"ஹெல்மெட்' அணிவது கட்டாயம் : வரும் 16ம் தேதி முதல் தீவிர அமல்

**krishnaamma** · **krishnaamma** Fri Jun 10, 2011 11:17 am

கோவை : ""கோவை மாநகரில் இருகர வாகன ஓட்டிகள் "ஹெல்மெட்' அணிவது, வரும் 16ம் தேதி முதல் கட்டாயமாகிறது. பின்சீட்டில் அமர்ந்திருக்கும் நபரும் ஹெல்மெட் அணிந்திருக்க வேண்டும்,'' என, போலீஸ் கமிஷனர் அமரேஷ் புஜாரி நேற்று தெரிவித்தார்.

அவர் அளித்த பேட்டி: தமிழகத்தில் லாட்டரிச் சீட்டு விற்பனை தடை செய்யப்பட்டிருக்கிறது. எனினும் தடையை மீறி பல இடங்களில் விற்கப்படுவதாக புகார் வந்துள்ளது. சம்பந்தப்பட்ட நபர்கள் கைது செய்யப்படுவார்கள். மணல் கடத்துவோர் மீது கடும் நடவடிக்கை மேற்கொள்ளப்படும். சாலை பாதுகாப்பு விதிகள் பற்றி மக்கள் மத்தியில் போதிய விழிப்புணர்வு இல்லாததால் விலை மதிக்க முடியாத மனித உயிர்கள் பலியாகின்றன. கடந்த ஆண்டில் கோவை நகரில் நடந்த வாகன விபத்துகளில் 294 பேர் பலியாகியுள்ளனர். இதில், "ஹெல்மெட்' அணியாமல் டூ வீலரில் சென்று விபத்தில் சிக்கிய பலியானவர்களின் எண்ணிக்கை மட்டுமே 173.

கோவை நகரில் விபத்துகளை குறைக்கவும், உயிர்பலியை தடுக்கவும் "ஹெல்மெட் சட்டம்' வரும் 16ம் தேதி முதல் அமல்படுத்தப்படும். வரும் 15ம் தேதி வரை வாகன ஓட்டிகளுக்கு விழிப்புணர்வு ஏற்படுத்தும் வகையில் அறிவுரை வழங்கப்பபடும். அதற்கு அடுத்த நாள் முதல் அபராதம் விதிப்பு துவங்கும். வாகனம் ஓட்டும் நபர் மட்டுமின்றி பின் சீட்டில் அமர்ந்திருப்பவரும் ஹெல்மெட் அணிந்திருக்க வேண்டும். தரமற்ற போலி "ஹெல்மெட்' விற்கப்பட்டால் பறிமுதல் செய்யப்படுவதுடன், விற்பனையாளர்களும் கைது செய்யப்படுவார்கள். ஹெல்மெட் அணியாமல் சென்று போலீசாரிடம் பல முறை அபராதம் செலுத்தும் நபர்களின் டிரைவிங் லைசென்சை ரத்து செய்ய பரிந்துரைக்கப்படும். போலீஸ் துறையில் பணியாற்றுவோர் "ஹெல்மெட்' அணியாமல் சென்று பிடிபட்டால், ஒழுங்கு நடவடிக்கை மேற்கொள்ளப்படும். கார் ஓட்டுவோர் சீட் பெல்ட் அணிவதும் கட்டாயமாக்கப்படுகிறது.

வழிப்பறி தடுக்க நடவடிக்கை: நகரில் பெண்களிடம் செயின் பறிப்பது அதிகரித்துள்ளது. இதைதடுக்க மாலை 4.30 முதல் இரவு 9.30 மணி போலீஸ் ரோந்து தீவிரப்படுத்தப்படும். பொதுமக்கள் கூடும் பஸ் ஸ்டாப், பள்ளி, கல்லூரி, மார்க்கெட் பகுதிகளில் போலீசாரின் கண்காணிப்பு அதிகரிக்கப்படும். பொதுமக்கள் பார்வையில் ரோடுகளில் இனி போலீசார் அதிகளவில் பணியாற்றுவார்கள். போக்குவரத்து சீரமைப்புக்கும் கூடுதல் முக்கியத்துவம் அளிக்கப்படும். அதிவேகத்தில் வாகனம் ஓட்டுவோர், சிக்னல்களை மதிக்காமல் செல்வோர், டூ வீலரில் மூவராக பயணிப்போர் மீது நடவடிக்கை மேற்கொள்ளப்படும். போலீஸ் ஸ்டேஷன்களில் திடீர் ஆய்வு நடத்தப்படும். குற்றத்தடுப்பு, சட்டம் - ஒழுங்கு பராமரிப்பு, திருட்டுச் சொத்துகள் மீட்பு பணிகளை சிறப்பாக மேற்கொள்ளும் போலீஸ் ஸ்டேஷனுக்கு "ஏ கிரேடு' அதற்கு அடுத்த நிலையில் இருக்கும் ஸ்டேஷனுக்கு "பி கிரேடு', அதற்கும் அடுத்த ஸ்டேஷனுக்கு "சி கிரேடு' என தகுதி நிர்ணயிக்கப்படும். பாஸ்போர்ட் விண்ணப்பங்கள் மீது விரைந்து நடவடிக்கை எடுக்கப்படும்."சைபர் க்ரைம்' வழக்குகள் விரைந்து விசாரிக்கப்படும்; இதற்காக போலீசாருக்கு பயிற்சிகள் அளிக்கப்படும். பொதுமக்களை அலுவலக நாட்களில் காலை 9.30 முதல் மதியம் 1.00 மணி வரை சந்தித்து குறை கேட்பேன். இவ்வாறு, அமரேஷ் புஜாரி தெரிவித்தார்.