லிபியா அதிபர் கடாபியின் சொத்துக்களை சுவிட்சர்லாந்து முடக்கியது

பெர்லின், பிப்.26- லிபியா அதிபர் கடாபி மற்றும் அவரது குடும்பத்தினருக்கு சொந்தமாக சுவிட்சர்லாந்து நாட்டில் உள்ள சொத்துக்களை அந்த நாட்டு அரசாங்கம் முடக்கியது.

கொடூர தாக்குதல்

ஆப்பிரிக்காவில் உள்ள லிபியாவில் கடந்த 42 ஆண்டுகளாக கடாபி அதிபராக இருந்து வருகிறார். அவர் சர்வாதிகாரமாக ஆட்சி செய்து வருகிறார். நாட்டு மக்களுக்கு அடிப்படை உரிமைகள் மறுக்கப்பட்டு வருகின்றன. இதனால் அந்த நாட்டு மக்கள் கடாபிக்கு எதிராக புரட்சியில் ஈடுபட்டு வருகிறார்கள். அப்படி கிளர்ச்சியில் ஈடுபடும் மக்களை கடாபி இரும்புக்கரம் கொண்டு ஒடுக்கி வருகிறார்.

கடாபியின் ஆதரவாளர்களும் ராணுவமும் போராட்டத்தில் ஈடுபட்டு உள்ள மக்கள் மீது கொடூர தாக்குதலை நடத்தி வருகிறார்கள். இதில் பலர் பலியானார்கள். பலர் காயம் அடைந்து உள்ளனர்.

சொத்துக்கள் முடக்கம்

இதனால் கோபம் அடைந்த சுவிட்சர்லாந்து, லிபியாவுக்கு கண்டனம் தெரிவித்து உள்ளது. சொந்த நாட்டு மக்கள் மீதே ஒரு அரசாங்கம் பலப்பிரயோகம் செய்வது கண்டிக்கத்தக்கது என்று சுவிட்சர்லாந்து அரசாங்கம் கண்டித்து உள்ளது. இதனால் இந்த சொத்தை அபகரிக்க முடியாதபடி கடாபியை தடுப்பதற்காக சுவிட்சர்லாந்து அரசாங்கம், கடாபியின் சொத்துக்களை முடக்கி உள்ளது.

கடாபி, அவர் மனைவி சபியா அல் பர்ராசி, ஒரே மகள் ஆயிஷா, மகன்கள் மற்றும் உறவினர்கள் கடாபியின் நண்பர்கள் என 28 பேரின் சொத்துக்கள் சுவிட்சர்லாந்து வங்கியில் டெபாசிட்டு செய்யப்பட்டு உள்ளன. இந்த சொத்துக்களின் மதிப்பு 63 கோடி பிராங் (பிரான்சு நாணயம்) ஆகும். இந்த சொத்துக்களை முடக்கி வைப்பது என்று அந்த நாட்டு அரசு முடிவு எடுத்து உள்ளது.

கடாபிக்கு இருக்கும் அசையா சொத்துக்கள் உள்ளிட்ட அனைத்து விதமான சொத்துக்களை விற்பதற்கும் அதை மாற்றுவதற்கும் 3 ஆண்டுகளுக்கு தடை விதிக்கப்பட்டு உள்ளது.

உறவில் விரிசல்

கடாபிக்கும் அவரது குடும்பத்தினருக்கும் சுவிட்சர்லாந்து வங்கிகளில் 570 கோடி பிராங் மதிப்புக்கு சொத்துக்கள் இருந்தன. கடந்த 2008-ம் ஆண்டு ஜுலை மாதம் ஜெனீவா நகரில் உள்ள ஒரு ஓட்டலில் தங்கி இருந்த போது கடாபியின் மகன் ஹன்னிபால் வேலை செய்யும் பெண்களை அடித்து உதைத்ததால், அவர் கைது செய்யப்பட்டார். இதனால் இரு நாடுகளுக்கும் இடையே உள்ள உறவில் விரிசல் ஏற்பட்டது.

இதை தொடர்ந்து கடாபியின் குடும்பத்தினர் வங்கி கணக்கில் இருந்த பெரும்பணத்தை வேறு நாட்டு வங்கிக்கு மாற்றி விட்டனர். இதனால் சுவிஸ் வங்கியில் இருக்கும் சொத்தின் மதிப்பு குறைந்து போனது.

கடந்த சில வாரங்களில் துனிஷியாவின் முன்னாள் அதிபர் பென் அலி, எகிப்தின் முபாரக் ஆகியோரின் சொத்துக்களை சுவிட்சர்லாந்து அரசாங்கம் முடக்கி வைத்தது குறிப்பிடத்தக்கது.

தினதந்தி