அடிதடி தகராறில் கிணற்றில் விழுந்து விவசாயி சாவு: பழிக்குப்பழியாக வாலிபரை எரிக்க முயன்றதால் கலவரம்

**சிவா** · **சிவா** Wed 22 Jun 2011 - 19:47

அடிதடி தகராறில் கிணற்றில் விழுந்து விவசாயி சாவு: பழிக்குப்பழியாக வாலிபரை எரிக்க முயன்றதால் கலவரம்: போலீஸ் தடியடி-கண்ணீர் புகை வீச்சு

அடிதடி தகராறில் கிணற்றில் விழுந்து விவசாயி ஒருவர் செத்தார். இதற்கு காரணமான வாலிபரை பொதுமக்கள் எரிக்க முயன்றதை தடுத்த போலீசார் மீது கல்வீசி தாக்குதல் நடத்தப்பட்டது. இதனால் போலீசார் தடியடி நடத்தியும், கண்ணீர் புகை குண்டுகளை வீசியும் கூட்டத்தினரை கலைத்தனர்.

விவசாயி

திருவண்ணாமலை அருகே உள்ள வெறைïரை அடுத்த பெருமணம் கிராமத்தைச் சேர்ந்தவர் செல்வகுமார் (வயது 32), விவசாயி. இவர் தனது நண்பர் எழிலழகன் என்பவருடன் நேற்று முன்தினம் இரவு 8 மணி அளவில் மோட்டார் சைக்கிளில் சென்று கொண்டிருந்தார்.

அப்போது கோளப்பப்பாடி அருகே சென்றபோது தேவனூரைச் சேர்ந்த அருள் (28), குணசேகரன் (27), பரிசுத்தம் (28) ஆகியோர் வழியில் தங்களது மோட்டார் சைக்கிளை நிறுத்தி நின்று கொண்டிருந்தனர். அவர்கள் குடிபோதையில் இருந்ததாகவும் கூறப்படுகிறது.

கிணற்றில் விழுந்து சாவு

அந்த வழியாக வந்த செல்வகுமார், வழிவிடும்படி கூறியதை அடுத்து அவர்களுக்குள் வாய்த்தகராறு ஏற்பட்டது. பின்னர் இரு தரப்பினரும் ஒருவரையொருவர் தாக்கிக்கொண்டனர். இதில் செல்வக்குமாரை, அருள் மற்றும் அவரது நண்பர்கள் அடித்தபடி விரட்டியதில், அருகில் இருந்த தரை கிணற்றில் செல்வகுமார் விழுந்தார்.

பின்னர் தொடர்ந்து ஓடிய அருளும் கிணற்றில் விழுந்துவிட்டார். இதில் பலத்த காயம் அடைந்த செல்வகுமார் அதே இடத்தில் பரிதாபமாக செத்தார். இதனிடையே, எழிலழகன் தப்பிச்சென்று கிராமத்தினரிடம் தகவல் தெரிவித்தார்.

பொதுமக்கள் பிடித்து சென்றனர்

இதையடுத்து செல்வகுமாரின் உறவினர்கள் செல்வகுமாரின் உடலை மீட்டதுடன், அருளையும் பிடித்து ஊருக்கு தூக்கிச்சென்று விட்டனர். இதுபற்றி தகவல் கிடைத்ததும் போலீசார் பெருமணம் கிராமத்திற்கு சென்று பொதுமக்களிடம் சமரசம் பேசினார்கள்.

போலீசார் நடத்திய பேச்சுவார்த்தை தோல்வியில் முடிந்தது. இதனால் பொதுமக்கள் அனைவரும் தாங்கள் பிடித்து வைத்துள்ள அருளை தீவைத்து எரிக்க முயன்றனர். இதனை தடுக்கும் முயற்சியில் போலீசார் ஈடுபட்டபோது ஆத்திரமடைந்த பொதுமக்கள் போலீசார் மீது கற்களை வீசி தாக்குதல் நடத்தினர். இந்த தாக்குதலில் திருவண்ணாமலை தாலுகா போலீஸ் சப்-இன்ஸ்பெக்டர் அன்பழகன், ஆயுதப்படை போலீஸ் சப்-இன்ஸ்பெக்டர் மூர்த்தி, போலீஸ் ரமேஷ் ஆகியோர் படுகாயம் அடைந்தனர்.

தடியடி, கண்ணீர் புகை குண்டு

இதைத்தொடர்ந்து கல்வீச்சில் ஈடுபட்ட பொதுமக்களை போலீசார் தடியடி நடத்தி கலைத்தனர். கண்ணீர் புகை குண்டுகளும் வீசப்பட்டன. இதையடுத்து நள்ளிரவு 12 மணிக்கு கலவரம் கட்டுக்குள் கொண்டுவரப்பட்டது. தொடர்ந்து செல்வக்குமாரின் பிணத்தை கைப்பற்றி போலீசார் திருவண்ணாமலை அரசு ஆஸ்பத்திரிக்கு பிரேத பரிசோதனைக்காக அனுப்பிவைத்தனர்.

மேலும் பொதுமக்கள் தாக்கியதில் படுகாயம் அடைந்திருந்த அருளையும் மீட்டு ஆஸ்பத்திரிக்கு அனுப்பிவைத்தனர். அவருக்கு தீவிர சிகிச்சை அளிக்கப்பட்டு வருகிறது.

தினதந்தி