லெங்கெங் முகாமிலிருந்து தப்பியோடியவர்களைத் தேடும் மாபெரும் நடவடிக்கை

தடுப்பு முகாமில் உள்ள ஒரு தங்குமிடத்தைத் தீயிட்டுக் கொளுத்திய பின்னர் அங்கிருந்து தப்பியோடிய சட்டவிரோத குடியேற்றக்காரர்களைத் தேடிப்பிடிக்கும் மாபெரும் நடவடிக்கை தொடங்கப்பட்டுள்ளது.

லெங்கெங் குடிநுழைவுத்துறை தடுப்புமுகாமிலிருந்து தப்பியோடியவர்களைத் தேடும் பணியில் 200 போலீஸ் படையினரும், குடிநுழைவுத்துறை அதிகாரிகளும், பகுதி - இராணுவத் தன்னார்வலர்களும் ஈடுபட்டிருப்பதாக மாவட்ட போலீஸ் தலைவர் சைபுல் அஸ்லி ஏஎப்பி-யிடம் நேற்று தெரிவித்தார்.

“தப்பியோடியவர்களில் பலர் மியான்மார் நாட்டவர். சிலர் ஈரானியர்கள். ஒருவர் நைஜிரியாவைச் சேர்ந்தவர்”, என்றாரவர்.

“25 பேர் பிடிபட்டு முகாமுக்குக் கொண்டுவரப்பட்டுள்ளனர். மற்றவர்களைத் தேடிக் கண்டுபிடிக்கும் நடவடிக்கை தொடர்கிறது”, என்று சைபுல் தெரிவித்தார்.

முன்னதாக பேசிய லெங்கெங் குடிநுழைவு முகாம் துணைத் தலைவர் ருஸ்லி மொக்தார், கோலாலம்பூருக்குத் தெற்கே உள்ள அந்த முகாமில் தடுத்து வைக்கப்பட்டிருந்த சட்டவிரோத குடியேறிகளில் 109 பேர் கடந்த திங்கள்கிழமை தப்பியோடினார்கள் என்றார்.

உள்துறை அமைச்சின் தடுப்புமுகாம்கள் பொறுப்பதிகாரியான முகம்மட் அஸ்ரி யூசுப், “தடுப்புமுகாமில் உள்ள ‘ஏ’கட்டிடத்தொகுதிக்குத் தீயிட்டு கலகம் செய்த தடுப்புக்கைதிகள்” இரவு மணி 9.45 அளவில் முகாமை உடைத்துக்கொண்டு தப்பியோடியதாகக் கூறினார்.

அச்சம்பவம் மீது விசாரணை நடத்த ஒரு குழு அமைக்கப்பட்டிருப்பதாக அவர் சொன்னார்.

லெங்கெங் முகாம் ஆறு கால்பந்து திடல்களை உள்ளடக்கும் அளவுக்குப் பெரியது. அதில் தடுப்புக்காவல்கைதிகளை தங்க வைக்க நான்கு கட்டிடத்தொகுதிகள் உண்டு. முகாமைச் சுற்றி ஆறு மீட்டர் உயரத்துக்குக் கம்பி வேலி போடப்பட்டுள்ளது. ஒரு கண்காணிப்புக் கோபுரமும் உண்டு.

சட்டவிரோதக் குடியேறிகளையும் ஆள் கடத்தலில் ஈடுபடுவோரையும் தடுத்துவைக்கும் இத்தகைய தடுப்புமுகாம்களில் தரம் திருப்திகரமாக இல்லை என்பது உள்துறை அமைச்சின் அதிகாரிகளே ஒப்புக்கொண்ட ஓர் உண்மையாகும். அவற்றை“எந்த நேரத்திலும் வெடிக்கும் தருண குண்டுகள்” என்று கடந்த ஆகஸ்டில் ஒரு செய்தியறிக்கை குறிப்பிட்டிருந்தது.

13 தடுப்புமுகாம்களில் பாதுகாப்பு நன்றாக இல்லை என்றும் அதனால் அங்குள்ள 7,000 தடுப்புக் கைதிகள்-அவர்களில் பாதிக்கு மேற்பட்டோர் “கடும் குற்றங்களில் ஈடுபட்டவர்கள்”-தப்பியோடுவது எளிது என்றும் அவர்கள் தெரிவித்தனர்.

கடந்த ஆண்டு மார்ச் மாதம், 16 தடுப்புக்கைதிகள்-12 பேர் ஆப்கானிஸ்தானைச் சேர்ந்தவர்கள்- கோலாலம்பூர் அனைத்துல விமான நிலையத் தடுப்புமுகாமிலிருந்து தப்பியோடினர்.

இப்படிப்பட்ட சம்பவங்களைத் தடுக்க நடவடிக்கை எடுக்கப்பட்டு வருவதாக அமைச்சின் தலைமைச் செயலாளர் மகம்மட் ஆதம் தெரிவித்தார்.

மலேசியாஇன்று