ராஜபக்ஷேயை சர்வதேச நீதிமன்றத்தில் நிறுத்த வேண்டும்: ஜெ., வலியுறுத்த

தாமு · தாமு Thu Apr 28, 2011 8:54 am

சென்னை:"போர்க் குற்றங்கள் மற்றும் இனப் படுகொலையை நிகழ்த்தியதற்காக, ராஜபக்ஷே, அவருடைய ராணுவத் தளபதிகள், மூத்த அமைச்சர்கள் மற்றும் இதில் தொடர்புள்ள இதர நபர்களை, சர்வதேச நீதிமன்றத்தின் முன் விசாரணைக்காக நிறுத்த வேண்டும்' என, அ.தி.மு.க., பொதுச்செயலர் ஜெயலலிதா கூறியுள்ளார்.

அவரது அறிக்கை:இலங்கை அரசின் பொறுப்புடைமை குறித்த, ஐக்கிய நாடுகள் சபை வல்லுனர்கள் குழுவின் அறிக்கை, இறுதியாக வெளியிடப்பட்டது. அப்பாவி மக்களுக்கு சேதமின்மை என்ற கொள்கையின் அடிப்படையில், மனிதாபிமான மீட்புப் பணி நடத்தப்பட்டதாக தெரிவிக்கும் இலங்கை அரசின் இனிப்பான வாதத்தை, 214 பக்கங்கள் கொண்ட ஐக்கிய நாடுகள் சபை அறிக்கை, தவிடுபொடி ஆக்கியுள்ளது.இந்தோனேசியாவைச் சேர்ந்த மார்சுகி டாருஸ்மேன், அமெரிக்காவைச் சேர்ந்த ஸ்டீவன் ராட்னர், தென் ஆப்ரிக்காவைச் சேர்ந்த யாஸ்மின் சூகா ஆகியோர் அடங்கிய மூன்று நபர் குழு, கடந்த 2010 செப்., 18ல் தனது பணியை துவங்கியது. இலங்கை ராணுவத்திற்கும், விடுதலைப் புலிகளுக்கும் இடையேயான போரின் உச்சக்கட்ட காலத்தையும், அப்போது பல்வேறு திசைகளில் இருந்து வந்த துப்பாக்கிச்சூட்டில் சிக்கிக்கொண்ட பெரும்பாலான அப்பாவி தமிழர்களின் நிலைமையையும், இந்தக்குழு தன் ஆழ்ந்த கவனத்தில் எடுத்துக் கொண்டது.

குண்டுமழைப் பொழிவிலிருந்து தமிழர்கள் தங்களை காத்துக் கொள்வதற்காக, இலங்கை அரசால் அறிவிக்கப்பட்ட குண்டு மழைக்கு விலக்களிக்கப்பட்ட பகுதி மற்றும் மருத்துவமனைகள் ஆகியவற்றின் மீதே, இலங்கை அரசின் ராணுவப் படைகள் குண்டு மழை பொழிந்ததை, நம்பிக்கையூட்டும் ஆதாரங்களுடன் மூன்று நபர் வல்லுனர் குழு கண்டறிந்துள்ளது.மிகப்பெரிய ஆயுதங்களையும், வெடி மருந்துகளையும் பயன்படுத்த மாட்டோம் என, இலங்கை அரசு அதிகாரப்பூர்வமாக அறிவித்து இருந்தாலும், அப்பாவி தமிழ் மக்கள் அதிகமுள்ள பகுதிகளில் திட்டமிட்டு குண்டு மழை பொழிந்து, ஆயிரக்கணக்கான தமிழர்கள் இறப்பதற்கு காரணமாக, இலங்கை ராணுவம் இருந்தது என, வல்லுனர் குழு முடிவு செய்துள்ளது.அப்பாவி தமிழர்களை கேடயமாக பயன்படுத்துதல், குழந்தைகளை கட்டாயப்படுத்தி படையில் சேர்த்தல், தன் கட்டுப்பாட்டிலிருந்து தப்ப நினைக்கும் அப்பாவி தமிழர்களை கொல்லுதல் மற்றும் கூலி வேலை செய்யுமாறு கட்டாயப்படுத்துதல் உட்பட பல மனித உரிமை மீறல்களை, விடுதலைப் புலிகள் அமைப்பு நிகழ்த்தியுள்ளது.

இந்த அறிக்கை வெளிவராமல் இருப்பதற்கு, தன்னால் இயன்ற அனைத்து முயற்சிகளையும் இலங்கை அரசு மேற்கொண்டது. ஐக்கிய நாடுகள் சபையின் அறிக்கை வெளியிடப்பட்டால், இது தற்போது இலங்கையில் நடைபெற்றுக் கொண்டிருக்கும் சமரச முயற்சிகளுக்கு தடையாக அமைந்துவிடும் என்ற வாதத்தை, இலங்கை அதிபர் ராஜபக்ஷே முன்வைத்தார். ஐ.நா., அறிக்கையை வெளியிடாமல் தடுப்பதற்காக, ராஜபக்ஷேவின் சகோதரர் கோத்தபயா ராஜபக்ஷே, அமெரிக்காவிற்கு பறந்து சென்றதாகவும் தகவல்கள் கூறுகின்றன.ஐ.நா., குழுவின் அறிக்கையை அடிப்படையாகக் கொண்டு, போர்க் குற்றங்கள் மற்றும் இனப் படுகொலையை நிகழ்த்தியதற்காக, ராஜபக்ஷே அவருடைய ராணுவத் தளபதிகள், மூத்த அமைச்சர்கள் மற்றும் இதில் தொடர்புள்ள இதர நபர்களை சர்வதேச நீதிமன்றத்தின் முன் விசாரணைக்காக நிறுத்த, நடவடிக்கை எடுக்குமாறு, ஐக்கிய நாடுகள் சபையை இந்தியா வலியுறுத்த வேண்டும்.இவ்வாறு ஜெயலலிதா கூறியுள்ளார்.
தினமாலர் ராஜபக்ஷேயை சர்வதேச நீதிமன்றத்தில் நிறுத்த வேண்டும்: ஜெ., வலியுறுத்த 678642

ராஜபக்ஷேயை சர்வதேச நீதிமன்றத்தில் நிறுத்த வேண்டும்: ஜெ., வலியுறுத்த 678642

ராஜபக்ஷேயை சர்வதேச நீதிமன்றத்தில் நிறுத்த வேண்டும்: ஜெ., வலியுறுத்த

ராஜபக்ஷேயை சர்வதேச நீதிமன்றத்தில் நிறுத்த வேண்டும்: ஜெ., வலியுறுத்த

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக