சேலம் பள்ளி மாணவன் தற்கொலை கடிதம் புது திருப்பம்

ரஞ்சித் · ரஞ்சித் Wed 22 Jun 2011 - 11:44

சேலம் : சேலத்தில் நேற்று முன்தினம் தூக்கு போட்டு தற்கொலை செய்து கொண்ட மாணவன், எழுதி வைத்த கடிதத்தின் அடிப்படையில், போலீஸார் தீவிர விசாரணை மேற் கொண்டு வருகின்றனர். சேலம் காசி முனியப்பன் கோவில் தெருவை சேர்ந்தவர் பிரேம்குமார். ஆட்டோ டிரைவராக உள்ள இவரின் மகன் சதீஷ்குமார்(19). இவன் மரவனேரியில் உள்ள பள்ளியில் ப்ளஸ் 2 படித்து வந்தான். இந்நிலையில் நேற்று முன்தினம் மாலை, வீட்டில் யாரும் இல்லாத போது, தூக்கு போட்டு தற்கொலை செய்து கொண்டான். பணியை முடித்து விட்டு வீடு திரும்பிய பிரேம்குமார், வீட்டை திறந்து பார்த்த போது மகன் தூக்கில் தொங்குவதை கண்டு அதிர்ச்சி அடைந்தார். இது குறித்து டவுன் போலீஸாருக்கு தகவல் கொடுத்தார். டவுன் போலீஸ் எஸ்.ஐ., ரமேஷ்குமார், ஏட்டு கோவிந்தராஜ் ஆகியோர் சம்பவ இடத்துக்கு வந்து பிணத்தை கைப்பற்றி பிரேத பரிசோதனைக்காக சேலம் அரசு மருத்துவமனைக்கு அனுப்பி வைத்தனர். மேலும் இது குறித்து வழக்கு பதிவு செய்து விசாரணை நடத்தி வருகின்றனர். இந்நிலையில் போலீஸார் நடத்திய விசாரணையில் மாணவன் சதீஷ்குமார், ஒழுங்காக பள்ளிக்கு செல்லாமல் இருந்துள்ளான். மேலும், பள்ளி செல்ல தந்தை கண்டித்துள்ளார். இதனால் மனமுடைந்து தூக்கு போட்டு தற்கொலை செய்து கொண்டது தெரிய வந்தது. போலீஸார் வீட்டில் மேற் கொண்ட சோதனையில் மாணவன் எழுதி வைத்த கடிதம் சிக்கியது. இந்த கடிதத்தில் என்னுடைய சாவுக்கு யாரும் காரணம் இல்லை. நான் இறந்த பின், என் உடலை பிரேத பரிசோதனை செய்ய வேண்டாம். இறந்த பின் ஒருவரின் உடலை பிரேத பரிசோதனை செய்து அந்த ஆன்மாவை துன்பப்படுத்தாதீர்கள். ஐ மிஸ் யூ ஃபிரன்ட்ஸ், என்னை மன்னித்து விடுங்கள் என்று மட்டும் எழுதப்பட்டுள்ளது. இந்த கடிதத்தை உண்மையிலேயே மாணவன் சதீஷ்தான் எழுதினாரா? அல்லது பெற்றோர் எழுதி வைத்தார்களா என்பது குறித்து, போலீஸார் விசாரணை நடத்தி வருகின்றனர்.

தின மலர்