நல்லிணக்க ஆணைக்குழு முன்பாக சாட்சியமளிக்க 3 மனித உரிமை அமைப்புகள் மறுப்பு

கற்றுக்கொண்ட பாடங்கள் மற்றும் நல்லிணக்கத்துக்கான ஆணைக்குழு முன்னிலையில் சாட்சியமளிக்குமாறு விடுக்கப்பட்ட அழைப்பை 3 சர்வதேச முன்னணி அமைப்புகள் ஏற்றுக்கொள்ளமாட்டாதென தெரிவித்துள்ளன. மனித உரிமைகள் கண்காணிப்பகம், சர்வதேச நெருக்கடிக்குழு, சர்வதேச மன்னிப்புச்சபை ஆகிய மூன்று அமைப்புகளும் கூட்டாக இலங்கையின் நல்லிணக்க ஆணைக்குழுவுக்கு எழுதிய கடிதத்தில் அழைப்பை ஏற்றுக்கொள்ளவில்லையென தெரிவிக்கப்பட்டுள்ளது. இக்கடிதம் நேற்று முன்தினம் புதன்கிழமை வெளியிடப்பட்டுள்ளது.

மேலும், போர்க் குற்றங்கள் தொடர்பான முன்னேற்றகரமான பதிலளிக்கும் கடப்பாட்டுக்கான ஆற்றலைக் குறைந்தளவிலேயே இந்த ஆணைக்குழு கொண்டிருப்பதாக கடிதத்தில் தெரிவிக்கப்பட்டிருக்கிறது. இலங்கையில் அரசியல் நல்லிணக்கம், பொறுப்புக்கூறும் தன்மை என்பவற்றை முன்னெடுப்பதற்கான உண்மையானதும் நம்பகரமானதுமான முயற்சிகளை மேற்கொள்ளும் போது ஆணைக்குழு முன் தோன்றுவதற்கான வாய்ப்பு கிடைப்பதை வரவேற்பதாகவும் ஆனால், ஆணைக்குழுவானது சர்வதேச தரத்தின் ஆகக்குறைந்தளவு மட்டத்தைக்கூட நிறைவேற்றுவதாக இல்லையெனவும் அந்த மூன்று அமைப்புகளும் குறிப்பிட்டுள்ளன.

போதியளவு அதிகாரமின்றியும் சுயாதீனமாக செயற்படும் தன்மை பற்றாக்குறையாகவும் முன்னேற்றகரமான பதிலளிக்கும் கடப்பாட்டின் நம்பகத்தன்மையை சிறியளவில் கொண்டுள்ளதாகவும் ஆணைக்குழு காணப்படுவதாக இந்த மூன்று அமைப்புகளும் தமது கடித்தில் குறிப்பிட்டுள்ளன.

அரசாங்கத்திற்கும் விடுதலைப்புலிகளுக்குமிடையில் முடிவடைந்த 2002 யுத்த நிறுத்தத்தை மையப்படுத்தியதாக ஆணைக்குழுவுக்கு வழங்கப்பட்ட ஆணை காணப்படுகிறது. மோதலின்போது இழைக்கப்பட்டதாகக் குற்றஞ்சாட்டப்படும் போர்க் குற்றங்கள் தொடர்பாக விசாரணை செய்வதற்கான தேவையை வெளிப்படுத்துவதாகவோ அல்லது விசாரணை செய்வதில் இந்த மாதிரியான குற்றச்சாட்டுகளை விசாரணை செய்வதற்கான ஆர்வத்தை வெளிப்படுத்தும் தன்மையைக் கொண்டதாகவோ காணப்படவில்லையென தெரிவிக்கப்பட்டுள்ளது.

ஆணைக்குழுவானது சுயாதீனத்தன்மையை குறைந்தளவில் கொண்டதாகக் காணப்படுகிறது. அதன் உறுப்பினர்களாக சிரேஷ்ட அரசாங்க அதிகாரிகளாக இருந்தவர்கள் உள்ளடக்கப்பட்டுள்ளதோடு, அரசின் போர்க்கால செயற்பாட்டை வெளிப்படையாக நியாயப்படுத்திப் பேசியவர்களும் உள்ளடக்கப்பட்டுள்ளனர். ஆணைக்குழு முன் சாட்சியமளிக்க விரும்பும் சாட்சிகளைப் பாதுகாப்பதற்கான ஏற்பாடுகளும் இல்லாத தன்மை காணப்படுவதாக இந்த அமைப்புகள் தமது கடிதத்தில் குறிப்பிட்டுள்ளன.