எந்தமிழ் !!!

**பிஜிராமன்** · **பிஜிராமன்** Tue Aug 23, 2011 6:11 pm

First topic message reminder :

பொற்குடம் ஏந்திய அமிர்தம் எந்தமிழ்
பொதுமறை நவிழ்ந்த வள்ளுவன் எந்தமிழ்
அவனியை அளந்த கனியனும் எந்தமிழ்
கவச குண்டலங்கள் வேண்டாம் எனக்கு
கவசமாய் திகழ்ந்திடும் எந்தமிழே எனக்கு
நாவிற்கினிய நறுந்தமிழ் வாழ்க
என் மூச்சினில் கலந்த முத்தமிழ் வாழ்க

தேனீக்கள் உண்ட முதற்துளி எந்தமிழ்
ஆவின் முலைதந்த முதற்துளி எந்தமிழ்
சுனையில் ஜனித்திட்ட முதற்துளியும் எந்தமிழ்
எம்மொழி கலப்பும் வேண்டாம் எனக்கு
எந்தமிழே என்றும் போதும் எனக்கு
நாவிற்கினிய நறுந்தமிழ் வாழ்க
என் மூச்சினில் கலந்த முத்தமிழ் வாழ்க

மொழித்தாய் ஈன்ற முதற்பிள்ளை எந்தமிழ்
உலகமே வியந்திட்ட விந்தையும் எந்தமிழ்
மொழியின் மகத்துவம் கொண்டதும் எந்தமிழ்
வயதுள்ள மொழிகள் வேண்டாம் எனக்கு
வயதற்ற எந்தமிழ் போதும் எனக்கு
நாவிற்கினிய நறுந்தமிழ் வாழ்க
என் மூச்சினில் கலந்த முத்தமிழ் வாழ்க

'அ' வை முதலாய் கொண்டது எந்தமிழ்
ஆண்டவன் கிணைபுகழ் கொண்டதும் எந்தமிழ்
இனிமையை முழுதாய் பொதிந்ததும் எந்தமிழ்
தாயைக்கொன்ற பெயர் வேண்டாம் எனக்கு
மொழியல்ல தாய் எந்தமிழே எனக்கு
நாவிற்கினிய நறுந்தமிழ் வாழ்க
என் மூச்சினில் கலந்த முத்தமிழ் வாழ்க