முதலீடுகளில் வாடிக்கையாளர்கள் தான் கவனமாக இருக்க வேண்டும்.

தேக்கு மர வளர்ப்பு ஏமாற்று, ஆடு மற்றும் ஈமு கோழிகள் வளர்ப்பில் மோசடி, எம்.எல். எம்., நிறுவனங்களின் கண்கட்டு வித்தை என, 10 ஆண்டுகளுக்கு மேலாக, இந்தியாவில் மோசடிகள் அதிகரித்து விட்டன. அதே போன்று, ரியல் எஸ்டேட் துறையிலும், மோசடி தலைகாட்ட ஆரம் பித்து விட்டது. தற்போது தங்கத்திலும், நிலத்திலும் தான் முதலீடு அதிகமாக நடக்கிறது. அப்பாவி மற்றும் ஏமாளிகளின் அறியாமையைப் பயன்படுத்தி, ரியல் எஸ்டேட் முதலீட்டிலும் இப்போது மோசடி நடக்கிறது.

சமீபத்தில் அவ்ரம் ரியாலிட்டி மற்றும் எஸ் கியூப் இன்ப்ராஸ்ட்ரக்சர் லிமிடெட் ஆகிய இரண்டு நிறுவனங்கள், 100 கோடி ரூபாய் அளவுக்கு, ரியல் எஸ்டேட்டில் மோசடி செய்ததாகப் பொருளாதாரக் குற்றவியல் பிரிவு (இ.ஓ.டபிள்யு.,) போலீசார் கண்டுபிடித்துள்ளனர். இந்நிறுவனங்கள், தங்களிடம் முதலீடு செய்யும் வாடிக்கையாளர்களுக்கு, ஒரே ஆண்டில் இரண்டு மடங்காக பணத்தைத் திருப்பித் தருவதாக ஆசைகாட்டி மோசம் செய்துள்ளன. வாடிக்கையாளர்களிடம் வாங்கிய பணம் மூலம், ஒரு ஐந்து நட்சத்திர ஓட் டலோ, பிளாட் கட்டடங்களோ கட்டி, அதன் மூலம் இரண்டு மடங்கு திருப்பித் தருவதாக விளக் கம் அளித்துள்ளன.

இதை நம்பி பல்லாயிரக்கணக்கான வாடிக்கையாளர்கள், 35 ஆயிரம் ரூபாயிலிருந்து ஏழு லட்ச ரூபாய் வரை முதலீடு செய்துள்ளனர். மாதத்துக்கு 12லிருந்து 15 சதவீதம் வரை வட்டியும், தருவதாக இவை வாக்களித்துள்ளன. சொன்னபடி முதலில் சில மாதங்களுக்கு வாடிக்கையாளர் கள் வட்டியைப் பெற்றுள்ளனர். ஆனால் மார்ச் மாதத்திலிருந்து அவர்களுக்கு வந்த, 'செக்'குகள் பணம் இல்லாமல் திரும்பி விட்டன. இந்நிறுவனங்கள் பிரபல நடிக, நடிகையர்களைத் தங்கள் முதலீட்டு விளம்பரங்களில் நடிக்கச் செய்கின்றன. நடிகர்களுக்கு இந்நிறுவனங்கள் பற்றிய உண்மை விவரங்கள் தெரிவதில்லை. மேலும் பணத்துக்குப் பதிலாக, நகரின் முக்கிய இடங்களில் பிளாட்டாகத் தருவதாகவும் ஆசைகாட்டியுள்ளன. குலுக்கல் நடத்தி தேர்ந்தெடுக்கப்படும் வாடிக்கையாளர்களுக்கு, பிரபல நடிக, நடிகையர்கள், 'ஹோண்டா சிட்டி கார்' வழங்குவர் என்றும் விளம்பரம் செய்துள்ளன.


இதுகுறித்து இ.ஓ.டபிள்யு., அதிகாரி ஒருவர் கூறுகையில், 'இது போன்ற முதலீடுகளில் வாடிக்கையாளர்கள் தான் கவனமாக இருக்க வேண்டும். முதலீடு செய்த பணம் ஒரே ஆண்டில் இரண்டு மடங்காகத் திருப்பித் தரப்படுவது, எந்தத் தொழிலிலும் நடக்காத ஒன்று. மேலும் இந்நிறுவனங்கள் அறிவித்த, ஒத்தி அல்லது வாடகை உரிமை என்பது, இந்தியச் சட்டப்பிரிவில் இல்லாதது' என்றார்.