சிங்கம் வர்றார்..!

சஞ்சீவி மலைக்காட்டில் சிங்கம் ஒன்று ராஜாவாக ஆட்சி நடத்தி வந்தது. அது நல்லபடியாக காட்டை ஆட்சி செய்ய நினைத்தது. ஆனால், சிங்கராஜாவின் துதிபாடிகளான நரியும், காட்டுப் பூனையும் அதைக் கெடுத்து வந்தன. எந்த ஒரு காரியத்திற்கும் அவர்கள் இல்லாமல் சிங்கராஜா போவதேயில்லை. இதைப் பயன்படுத்தி நரியும், காட்டுப்பூனையும் சுகபோகமாக வாழ்ந்தன.

சிங்கராஜாவிற்குப் பிறகு இந்தக் காட்டின் அடுத்த வாரிசு நரியா, காட்டுப்பூனையா என்று மிருகங்கள் பேசிக்கொண்டன. அதற்குக் காரணம், இவர்கள் இருவரும் பரப்பி விட்ட வதந்திதான். இதனால் நரிக்கு ஒரு கூட்டமும், காட்டுப்பூனைக்கு ஒரு கூட்டமும் சேர்ந்தது.

ஒருநாள் மதம் கொண்ட யானை ஒன்று காட்டைத் துவம்சம் செய்தது. மரங்களை வேரோடு பிடுங்கி எறிந்தது. எதிர்ப்பட்ட மிருகங்களைத் தன் துதிக்கையால் தூக்கி அடித்தது. அதைக் கேள்விப்பட்ட நரியும், காட்டுப்பூனையும் சிங்கராஜாவிடம் ஓடோடி வந்தன.

``ராஜாவுக்கு வணக்கம்'' என்று மூச்சிரைத்தபடி நின்றன.

``நீங்கள் இப்படி மூச்சிரைக்க வந்து நிற்பதைப் பார்த்தால் காட்டில் ஏதோ அசம்பாவிதம் நடப்பது போலிருக்கிறது?''

``ஆமாம் ராஜா. ஒரு யானை, இந்தக் காட்டுக்கு இனி நான்தான் ராஜா என்று வரும் மிருகங்களிடம் அடாவடி செய்து வருகிறது. தங்கள் ஆட்சியில் இப்படி ஒரு நிலைமையா என்று எல்லா மிருகங்களும் வருத்தப்படுகின்றன.''

"அப்படியா, உடனே கிளம்புங்கள் யானையை ஒரு கை பார்ப்போம்!''

மதம்கொண்ட யானை இருக்கும் இடத்தில் சிங்கத்தைக் கொண்டு போய் விட்டனர். யானைக்கு மதம் கொண்டால், தான் என்ன செய்கிறோம் என்பதே தெரியாது. அதனிடம் சிங்கத்தைக் கொண்டு போய் விட்டால் என்ன ஆவது? சிங்கத்தை தூக்கிப்போட்டு துவம்சம் செய்தது யானை. `தப்பித்தோம்... பிழைத்தோம்...' என்று ஓடியது சிங்கம்.

யானை அடித்த அடியில் சிங்கத்தின் எலும்பெல்லாம் முறிந்து விட்டது. இதனால் பல நாட்களுக்கு குகைக்குள்ளேயே கிடந்தது சிங்கம். எவ்
வளவு நாளைக்குத்தான் உணவில்லாமல் இருப்பது? கொஞ்சம் உடல் தேறியதும் மெல்ல வெளியே வர ஆரம்பித்தது. சிங்கராஜாவிற்கு நரியும், காட்டுப்பூனையும் ஒரு ஐடியா சொன்னார்கள்.

"ராஜா, இனி நீங்க `திடுதிப்'பென்று எங்கேயும் போகவேண்டாம். நாங்க இரண்டு பேரும் சிங்கம் வர்றார்! சிங்கம் வர்றார்! என்று முன்னால் கத்திக் கொண்டு போகிறோம். நீங்கள் பின்னால் வாங்க'' என்றனர் இருவரும்.

சிங்கம், இது நல்ல ஐடியா என்று நினைத்தது. அதன்படி அவர்கள் இருவரும் கத்திக் கொண்டு போனார்கள். அவர்களைப் பின்தொடர்ந்த சிங்கத்துக்கு உணவு எதுவும் கிடைக்காமல் பசி தான் மிஞ்சியது. சிங்கம் வருவது தெரிந்து விடுவதால் அனைத்து மிருகங்களும் தப்பிவிடுகின்றன.

இதை கவனித்துக் கொண்டிருந்த வைத்தியர் கரடி, ``சிங்கராஜா, இதுவெல்லாம் நடைமுறைக்கு ஒத்துவராது. நீங்கள் மாமிசம் தின்பவர். உயிர்களை வேட்டையாடி தான் உண்ண வேண்டும். உயிரை விடுபவர்கள் உங்கள் வருகை தெரிந்தால் நிற்பார்களா? ஓடி ஒளிந்து கொள்ள மாட்டார்கள்? இந்த இரண்டு பசங்களும் உங்களை எப்படியும் ஒழித்துக் கட்டிவிட்டு தலைவனாகத் திட்டம் போடுகிறார்கள். இவர்களுக்கு காட்டின் தலைவனாகக் கூடிய உடல் வலிமை உள்ளதா?'' என்றது.

உண்மையை உணர்ந்து கொண்ட சிங்கம், நரியையும், காட்டுப்பூனையையும் காட்டை விட்டே துரத்தியது.

த. விஜயபால்

சிங்கராஜா= முரளிராஜா
காட்டுபூனை=ராஜாராம்
நரி=சிவா

இந்த இரண்டு பசங்களும் உங்களை எப்படியும் ஒழித்துக் கட்டிவிட்டு தலைவனாகத் திட்டம் போடுகிறார்கள். இவர்களுக்கு காட்டின் தலைவனாகக் கூடிய உடல் வலிமை உள்ளதா?'' என்றது.

இது எப்போ ? சொல்லவேயில்ல!!!!! அழகிரி தான் விட்டுக்கொடுத்து ஒத்துக்கிட்டாரே!... அருமையான கதை!