தமிழகம்: 700 பேருக்கு பன்றிக்காய்ச்சல்:10 பேர் பலி

தமிழ்நாட்டில் சமீப காலமாக பன்றி காய்ச்சல் நோயால் பாதிக்கப்படுவோரின் எண்ணிக்கை அதிகரித்துள்ளது. இதுவரை தமிழ்நாட்டில் பன்றிக்காய்ச்சலுக்கு 10 பேர் பலியாகி உள்ளனர்.

கடந்த சில தினங்களில் கோவை பாங்கி அதிகாரி சண்முகம், சென்னை தலைமைச் செயலக அதிகாரி மோகன வேல், வேலூரில் படித்த நெல்லை என்ஜினீயர் மாணவர் சரவணன் என 3 பேர் பலியானார்கள்.

நேற்று சென்னை திருவேற்காடு தேவி நகரைச் சேர்ந்த குப்பம்மாள் என்ற பெண் சென்னை அரசு பொது மருத்துவமனையில் மரணம் அடைந்தார். இப்போது மேலும் 2 பேர் பன்றிக்காய்ச்சலுக்கு பலியாகி உள்ளனர்.

கோவையை அடுத்த அன்னூர் அருகேயுள்ள நல்லிசெட்டிபாளையத்தைச் சேர்ந்தவர் பொன்னுச்சாமி (48). பருத்தி, பஞ்சு வியாபாரம் செய்து வந்தார்.

கடந்த 15 நாட்களுக்கு முன் பொன்னுச்சாமி காய்ச்சலால் அவதிப்பட்டார். உடனடியாக அன்னூரில் உள்ள தனியார் ஆஸ்பத்திரிக்கு சென்று சிகிச்சை பெற்றார். அவர் பன்றிக்காய்சலால் பாதிக்கப்பட்டிருப்பது தெரிய வந்தது.

டாக்டர்கள் அறிவுரைப்படி நேற்று மதியம் பொன்னுச்சாமி கோவை அரசு ஆஸ்பத்திரியில் சேர்க்கப்பட்டார். அங்கு தீவிர சிகிச்சை அளிக்கப்பட்டது. எனினும் சிகிச்சை பலனின்றி நள்ளிரவு பரிதாபமாக இறந்தார்.

தமிழ்நாடு முழுவதும் கடந்த 9 மாதங்களில் 4 ஆயிரத்து 308 பேர் பன்றிக் காய்ச்சல் அறிகுறியுடன் ஆஸ்பத்திரியில் அனுமதிக்கப்பட்டனர். இவர்களில் 700 பேருக்கு பன்றிக்காய்ச்சல் உறுதியானது. இவர்கள் தனிப்பிரிவுகளில் இருந்து தீவிர சிகிச்சை பெறுகிறார்கள்.

சென்னை, கோவை, வேலூர், கன்னியாகுமரியில் பன்றிகாய்ச்சல் பாதிப்பு அதிகம் உள்ளது. சென்னை கிண்டி கிங் ஆய்வு மையத்தில் 4 நாட்களில் 1,400 பேர் தடுப்பு மருந்து மற்றும் தடுப்பு ஊசி போட்டுள்ளனர்.

இருமல் சளியுடன் வைரஸ் காய்ச்சல், தொண்டைவலி, தலைவலி, உடல்வலி, சோர்வு ஆகியவை பன்றிக் காய்ச்சலின் அறிகுறிகளாகும். இவை ஏதேனும் இருந்தால் சென்னை அரசு பொது மருத்துவமனை, கோவை, திருநெல்வேலி அரசு மருத்துவக்கல்லூரி மருத்துவ மனைகளில் இலவசமாக பன்றிக்காய்ச்சல் பரிசோதனை செய்து கொள்ளலாம்.

குடும்பத்தில் ஏற்கனவே யாராவது பன்றி காய்ச்சல் அறிகுறிகளால் பாதிக்கப்பட்டிருந்தால் மற்றவர்களும் தடுப்பூசி போட்டுக் கொள்வது நல்லது என்று டாக்டர்கள் தெரிவித்துள்ளனர்.