இண்டர்லோக்-எதிர்ப்புக் கூட்டம்: போலீஸ் நடவடிக்கை தொடர்கிறது.

முன்பெல்லாம் கூட்டங்கள் நடைபெறும்போதுதான் கைது செய்தார்கள். ஆனால் இன்று, உலு சிலாங்கூரில் இன்றிரவு இண்டர்லோக்-எதிர்ப்புக் கூட்டம் நடைபெறுவதைத் தடுக்கும் நோக்கில் அதன் ஏற்பாட்டாளரைப் போலீஸ் முன்கூட்டியே கைது செய்துள்ளது.

எம். கோபாலகிருஷ்ணன்,26, கைது செய்யப்பட்டதாக மனித உரிமைக் கட்சி பிரதிநிதி ஒருவர் மலேசியாகினிக்குத் தகவல் தெரிவித்தார். இண்டர்லோக்-எதிர்ப்புக் கூட்டம் பற்றித் தகவளிக்கும் துண்டறிக்கைகளில் தொடர்புகொள்ள வேண்டியவர் என கோபாலகிருஷ்ணனின் பெயர்தான் போடப்பட்டிருக்கிறது.

“பகல் 12.30க்கு அவர் வீட்டுக்கு கைது ஆணையுடன் வந்து உள்ளூர் போலீஸ் நிலையத்துக்கு இட்டுச் சென்றனர்.

“சட்டத்துக்குப் புறம்பான ஒரு நிகழ்வை ஏற்பாடு செய்ததற்காக அவரைக் கைது செய்தார்கள் என நினைக்கிறேன்”, என்று மனித உரிமைக் கட்சியின் தகவல் பிரிவுத் தலைவர் எஸ்;ஜெயதாஸ் கூறினார்.

கோபாலகிருஷ்ணன் இல்லையென்றாலும் கூட்டம் நடைபெறும் என்று ஜெயதாஸ் தெரிவித்தார்.

“அதே குடியிருப்புப் பகுதியில் இன்னொரு இடத்தில் அது நடைபெறும்.”ஏற்கனவே கூட்டம் நடைபெறவிருந்த இடத்தை போலீஸ் மூடி வைத்திருப்பதால் எச்ஆர்பி மனம் தளர்ந்துவிடவில்லை என்றவர் குறிப்பிட்டார்.

இதன் தொடர்பில் இன்று பிற்பகல் ஒரு குறிப்பை வெளியிட்டிருக்கும் எச்ஆர்பி தலைமைச் செயலாளர் பி.உதயகுமார், அந்த எச்ஆர்பி ஆர்வலரை வெளியில் உள்ளவர்களும் தொடர்பு கொள்ள முடியவில்லை அவராலும் வழக்குரைஞர்களைத் தொடர்புகொள்ள முடியவில்லை என்று கூறினார்.

கட்சி உதவித் தலைவர் கே.தமிழ்ச் செல்வம் போலீசுடன் தொடர்புகொண்டதாகவும் அவர்கள், கோபாலகிருஷ்ணன் கைது செய்யப்பட்டிருப்பதை உறுதிப்படுத்தியதுடன் கூட்டம் பற்றித் தகவல் தெரிவிக்கும் குறுஞ்செய்திகளை அனுப்பியதற்காக அவர் கைது செய்யப்பட்டதாகவும் தெரிவித்தனர் என்று உதயகுமார் கூறினார்.

ஆனால், கோபாலகிருஷ்ணனின் உடல்நலன் பற்றியோ அவர் எங்கு வைக்கப்பட்டிருக்கிறார் என்பது பற்றியோ தமிழ்ச்செல்வத்தால் தகவல் தெரிந்துகொள்ள முடியவில்லை.

தடைசெய்யப்பட்ட இண்ட்ராபின் மறு அவதாரமாக உருவெடுத்துள்ள எச்ஆர்பி, ஐந்தாம் படிவ இலக்கியப் பாடநூலாக வைக்கப்படவுள்ள இண்டர்லோக் நாவலுக்கு எதிராக தொடர்ந்து எதிர்ப்பு கொடுத்து வருகிறது.

அந்நூலில் இந்தியாவிலிருந்து வந்தவர்களைப் பறையர்கள் என்று குறிப்பிடப்பட்டிருப்பதை அது வன்மையாகக் கண்டிக்கிறது.

கடந்த வாரம் நாடு முழுக்க எச்ஆர்பி மேற்கொண்ட எதிர்ப்பு நடவடிக்கைகளின்போது 63 பேர் கைது செய்யப்பட்டனர். நேற்றிரவு பேராக்கில் 16 பேர் கைதானார்கள்.

கைதான அனைவருமே விடுதலை செய்யப்பட்டனர்.

இதனிடையே, ஜெயதாசும் எச்ஆர்பி-இன் மற்ற முக்கியமானவர்களும் கைது நடவடிக்கை மீதான தங்கள் மனக்குறைகளையும் மற்ற விவகாரங்களையும் ஐநா கவனத்துக்குக் கொண்டு செல்லத் திட்டமிட்டுள்ளனர். நாளை அவர்கள் கோலாலம்பூரில் உள்ள ஐநா அலுவலக அதிகாரிகளைச் சந்திக்க ஏற்பாடு செய்திருக்கிறார்கள்.

'மலேசியா இன்று'