மனைவியின் நகையை காப்பாற்ற நடுரோட்டில் கொள்ளையனுடன் கட்டிப்புரண்டு கணவன் சண்டை

spselvam · spselvam Sun Aug 14, 2011 8:36 pm

ஆவடி அடுத்த வெள்ளானூர் பிரியதர்ஷினி நகரை சேர்ந்தவர் ராதாகிருஷ்ணன் (28). ஹார்டுவேர்ஸ் கடை வைத்துள்ளார். இவரது மனைவி சரண்யா (26). இருவரும் நேற்றிரவு 8 மணிக்கு பைக்கில் ஆவடி மார்க்கெட்டுக்கு வந்து கொண்டிருந்தனர்.

சிஆர்பிஎப் ரோட்டில் லுங்கி அணிந்து பைக்கில் இருவர் வந்தனர். திடீரென, அவர்கள் ராதாகிருஷ்ணன் பைக் மீது இடித்தனர். நிலை தடுமாறி கணவனும் மனைவியும் ரோட்டில் விழுந்தனர்.

அப்போது ஒருவன், சரண்யா அணிந்திருந்த 9 சவரன் செயினை பிடித்து இழுத்தான். அதை பார்த்து ராதாகிருஷ்ணன் ஓடிவந்து தடுத்தார்.

ஆனால் மற்றொரு நபர், ராதாகிருஷ்ணனின் கையை பிடித்து இழுத்தார். இதனால் இருவரும் கட்டிப்புரண்டு சண்டையிட்டனர்.

இதற்கிடையில், சரண்யாவிடம் செயினை பறித்த நபர், பைக்கை ஸ்டார்ட் செய்தார். ராதாகிருஷ்ணனுடன் கட்டிப்புரண்டு சண்டையிட்டுக் கொண்டு இருந்த வாலிபர் எழுந்து ஓடி பைக்கில் ஏறினார்.

ராதாகிருஷ்ணன் விரட்டி சென்று பைக்கில் ஏற விடாமல் இழுத்தார். ஆனால் அவர் பிடியில் இருந்து தப்பினார். உஷாரான ராதாகிருஷ்ணன், பைக்கின் நம்பர் பிளேட்டை உடைத்து எடுத்துவிட்டார். இதுகுறித்து, ஆவடி டேங்க் பேக்டரி போலீசில் புகார் அளித்தார். இன்ஸ்பெக்டர் கங்கேஸ்வரன் வழக்குப் பதிவு செய்தார். பைக் நம்பரை வைத்து மர்ம நபர்களை தேடி வருகிறார். இந்த சம்பவம் ஆவடி பகுதியில் பரபரப்பை ஏற்படுத்தியுள்ளது.