மு.க., சொன்னா அது சாதனை : எஸ்.எம்.எஸ்., வந்தால் வேதனையா?

இந்த தேர்தலில் மிகப்பெரிய பிரசார சாதனமாக இருக்கும் எஸ்.எம்.எஸ்., தகவல், தி.மு.க.,விற்கு மிகப்பெரிய சிக்கலை ஏற்படுத்தியுள்ளது. கடந்த ஒரு சில ஆண்டுகளாகவே தி.மு.க., அரசின் சாதனைகள் அடங்கிய பட்டியல், எஸ்.எம்.எஸ்., மூலம் அனுப்பப்படுகிறது. குறிப்பாக, இலவச திட்டங்கள் பற்றி மக்களிடையே விழிப்புணர்வு ஏற்படுத்தும் எஸ்.எம்.எஸ்.,கள் தான் இவை. தி.மு.க.,வினர் மேடை போட்டு பேசும் பேச்சை, எஸ்.எம்.எஸ்., மூலம் அனுப்பி, "சிந்திப்பீர்' என்ற ஒரு வார்த்தையை மட்டுமே சேர்த்து விடுகின்றனர். இது, படிப்பவர்களை ஒரு கணம் சிந்திக்க வைத்து விடுகிறது. இதுவே தற்போது தி.மு.க.,விற்கு சிக்கலை ஏற்படுத்துவதாக உள்ளது.
குறிப்பிட்ட கட்சிகளுக்கு ஓட்டு கேட்காமல் இலவச திட்டத்தால் தமிழக மக்கள் எப்படியெல்லாம் ஏமாற்றப்படுகின்றனர் என்பதை விளக்கும் வகையில் அமைந்துள்ள இந்த எஸ்.எம்.எஸ்., செய்திகளில் ஒன்று தான் இது. "எங்கே போகிறது தமிழகம்? இலவச அரிசியை வாங்கி, இலவச கிரைண்டரில் அரைத்து, இலவச காஸ் அடுப்பில் சமைத்து, இலவச மிக்சியில் சட்னி அரைத்து, இலவச வீட்டில், இலவச மின் விசிறிக்கு அடியில் உட்கார்ந்து, இலவச "டிவி'யை பார்த்துக் கொண்டு சாப்பிட்டு, இலவசமா வரும் வியாதிக்கு, இலவச காப்பீட்டு திட்டத்தில் இலவச சிகிச்சை எடுத்துக் கொண்டு, உல்லாசமாக வாழும் வாழ்க்கை வேறு எவருக்கு கிடைக்கும்?' இந்தியாவில் தமிழகம் மட்டும் வல்லரசு ஆகிடுச்சி, ஜெய்ஹிந்த்! திங்க் பண்ணுங்க! எங்கேயோ போய்க் கொண்டிருக்கிறது தமிழகம், சிந்திப்பீர்' என்ற தகவலுடன் வலம் வந்து கொண்டிருக்கிறது இந்த எஸ்.எம்.எஸ்., செய்தி.
"தி.மு.க.,வினர் மேடை போட்டு சொன்னா அது சாதனை; அந்த சாதனையை நாங்க எஸ்.எம்.எஸ்., அனுப்பினா அது, அவர்களுக்கு வேதனையா போயிடுது; அதுக்கு நாங்கள் என்ன செய்வது?' என, வக்காலத்து வாங்குகின்றனர் எஸ்.எம்.எஸ்., அபிமானிகள்.
-நமது சிறப்பு நிருபர்-


தினமலர்.