தர்மபுரியில் இடி, மின்னலுடன் மழை:பகலில் வழக்கம் போல் அனல்காற்று

தர்மபுரி: தர்மபுரியில் நேற்று முன்தினம் இரவு இடி, மின்னலுடன் கூடிய பலத்த மழை பெய்தது. மாவட்டத்தில் பிற பகுதியில் பரவலான மழை பெய்தது. வெப்ப மண்டல பகுதியான தர்மபுரி மாவட்டத்தில், ஃபிப்ரவரி மாதத்தில் இருந்து கோடை வெயில் கொளுத்தத் துவங்கியது. ஏப்ரல் மாத இறுதியில், பரவலாக பெய்த கோடை மழையால் வெயில் உக்கிரத்தில் இருந்து மக்கள் தப்பித்தனர். அக்னி நட்சத்திரம் துவங்கியதில் இருந்து மாவட்டத்தில், 93 முதல் 98 டிகிரி வரை வெயில் வாட்டி எடுத்து வருகிறது. கடந்த 10 நாட்களாக வெயில், 95 டிகிரிக்கு மேல் அடித்து வருகிறது. நேற்று முன்தினம், 98 டிகிரி வெயில் வாட்டி எடுத்தது. மாலையில் மழைக்கான அறிகுறிகள் தென்பட்ட போதும், பகல் முழுவதும் அடித்த வெயில் காரணமாக சாலைகளில் அனல் காற்று வீசியது. இரவு 8 மணிக்கு மேல் லேசான மழை தூறல் விழுந்தது. தொடர்ந்து விட்டு, விட்டு லேசான மழை பெய்தது. இரவு 10 மணிக்கு மேல் பலத்த இடி, மின்னலுடன் தர்மபுரி நகரில் மழை கொட்ட துவங்கியது. இதனால், நகரின் பல்வேறு பகுதியில் மின் விநியோகம் நிறுத்தம் செய்யப்பட்டது. இரவு 10 மணியில் இருந்து பெய்ய துவங்கிய மழை, அதிகாலை 12.45 மணி வரை விட்டு, விட்டு பெய்தது. பலத்த இடி, மின்னலுடன் மழை தொடர்ந்தது. மாவட்டத்தில் பிற பகுதியில் பரவலாக மழை பெய்தது. இடி, மின்னல், மழைக்கு சில இடங்களில் பாழடைந்த குடிசை சுவர்கள் இடிந்து விழுந்தது. இருந்த போதிலும் சேதம் ஏற்படவில்லை. பாப்பிரெட்டிப்பட்டி பகுதியில் பெய்த மழைக்கு சில இடங்களில் மரங்கள் சாய்ந்தன. மின் விநியோகம் நிறுத்தம் செய்யப்பட்டதால், பல பகுதிகள் இரவில் இருளில் மூழ்கியது. இதே போல் ஒடசல்பட்டி, பொம்மிடி, கடத்தூர் ஆகிய பகுதிகளிலும் நேற்று முன்தினம் இரவு 7 மணியில் இருந்து 8 மணி வரையில் பலத்த காற்றுடன் கூடிய மழை பெய்தது. காற்றுடன் கூடிய மழையால், அறுவடைக்கு தயார் நிலையில் இருந்து மாங்காய்கள் அதிக அளவில் உதிர்ந்தன. சில இடங்களில் பின் பருவ ரக மாங்காய்களும் பருமன் அடையும் முன் காற்றில் உதிர்ந்தது. அறுவடைக்கு தயார் நிலையில் இருந்த மாங்காய்கள் உதிர்ந்ததால் மா வியாபாரிகள், மா தோட்டங்களை குத்தகைக்கு எடுத்தவர்கள் பெரும் அளவில் நஷ்டம் அடைந்தனர். மாங்கூழ் தயார் செய்ய பயன்படுத்தப்படும் அல்போன்ஸா, பெங்களூரா உள்ளிட்ட ரகங்கள் இன்னும் சில வாரங்களில் அறுவடைக்கு தயார் நிலையில் இருந்த நிலையில் பாப்பிரெட்டிப்பட்டி பகுதியில் பெய்த மழைக்கு அந்த பகுதியில் சாகுபடி செய்யப்பட்டிருந்த மாங்காய்கள் உதிர்ந்தது. நேற்று சந்தைக்கு விற்பனைக்கு வந்த மாங்காய்கள், கிலோ 8 முதல் 10 ரூபாய்க்கு விற்பனை செய்யப்பட்டது. நேற்று முன்தினம் இரவு பலத்த மழை பெய்த போதும், நேற்று காலையில் வழக்கம் போல் வெயில் அடிக்க துவங்கியது. பகல் 11 மணியில் இருந்து மாலை 4 மணி வரையில் வழக்கம் போல் சாலைகளில் அனல் காற்றின் தாக்கம் இருந்தது.
தினமலர்