அமைச்சர் நேருவின் சொத்து மதிப்பு? எஸ்.எம்.எஸ்., பிரசாரத்தால் பரபரப்பு

திருச்சி : "போக்குவரத்துத்துறை அமைச்சர் நேருவின் உண்மையான சொத்து மதிப்பு எவ்வளவு?' என்ற தலைப்பில் வெளியாகியுள்ள எஸ்.எம்.எஸ்., பிரசாரத்தால் திருச்சியில் பரபரப்பு ஏற்பட்டுள்ளது. திருச்சி-2 சட்டசபை தொகுதியில் போட்டியிட்டு வெற்றி பெற்ற நேரு, போக்குவரத்துத்துறை அமைச்சரானார். தி.மு.க., முக்கியப் புள்ளிகளில் ஒருவராக வலம் வரும் இவர், பல கோடி ரூபாய் சொத்துக்கு அதிபதியாக உள்ளார். தற்போது, மீண்டும் திருச்சி மேற்கு தொகுதியில் போட்டியிடுகிறார். கடந்த 24ம் தேதி மனு தாக்கல் செய்தார். அப்போது, தன் மொத்த சொத்து மதிப்பு, 17 கோடியே 77 லட்சத்து 79 ஆயிரத்து 732 ரூபாய் என குறிப்பிட்டிருந்தார்.
ஆனால், திருச்சியில் கடந்த இரண்டு நாட்களாக, "நேருவின் உண்மையான சொத்து மதிப்பு' என்ற தலைப்பில் எஸ்.எம்.எஸ்., உலாவுகிறது. அதில், பல்லாயிரம் கோடி ரூபாய், நேருவுக்கு சொந்தமானது என குறிப்பிடப்பட்டுள்ளது, அரசியல் வட்டாரத்தில் மட்டுமல்ல, தேர்தல் கமிஷன் வட்டாரத்திலும் பரபரப்பை ஏற்படுத்தியுள்ளது.
அந்த எஸ்.எம்.எஸ்.,சில் கூறப்பட்டிருப்பதாவது: கே.என்.நேரு சொத்து மதிப்பு விவரம்: வீட்டின் உண்மையான மதிப்பு, 10 ஆயிரத்து 281 கோடி ரூபாய்; இந்தோனேசியாவில் உள்ள நிலக்கரி சுரங்கம் மதிப்பு, 45 ஆயிரத்து 63 கோடி ரூபாய்; பஸ் பாடி பில்டிங் தொழிற்சாலை மதிப்பு, 388 கோடி ரூபாய்; 50க்கும் மேற்பட்ட சொத்துக்கள், இவரது பெயரில் உள்ளன. கே.எம்.சி., மற்றும் கே.எம்.சி., ஸ்பெஷாலிட்டி மருத்துவமனைகளும், இதில் அடக்கம். திருச்சி வாக்காளர்களே சிந்தியுங்கள். மீண்டும் நேருவுக்கு வாக்களித்தால் உங்கள் சொத்தும் பறிக்கப்படும். இவ்வாறு அதில் கூறப்பட்டுள்ளது.
அ.தி.மு.க., பொதுச் செயலர் ஜெயலலிதா பிரசாரத்தின் போது, ""நேருவை விட்டால், திருச்சியை திருடி விடுவார். தில்லைநகர், நேரு நகராகிவிட்டது,'' என பேசினார். அதன்பிறகு, இதுபோன்ற எஸ்.எம்.எஸ்.,கள் வெளியாகியுள்ளதால், நேரு தரப்பு அதிர்ச்சியில் உள்ளது.



தினமலர்.