புகைவண்டி பயணம்!

புகைவண்டி பயணம்!

ஏழைகளின் ரதமே!
ஏனிந்த பெருமூச்சு?!
ஏதேனும் பிரச்சினையோ?

புகைதனை கக்கியபடி வரும்
தொடர் வண்டியே!
உன் செயல்களை
உன்னில் நிகழ்வனவற்றை
என்
சிந்தனைக் கடலுக்குள் மூழ்கி
முத்தெடுக்க விழைகிறேன்.
சிறக்கட்டும்!

நீ வருகை தரும் காட்சி
அடடா!
கொள்ளை அழகு!

அரங்கதனில்
அழகுப் பெண்ணின்
நடன அரங்கேற்றமதாய்...
நீ அசைந்தாடி வரும் காட்சி
அத்துணை அழகு!

நீ ரெயில் நிலையத்தை
நெருங்குகையில்
நடை பயிலும் காட்சி...
கம்பி மீது நகரும்
கம்பளி பூச்சியதாய்
என்
கற்பனைக்குள் விரிகிறது!

கொண்ட கொள்கைதனில்
உறுதியாய்
தடம் பிறழாமல்
நடை பயின்றால்
இலக்கு எதுவாயினும்
எளிதாய் அடையலாம் எனும்
வாழ்க்கைத் தத்துவத்தை
நீ
உணர்த்தி நிற்கிறாய்!

உன்னில்
நான் பயணிக்கையில்
கண்ட கவின்மிகு காட்சிகள்
இங்கே வரிசையாய்...

என்ன விந்தை!
நீ
முன்னோக்கி நகர்கையில்
மரங்கள்
பின்னோக்கி நகர்கின்றன!

அடடே!
இவ்வுலகில் காண் அனைத்தும்
வெறும் மாயை எனும்
உலகத் தத்துவத்தை
நீ
உணர்த்தி நிற்கிறாய்!

நீ செல்கையில் வழியில்
வறண்ட பகுதிகளும்
வனப்பு மிகு பகுதிகளும்
மலை மேடுகளும்
என்?
பள்ளங்களும் கூட வரும்!

ஓ...
வாழ்க்கை என்றால்
ஆயிரமிருக்கும் அதில்
இன்பமும் துன்பமும்
இணைந்தே இருக்குமெனெ
நீ
எடுத்தியம்புவதாய் உணர்ந்தேன்!

உன்னில் தான்
எத்தனை அறைகள்!
அதில் அனுதினமும்
எத்தனை பேர்
உண்டு உறங்கி ஓய்வெடுத்து
கழித்து கழித்துச் செல்கின்றனர்.
நீ என்ன
நகரும் தங்கும் விடுதியா?!

நீ என்ன அரசியல்வாதியா?
இல்லை...
அமைச்சரா?
நீ வருகையில் வழியில்
சாலையின் இருபக்கமும்
மக்கள்
காத்துக் கிடக்கின்றனரே,,,
நீ கடந்து செல்லும் வரை?!

உன்னில்
பயணம் செய்கையில்
நான்
என் வீட்டில் இருப்பதாய்
எண்ணி மகிழ்ந்தேன்!

வழி நெடுகிலும்
எத்தனை
ஒரு நாள் உறவுகளை
சந்தித்தேன்?
சிந்தித்தேன்.
தெரியவில்லை!

புகை வண்டியே!
உன் பணி
போற்றுதலுக்குரியது!

உன் சேவை
என்றென்றும்
எமக்குத் தேவை!

உன்னில்
மீண்டும் பயணம் செய்யும்
நாளை எதிர் நோக்கி
ஆவலாய்
நான் காத்திருக்கிறேன்!

'தமிழ் நேசன்'
பா.பார்த்தசாரதி,
www.bparthasarathi.yolasite.com

இனிமையான பயணமாய்.... ஏழைகளின் ரதத்தில்.... காட்சிகள் வரிகளில்.... அருமையாய் வாழ்த்துகள்

மிக்க நன்றி!

நன்றியுடன்!
'தமிழ் நேசன்'
பா.பார்த்தசாரதி,