மானும், மீனும்

மலையடிப்பட்டி கிராமத்தின் மலையோரம் மாலைப்பொழுது!

காடெங்கும் ஓடி விளையாடி உணவு தின்று, தண்ணீருக்காக அலையும் மான் கூட்டம்!

ஒவ்வொரு மானும் வெவ்வேறு திசைகளில் சுற்றி திரிய ஒரு மான் தண்ணீர் இருக்கும் இடத்தை பார்த்து விட்டது!

அது வேகமாய் துள்ளிக்குதித்து அருகே சென்று பார்த்த போது வற்றிப்போன அந்த குளத்தில் குறைந்த அளவே தண்ணீர் இருந்தது.

குறைவாக இருந்தாலும் அதை குடித்து விட வேண்டும் என்ற ஆவலில் மான் தண்ணீர் அருகே சென்றது.

அப்போது தண்ணீரில் இருந்து சத்தம் கேட்டது.

``அண்ணே... நீங்க இந்த தண்ணிய குடிக்கிறது தப்பில்ல. ஆனா இந்த குளத்துல இருக்கிற தண்ணீரை நம்பித்தான் ரொம்ப பேரு இருக்கோம். இருக்கிற இந்த தண்ணியையும் நீங்க குடிச்சிட்டா நாங்க இப்பவே இறந்திடுவோம். நீங்க நெனைச்சா இன்னும் ரெண்டு நாள்... நாங்க உயிரோட இருப்போம்! ஒருவேளை, அதுக்குள்ள மழை பெய்ததுன்னா நாங்க பிழைச்சுக்குவோம்'' என்று உயிர் பயத்தில் மீன்கள் பேசின.

கெஞ்சும் குரலில் மீன்கள் கேட்டுக்கொண்டதால் தண்ணீர் குடிக்க வந்த மான் தயங்கியது. சில நிமிட மவுனத்திற்கு பிறகு தாகத்துடன் திரும்பியது. அடுத்த சில மைல் தூரத்தில் உள்ள குளத்தில் அந்த மான் தன்னுடைய தாகம் தீர்த்துக் கொண்டது.

சில நாட்களுக்குப் பிறகு மழை பெய்து காடு செழித்திருக்க, நீர் வளம் நன்றாக பெருகியது. அப்போது அந்த குளத்தின் அருகே தண்ணீர் குடிக்க அதே மான் வந்தது.

மறுபடியும் ஒரு சத்தம், ``தண்ணீர் குடிக்காதீங்க! குளத்தில் இறங்காதீங்க''!

தண்ணீர் நிறைய இருக்கும் போது இந்த மீன் ஏன் இப்படி சொல்கிறது என்று கரையில நின்ற மானுக்கு ஒன்றும் புரியவில்லை.

``அண்ணே அன்றைக்கு உங்களால் நாங்க உயிர் பிழைத்தோம்! இன்னிக்கு உங்களுக்கு ஒரு ஆபத்துன்னா எங்களால பார்த்துகிட்டு சும்மா இருக்கமுடியாது!'' என்று சொன்ன மீனை பார்த்து மானுக்கு மீண்டும் ஆச்சரியம்!

மறுபடியும் தொடர்ந்து மீன், ``மழை நிறைய பெய்ததால் எல்லா குளமும் உடைஞ்சு ஒண்ணாச்சு!. அந்த நேரத்தில மற்ற குளத்தில இருந்த முதலைகள் இங்க வந்திருக்கு!. அதுங்க, பசிக்காக தண்ணி குடிக்க வருகின்ற மிருகங்களை காலை பிடிச்சு இழுத்து கொன்று சாப்பிடுகிறது! அந்த ஆபத்து உங்களுக்கு வேண்டாமென்று தான் தண்ணியில இறங்க வேண்டாமுன்னு சொன்னேன்'' என்று எச்சரிக்கும் குரலில் கூறியது.

மீனுக்கு நன்றி தெரிவித்த மான், உயிர் பிழைத்த மகிழ்ச்சியோடு திரும்பியது. அப்போது குளத்தில் வாயை பிளந்து நின்ற முதலை ஏமாற்றமடைந்தது.

மா.சண்முகவேல்

அருமை சிவா. ஒரு நீதிக்கதை கிடைத்தது.