அனுசரிப்பு

கொட்டும் மழையில் நின்றதால், அந்த இரட்டை மாடு பூட்டிய வண்டியிலிருந்த ஒரு மாட்டுக்கு சளி பிடித்துக் கொண்டது. சளியின் தொந்தரவு தாங்காமல் `நச்... நச்'சென தும்மல் போட்டது. அதைக் கண்ட மற்றொரு மாடு, `இன்று எஜமானர் வெகுதூரம் போகப் போவதாகச் சொன்னார். அதனால் தான் இது வேண்டுமென்றே உடம்புக்கு முடியாததைப் போல் நடிக்கிறது' என நினைத்தது.

தனது சக மாட்டை அலட்சியத்துடன் நோக்கிய அது, "நேற்று மழையில் நனைந்தது சேரவில்லையாக்கும். நானும்தான் நேற்று நனைந்தேன். எனக்கு ஒன்றும் ஆகவில்லையே... எதற்கும் நல்ல எண்ணம் வேண்டும்'' என்றது முறைப்புடன்.

அதைக்கேட்ட நோய்வாய்ப்பட்ட மாடு, "நண்பனே! அனைவருக்கும் ஒரே மாதிரியான உடம்போ, நோய் எதிர்ப்பு சக்தியோ இருப்பதில்லை. என்ன செய்வது? இன்று என்னால் வேகமாக நடக்க இயலாது. அதனால் நீ சற்று என்னை அனுசரித்து வா'' என கெஞ்சியது.

"அது சரி, உனக்கு முடியாவிட்டால் நான் என்ன செய்வது? என்னால் எஜமானருக்கு துரோகம் செய்ய முடியாது'' என அலட்டிக் கொண்டே வேகவேகமாக நடக்கத் தொடங்கியது. இதனால் அந்த மாடு சென்ற பக்கம் வண்டி இழுத்துக்கொண்டு ஓடியது.

வண்டி ஒரு பக்கமாக இழுத்துக்கொண்டு போவதைக் கண்ட எஜமானர், மாடுகளைக் கவனித்தார். அதில் ஒன்றுக்கு சளி பிடித்திருப்பது தெரிந்ததும் கவலை கொண்டார். `தும்மல் போட்ட மாட்டை எஜமானர் நன்றாக அடித்து விரட்டப் போகிறார்' என எதிர்பார்த்த மற்றொரு மாட்டின் எண்ணம் நிறைவேறாமல் போனது. சுறுசுறுப்புடன் இருந்த அந்த மாட்டை தட்டிக்கொடுத்த எஜமானர், நோய்வாய்ப்பட்டிருந்த மாட்டை கொட்டகைக்கு கொண்டுபோய்க் கட்டி, வைக்கோலை அள்ளிப் போட்டார்.

ஒற்றை மாடு பூட்டும் வண்டியை ஏற்பாடு செய்து, அதில் சுறுசுறுப்புடன் இருந்த மாட்டை பூட்டிக்கொண்டு கிளம்பினார். இரண்டு மாடுகள் சேர்ந்து சுமக்க வேண்டிய பாரத்தை, அந்த ஒற்றை மாடே சுமக்க வேண்டியதாயிற்று. அதன் வேகம், வாய்ப்பேச்சு எல்லாம் காணாமல் போக, சிரமப்பட்டு வண்டியை இழுத்த படி அன்னநடை போட்டது. தன்னுடைய சக மாட்டோடு கொஞ்சம் அனுசரித்துப் போயிருந்தால், இத்தனை பாரத்தையும் தனியாக சுமக்க வேண்டி வந்திருக்குமா? என தன்னைத்தானே நொந்தபடி வண்டியை இழுக்கத் தொடங்கியது அந்த மாடு.

வை. ரமணி

இதுக்கு பேரு தான் ஓவரா நல்லவனா நடிக்கிறதோ?

ஓவர் சீனு உடம்புக்கு ஆகாது நு சொலுவங்களே அது இது தானா