மலேசியா ஊழல் தடுப்பு வாரிய (எம்ஏசிசி) கட்டிடத்திலிருந்து சுங்கத்துறை அதிகாரி விழுந்து இறந்தார்

ஜாலான் கொக்ரேனில் உள்ள கோலாலம்பூர் மலேசிய ஊழல்தடுப்பு ஆணையக் கட்டிடத்தின் மூன்றாவது மாடியிலிருந்து விழுந்து உயிரிழந்த சுங்கத்துறை அதிகாரி, அஹ்மட் சர்பானி முகம்மட், 56, என்று அடையாளம் கூறப்பட்டுள்ளது. இரண்டு நாள்களுக்குமுன்தான் அவர் பிணையில் விடுவிக்கப்பட்டார் என்றும் தெரிகிறது.

அஹ்மட் சர்பானி ஊழல் தொடர்பில் 2011, ஏப்ரல் முதல் நாள் பிற்பகல் மணி 1-க்கு கிள்ளானில் கைது செய்யப்பட்டதாக எம்ஏசிசி விசாரணை இயக்குனர் முஸ்டபார் அலி, கேஎல் எம்ஏசிசி தலைமையகத்தில் நடைபெற்ற செய்தியாளர் கூட்டத்தில் கூறினார்.

விசாரணைக்கு உதவியாக தடுத்து வைக்கப்பட்ட அவர் கடந்த சனிக்கிழமை பிற்பகல் மணி 12.30க்கு விடுவிக்கப்பட்டார்.

“இன்று அவருக்கு எதிரான வழக்கு குறித்து விசாரணை அதிகாரியைச் சந்தித்துப் பேசுவதற்காக காலை மணி 8.26-க்கு மோட்டார் சைக்கிளில் ஜாலான் கொக்ரேனில் உள்ள எம்ஏசிசி அலுவலகம் வந்தார்”, என்று முஸ்டபார் கூறினார்.

“அந்த விசாரணை அதிகாரி ஒரு கூட்டத்தில் கலந்துகொண்டிருந்ததால் இவர் அலுவலகத்தின் முன்கூடத்தில் காத்திருந்தார்.”

அஹ்மட் சர்பானியுடன் ஓர் அதிகாரியும் இருந்தார்.

“சுமார் 10.15-க்கு அந்த அதிகாரி இவரை இருக்கச் சொல்லிவிட்டு விசாரணை அதிகாரியைத் தேடிச் சென்றார். அவர் திரும்பி வந்து பார்த்தபோது அங்கு அஹ்மட் சர்பானியைக் காணவில்லை.”

அதன்பின் அஹ்மட் சர்பானியின் உடல் முதல் மாடியில் ஒரு பூப்பந்து திடலில் கிடக்கக் காணப்பட்டது.

“அதிகாரி அவரைவிட்டுச் சென்ற ஐந்து நிமிடங்களில்” அது நிகழ்ந்துள்ளது என்றாரவர்.

கடந்த டிசம்பரிலிருந்து செயல்பட்டுக்கொண்டிருக்கும் எம்ஏசிசி கூட்டரசுப் பிரதேசத் தலைமையகம் ஒரு நான்கு மாடிக் கட்டிடமாகும்.

போலீஸ் பணிக்குழுவை அமைக்கும்

இச்சம்பவம் பற்றி ஊடகங்களில் விவாதிப்பதை நிறுத்திக்கொள்ளுமாறு கேட்டுக்கொண்ட கூட்டரசுப் பிரதேச போலீஸ் தலைவர் சுல்கிப்ளி அப்துல்லா அதை ஆராய ஒரு பணிக்குழு அமைக்கப்படும் என்றார். .

காலை 10.42-க்கு அந்த உடல் கண்டெடுக்கப்பட்டது பற்றிப் போலீசுக்குத் தெரிவிக்கப்பட்டது என்றும் ஏழு நிமிடங்களில் போலீசார் அங்கு சென்றனர் என்றும் சுல்கிப்ளி கூறினார்.

“அந்த உடல் தலைகுப்புற கிடந்தது. மருத்துவமனை உதவியாளர் ஒருவரை அழைத்து உடலில் உயிர் இல்லை என்பதை உறுதிப்படுத்திக்கொண்டோம்….தலையில் காயங்கள் காணப்பட்டன”, என்றார்.

பின் அவ்வுடல், சவப் பரிசோதனைக்காக யுகேஎம் மருத்துவமனைக்கு அனுப்பி வைக்கப்பட்டது என்று சுல்கிப்ளி தெரிவித்தார்.

அந்த இறப்பில் சூது நிகழ்ந்திருக்க வாய்ப்புண்டா என்று கேட்டதற்கு, “எல்லாக் கோணங்களிலிருந்தும் அதை விசாரிப்போம்”, என்றவர் பதிலிறுத்தார்.

'மலேசியா இன்று'