புதிய வீரர்களுக்கான ஒரு வாய்ப்பு - ரெய்னா

பது · பது Wed Jun 01, 2011 5:02 pm

மேற்கிந்தியத் தீவுகளுக்கெதிரான தொடரில் மூத்தவீரர்களுக்கு ஓய்வு கொடுக்கப்பட்டமை சர்வதேச கிரிக்கெட் அரங்கில் இளம் வீரர்கள் பிரகாசிப்பதற்கு ஒரு வாய்ப்பாக அமைந்துள்ளதாக மேற்கிந்திய தீவுகளுக்கெதிரான ஒருநாள் போட்டித் தொடருக்குத் தலைமை தாங்கும் சுரேஷ் ரெய்னா தெரிவித்துள்ளார். ரோஹித் ஷர்மா, மனோஜ் திவாரி, பத்ரிநாத் மற்றும் ஷிகார் தவான் போன்ற சிறந்த வீரர்கள் அணியில் இடம்பெற்றிருப்பது மகிழ்ச்சியைத் தருவதாகவும் அவர் தெரிவித்துள்ளார்.

அனில் கும்ப்ளே, ராகுல் டிராவிட் மற்றும் டோனி ஆகியோரிடமிருந்து தலைமைப் பண்புகளைக் கற்றுக் கொண்டதாகவும் தற்போதைய சவாலை எதிர்கொள்ளத் தயாராக இருப்பதாகவும் இதன்போது ரெய்னா தெரிவித்தார்.

சுரேஷ் ரெய்னா 2010 மே - ஜூன் காலப்பகுதியில் சிம்பாப்வேயில் நடைபெற்ற முக்கோணப் போட்டித் தொடருக்குத் தலைமை தாங்கியமை குறிப்பிடத்தக்கதாகும். இத்தொடரில் இந்திய அணி 2 போட்டிகளில் சிம்பாப்வே அணியிடமும் ஒரு போட்டியில் இலங்கை அணியிடமும்தோற்றிருந்தது.

தற்போது நடைபெறவிருக்கும் தொடரில் சச்சின் டெண்டுல்கர், டோனி மற்றும் சாகீர் கான் ஆகியோருக்கு ஓய்வு கொடுக்கப்பட்டுள்ள நிலையில் யுவராஜ் சிங், வீரேந்தர் ஷேவாக், கௌதம் காம்பீர் ஆகியோரும் காயம் காரணமாகப் பங்கேற்கமாட்டார்கள். டெஸ்ட் போட்டிகளுக்கு டோனி தலைமை தாங்குவார் எனத் தெரிவிக்கப்படுகிறது.