சென்னையில் 3 இடங்களில் குண்டு வெடிக்கும்

சென்னையில் 3 இடங்களில் குண்டு வெடிக்கும் என செல்போனில் பேசி மிரட்டல் விடுத்த வாலிபரை போலீசார் தேடி வருகிறார்கள்.

சென்னை கோட்டையில் உள்ள முதல்-அமைச்சரின் தனிப்பிரிவு அலுவலகத்துக்கு நேற்று காலை 8.30 மணியளவில் மர்ம போன் ஒன்று வந்தது. அதில் பேசிய வாலிபர், சென்னையில், 3 இடங்களில் குண்டு வைத்துள்ளோம்.

எந்தெந்த இடங்கள் என்று கூற முடியாது. முடிந்தால், கண்டுபிடித்துக் கொள்ளுங்கள் என்று கூறி விட்டு போனை வைத்து விட்டார். இதனால் பரபரப்பு ஏற்பட்டது. கோட்டை போலீசுக்கு இது பற்றி தகவல் தெரிவிக்கப்பட்டது.

திருவான்மியூர் முகவரியில், பிரபாகர் என்ற பெயரில் வாங்கப்பட்ட சிம்கார்டில் இருந்து மிரட்டல் போன் வந்ததை போலீசார் கண்டுபிடித்தனர். உடனடியாக குறிப்பிட்ட முகவரிக்கு விரைந்து சென்ற போலீசார் பிரபாகரை பிடித்தனர். நேற்று இரவு முழுவதும் அவரிடம் விசாரணை நடத்தப்பட்டது.

அப்போது பிரபாகர், இந்த சிம்கார்டை இதற்கு முன்பு நான் பயன்படுத்தி வந்தேன். பின்னர் வேறு ஒருவருக்கு விற்று விட்டேன் என கூறியுள்ளார். பிரபாகரிடமிருந்து சிம் கார்டை வாங்கியது யார்? என்பது தெரியவில்லை.

இது தொடர்பாக அவரிடம் போலீசார் தொடர்ந்து விசாரித்து வருகிறார்கள்.

சென்னையில் சமீப காலமாக போனில் வெடிகுண்டு மிரட்டல் விடுப்பது சர்வ சாதாரணமாகி விட்டது. பள்ளி, கல்லூரிகள், வணிக வளாகங்களுக்கு மிரட்டல் விடுக்கும் ஆசாமிகள், 108 ஆம்புலன்சை கூட விட்டு வைப்பதில்லை. மிரட்டல் விடுப்பவர்களை கண்டு பிடித்து அவர்களிடம் விசாரித்தால், விளையாட்டாக தெரியாமல் பேசி விட்டேன் என்று கூலாக கூறுகிறார்கள்.

எனவே இது போன்ற மிரட்டல் போன் அழைப்புகளை கட்டுப்படுத்த போலீசார் தயவு தாட்சணியம் காட்டாமல் கடுமையான நடவடிக்கைகளை எடுக்க வேண்டும் என்பதே பொதுமக்களின் எதிர்பார்ப்பாக உள்ளது.