசாரே உண்ணாவிரத மேடையில் இருந்தவாறு `ஐபாட்'டில் பார்த்து ரசித்தார். ஐபாட்டில் அந்த காட்சிகளை பார்த்து அவர், "இது மிகவும் நன்றாக இருக்கிறது'' என்று கூறினார்.

தினதந்தி