அமுலுக்கு வந்தது கட்டாய ஹெல்மெட் திட்டம்

kitcha · kitcha Sat 28 May 2011 - 17:09

கடந்த ஒரு வாரத்துக்கு முன்னர் போக்குவரத்து போலீசார் கட்டாய ஹெல்மெட் குறித்து அறிவிப்பு வெளியிட்டனர். அதில் இன்று (28 ந்தேதி) முதல் ஹெல்மெட் அணியாமல் செல்பவர்கள் மீது நடவடிக்கை எடுக்கப்படும் என்று கூறி இருந்தனர்.

அதன்படி போலீஸ் கமிஷனர் திரிபாதி, போக்குவரத்து கூடுதல் போலீஸ் கமிஷனர் சஞ்சய் அரோரா ஆகியோரது நேரடி மேற்பார்வையில் கட்டாய ஹெல்மெட் திட்டம் 28.05.2011 அன்று நடைமுறைப்படுத்தப்பட்டது.

காலை 8 மணியில் இருந்து 10 மணி வரை கட்டாய ஹெல்மெட் என்று கூறிக்கொண்டு யாரையும் தொந்தரவு செய்யக்கூடாது என்று போக்குவரத்து போலீசார் அறிவுறுத்தப்பட்டிருந்தனர். அதன்படி இன்று காலை 10.30 மணிக்கு பின்னர்தான் போக்குவரத்து போலீசார் முக்கியமான சந்திப்புகளில் குவிந்தனர்.

முதல் நாள் என்பதால் இன்று யாருக்கும் அபராதம் விதிக்கப்படவில்லை. சென்னை சென்டிரல் ரெயில் நிலையம் எதிரில் உள்ள போக்குவரத்து சிக்னலில் கூடுதல் துணை கமிஷனர் சிவானந்தம் தலைமையில், போக்குவரத்து போலீசார் ஹெல்மெட் அணியாமல் சென்றவர்களை மடக்கிப் பிடித்தனர்.

உங்கள் உயிரை காக்க கட்டாயம் ஹெல்மெட் அணியுங்கள் என்று அப்போது கேட்டுக் கொண்டனர். இதற்கு பொது மக்கள் மத்தியில் மிகுந்த வரவேற்பு கிடைத்தது. ஹெல்மெட் அணியாமல் வந்த அனைவரும், உடனே நாங்கள் ஹெல்மெட் வாங்கி விடுகிறோம் என்று கூறினர்.

நக்கீரன்