சென்னை சூப்பர் கிங்ஸ் அஷ்வினுக்கு 'டும்டும்டும்...?'

சென்னை சூப்பர் கிங்ஸில் நட்சத்திர சுழல் பந்துவீச்சாளராக திகழும் ரவிச்சந்திரன் அஷ்வினுக்கு விரைவில் டும்டும்டும்... நடைபெறவுள்ளதாக தகவல்கள் வெளிவந்துள்ளன.
அவர் தன்னுடைய பள்ளித்தோழி ப்ரீத்தி என்பவரை மணக்கவிருப்பதாகவும், ஐபிஎல் சீசன் 4 போட்டிகளில் விளையாடிக்கொண்டிருந்த போது இதற்கான நிச்சயதார்த்தை சத்தமில்லாமல் முடித்துக் கொண்டுவிட்டாராம்.

சென்னையில் தான் நிச்சயதார்த்தம் நடைபெற்ற போதும், நெருங்கிய உறவினர்களுக்கு மட்டுமே அழைப்பு விடுக்கப்பட்டதாம். கிரிக்கெட் சக வீரர்கள் யாருக்குமே சொல்லவில்லையாம். ஐபிஎல் போட்டி மனநிலையை குழப்பிவிடும் என்பதற்காக இப்படி இரகசிய ஏற்பாடாம். எப்படியோ, எதிர்வரும் நொவெம்பர் மாதம் நடத்த தீர்மானித்திருக்கும் திருமணத்திற்காவது அழைப்பு வைப்பாரா? என காதை கடிக்கிறார்கள் சூப்பர் கிங்ஸ் கிரிக்கெட்டர்கள் வட்டாரம்!

'ஒவ்வொரு போட்டியிலும் புதாய் கற்கிறேன். எந்த சூழ்நிலையிலும் நம்மால் முடியும்' என்ற எண்ணத்தை நான் விட்டு விடுவதில்லை என தன்னடக்கத்துடன் கூறும் அஷ்வினுக்கு இப்போது தான் 24 வயது. அண்மையில் நடந்து முடிந்த ஐபிஎல் போட்டிகளின் இறுதிப்போட்டி வரை சென்னை நுழைவதற்கும், இறுதிப்போட்டியில் அதிரடி ஜாம்பவான் கிரிஸ் கேய்லை எந்த வித ஓட்டங்களையும் எடுக்கவிடாது ஆட்டமிழக்க செய்தமைக்கும் இவர் தான் காரணம்!

இப்போது இந்திய கிரிக்கெட் அணிக்கு ஒரு நம்பிக்கை நட்சத்திரமாகவே மாறிவிட்டார். ஒரு காலத்தில் தமிழகத்திலிருந்து இந்திய அணிக்கு வீரர்கள் தெரிவாகும் சந்தர்ப்பம் மிக அரிதாக இருந்தது.

ஆனால் இப்போது உலக கோப்பை, அதை தொடர்ந்து இப்போது ஐபிஎல் மூலமாக தமது அபாரத்திறமையை வெளிப்படுத்தி ரசிகர்கள் மனதில் இடம்பிடித்து வருகின்றனர் பல தமிழக வீரர்கள்.
இவர்களில் பாலாஜி, முரளி விஜய், பத்ரிநாத் போன்று இப்போது அஷ்வினும் கலக்கி வருவது குறிப்பிடத்தக்கது.

இதேவேளை இந்தியாவுக்கு போட்டியாக இலங்கை அரசு அடுத்த மாதம் நடத்தவுள்ள சிறிலங்கா பிரீமியர் லீக் போட்டிகளில் தமிழக வீரர்கள் கலந்துகொள்ள அழைப்பு விடுக்கப்பட்டிருப்பதாக ஒரு தகவல் வெளியாகியுள்ளது.

தமிழக வீரர்கள் தினேஷ் கார்த்திக், அஷ்வின் ஆகியோர் இப்போட்டிகளில் சிலவேளை கலந்து கொள்ளலாம் என்பத்ற்காக முன்கூட்டியே இதை எதிர்த்து சேலத்தில் ஓர் கண்டன ஆர்ப்பாட்டம் நடைபெற்றது குறிப்பிடத்தக்கது.
தமிழ்மீடியா

பதினாறும் பெற்று, பல்லாண்டு வாழ வாழ்த்துக்கள்.