முதல் நாள் வேலையா... பதற்றம் எதற்கு?

முதன் முதலாக வேலைக்குப் போகும் ஆண், அல்லது பெண்ணா நீங்கள் அப்படியானால் உங்களிடம் ஓர் இனம் புரியாத பதற்றம் இருக்கும்.

நாம் பணி செய்யப்போகும் இடத்தில் இதர ஊழியர்கள் எப்படி இருப்பார்கள்? எப்படி நம்மிடம் பழகுவார்கள்? நாம் செய்ய வேண்டிய வேலை என்னவாக இருக்கும்? எளிமையாக இருக்குமா? அல்லது கஷ்டமானதாக இருக்குமா? முதலாளி அல்லது மேலதிகாரிகள் எதிர்பார்க்கும் அளவுக்கு நமது செயல்பாடு இருக்குமா? என்று பலவிதமான கேள்விகள் நம் மனத்தில் எழும்.

முதல் நாள் வேலைக்குச் செல்வோருக்கு இதோ சில டிப்ஸ்...

காலையில் சீக்கிரம் எழுந்திருக்க முதல்நாள் இரவு சீக்கிரமே தூங்கப் போய் விடுங்கள். மறக்காமல் கடிகாரம் அல்லது போனில் அலாரம் வைத்துவிடுங்கள். வழக்கமாக நாம்தான் காலையில் சீக்கிரம் எழுந்து விடுவோமே என்று அசட்டையாக இருந்துவிடாதீர்கள்.

முதல் நாள் வேலைக்கு போவதால் நல்ல டிரஸ் போட்டுக் கொண்டு போனால்தான் எடுப்பாக இருக்கும். எனவே ஆபிஸூக்கு என்ன டிரஸ் போட்டுக் கொள்வது என்பதை முன்கூட்டியே தீர்மானித்து அதை "அயர்ன்" செய்து தயாராக வைத்துவிடுங்கள். அதேபோல ஷூக்களுக்குப் பாலிஷ் செய்து வைத்துவிடுங்கள்.

வாகனத்தில் செல்பவராக இருந்தால் வண்டி "Starting Trouble" இல்லாமல் நல்ல நிலையில் இருக்கிறதா, பெட்ரோல் போதுமான அளவு உள்ளதா என்பதை முதல்நாளே உறுதிசெய்து கொள்ளுங்கள்.

இப்படி முன்கூட்டியே சில வேலைகளைச் செய்தால் ஆபீஸ் கிளம்பும் போது பதற்றம் இல்லாமல் இருக்கலாம்.

வேலைக்குச் செல்லவேண்டிய தினத்தன்று காலையில் சீக்கிரம் எழுந்து பல்துலக்கி, சூடாக ஒரு காபி சாப்பிடுங்கள். பின் காலைக் கடன்களை முடித்துவிட்டுக் குளிர்ந்த நீரில் குளியுங்கள். அது உங்கள் மனதுக்கும், உடலுக்கும் புத்துணர்ச்சியை ஏற்படுத்தும்.

அடுத்து உங்கள் வீட்டில் வாங்கும் செய்தித்தாளை ஒரு நோட்டம் விடுங்கள். அதில் உள்ள முக்கியச் செய்திகளை மனதில் பதிவு செய்துகொள்ளுங்கள். இது உங்களுக்குப் பயனாக இருப்பதுடன் தேவையற்ற குழப்பம், பதற்றத்தைக் குறைக்க உதவும்.

எல்லாவற்றையும் செய்துவிட்டு ஆபீஸ் கிளம்பத் தயாரானால் கூட மனதில் ஒருவித பயம் இருக்கும். முதல்நாள் வேலைக்குச் செல்கிறோம். அலுவலகத்தில் சூழ்நிலை எப்படி இருக்குமோ? என்ற நினைப்பு இருந்துகொண்டே இருக்கும். எந்தவிதப் பதற்றத்துக்கும் இடம்தராமல் மனதை அமைதியாக வைத்துக் கொள்ளுங்கள்.

கொஞ்ச நேரம் ரேடியோவில் உங்களுக்குப் பிடித்த பாட்டைக் கேளுங்கள். அல்லது டி.வியில் உங்களுக்குப் பிடித்த சேனலை போட்டுப் பாருங்கள். மனம் அமைதி அடையும்.

சரி... குளித்து, டிரஸ் பண்ணிக் கொண்டு அலுவலகத்திற்கு ரெடியாகி விட்டீர்களா? வழக்கம்போல் காலை உணவைச் சாப்பிடுங்கள்.

அலுவலகத்துக்குக் குறிப்பிட்ட நேரத்துக்கு சில நிமிடங்கள் முன்னதாகவே சென்றுவிடுங்கள். இதன் மூலம் நீங்கள் நம்பிக்கைக்குரியவர், நேரம் தவறாதவர் என்ற எண்ணம் உங்கள் மேலதிகாரிக்கு ஏற்படும்.

அலுவலகம் சென்றதும் இதற ஊழியர்களிடம் நீங்களே உங்களை அறிமுகப்படுத்திக் கொள்ளுங்கள். நீங்கள் புதியவர் என்பதால் மற்றவர்கள் உங்களை மகிழ்ச்சியுடன் கைகுலுக்கி வரவேற்பார்கள். எனவே அனாவசிய பதற்றம் வேண்டாம். யாரிடம் எப்படிப் பேசவேண்டும், எப்படிப் பழக வேண்டும் என்பது போகப்போக உங்களுக்கே தெரிந்துவிடும்.

முதல் நாள் வேலை என்பது சிலருக்கு எளிதாகவும், சிலருக்கு கஷ்டமானதாகவும் இருக்கலாம். அதற்காக கவலைப்படாதீர்கள். கொடுத்த வேலையை நிதானமாக அதே சமயத்தில் அனாவசியக் காலதாமதம் இல்லாமல் செய்யுங்கள். உஙகள் மீது உள்ள முழு நம்பிக்கையுடனும், தைரியத்துடனும் வேலைகளை எதிர்கொள்ளுங்கள்.

வெற்றி உங்களுக்கே!