பேராசிரியர் சிவத்தம்பி அவர்களின் மறைவு, தமிழ்கூறும் நல் உலகுக்குப் பேரிழப்பு _

இலங்கையின் மூத்த நுண்கலை ஆய்வாளராக, விமர்சகராக, கவிஞராக, சிந்தனையாளராக அறியப்பட்டவர் கார்த்திகேசு சிவத்தம்பி. இவர் நல்லாசிரியனின் இயல்புகளை எல்லாம் தன்னுள் வாங்கி பேராசிரியராகத் திகழ்ந்த ஒரு மாமனிதராவார்.

மிகச் சிறந்த நாடக எழுத்தாளராகவும், நாடக நெறியாளராகவும் விளங்கியதுடன், ஈழத்து நாடக வரலாற்றில் மிக முக்கியத்துவம் வாய்ந்த ஒருவராகவும் திகழ்ந்தார்.

டைனோசரின் எலும்பை மட்டும் வைத்துக் கொண்டு எப்படி டைனோசரை உருவாக்கினார்களோ அதே போல் கூத்தை வைத்துக் கொண்டு பழைய நாடக மரபை உருவாக்க வேண்டும் என்ற உத்வேகத்தை விதைத்தவர் பேராசிரியர் சிவத்தம்பி என, கிழக்கு பல்கலைக்கழகத்தின் முன்னாள் நுண்கலை துறை தலைவர் பேராசிரியர் சி.மௌனகுரு புகழந்து கூறியிருக்கிறார்.

இலக்கிய வரலாற்றுக் காலப்பகுப்பு பற்றிய அவரது வேறுபட்ட கருத்துக்களை தனக்குரிய பாணியில் மிகவும் தெளிவாகவும் நுட்பமாகவும் நடத்தக் கூடிய வல்லமை மிக்கவராகவும் இவர் விளங்கினார். அவரது தமிழ் அறிவின் ஆழத்தினால் அனைவரும் வியக்கும் அளவுக்கு உயர்ந்தவராக விளங்கினார். தம் மாணவ சமுதாயத்திற்கு அவர் ஆற்றிய சேவைகள் அளப்பரியவை. நல்லதோர் ஆசிரியருக்கு சிறந்த எடுத்துக்காட்டு பேராசிரியர் கார்த்திகேசு சிவத்தம்பி.

மாணவர்களுடனான கண்டிப்பில்லாத கனிவான, அன்பான வார்த்தைகள் மூலம் அவர்களைத் தன் வழிக்கு ஈர்க்கும் சக்தி படைத்தவராகவும், ஏமாற்றுபவர்களின் எதிரியாகவும், மாணவர்களுக்கு உதவி செய்வதில் பேருபகாரியாகவும் விளங்கியவர் இவர். இப்படிப்பட்ட மாமனிதனுக்கு எதிராகவும் கண்டனக் குரல்கள் எழுப்பப்படாமல் இல்லை. ஆனால் அதற்கெல்லாம் சளைத்தவர் அல்லர் பேராசிரியர்.

'என்னைப் பற்றி எழுப்பப்படும் கண்டனக் குரல்களே என் வளர்ச்சிக்கு அடிப்படையாக அமைந்தன" என இகழ்ச்சியைக் கூட புகழ்ச்சியாக ஏற்று தன் பணியை தொடர்ந்தவர் இவர்.

அவர் தன் மாணவர்களுக்குப் பாடம் நடத்தி பரீட்சைக்கு மாத்திரம் தயார்படுத்துவதைவிட, அவர்களை புத்திஜீவிகளாகவும், பரந்த அறிவுடையவர்களாகவும் உருவாக்குவதையே தன் நோக்கமாகக் கொண்டு செயல்பட்டார். ஆசிரியர்கள் என்றால், மாணவப் பரம்பரையை உருவாக்குபவர்கள,; எனவே கண்டிப்புடன் அவர்களை நடத்தினால்தான் தம் தொழிலுக்கு கௌரவம் என எண்ணியிருக்கும் ஆசிரியர்கள் மத்தியில் மாணவர்களைத் தம் பிள்ளைகளாய் ஆதரித்து, அவர்கள் மனதில் மிக உயர்ந்த இடத்தைப் பிடித்துக் கொண்டவர் பேராசிரியர்.

பேராசிரியரின் பெயரைச் சொன்னால் போதும்;, ஏனையோர் அவரிடம் பயின்ற மாணவர்களுக்கு அளிக்கும் மதிப்பும் மரியாதையும் அளப்பரியவை. அந்தளவுக்கு பேராசிரியரின் நற்பெயர் உலகம் முழுவதும் பரவியிருந்தது என்றால் மிகையாகாது.

ஆசிரியர் ஒருவர் இப்படித் தான் இருக்க வேண்டும் என்பதற்கு பேராசிரியர் ஒரு சிறந்த முன்மாதிரி;. ஒரு சிறந்த ஆசிரியனாக மட்டுமல்லாது, பெற்றோருக்குச் சிறந்த மகனாக, மாணவனாக, நண்பனாக, சமூக சேவையாளனாக, கணவராக, தந்தையாக தன் பெறுப்புக்களை நிறைவேற்றி, தான் பிறந்த கரவை மண்ணுக்கும், நாட்டுக்கும் சிறப்பு சேர்த்தவர் பேராசிரியர் சிவத்தம்பி.

உலக நாடுகள் பலவற்றுக்குத் தன் புலமை காரணமான புலம்பெயர்ந்து சென்றாலும், தன் மண்ணின் மரபுகளைவிட்டு புலம்பெயராத மண்ணின் மைந்தனாகவும் இவர் விளங்கினார்.

இத்தகைய புலமைமிக்க, பெருமைமிக்க ஒருவரை தமிழ்கூறும் நல் உலகம் இழந்து தவிக்கின்றது. இவரது மறைவு தமிழ் உலகோருக்கு ஒரு பேரிழப்பு என்பதே நிதர்சனம்.