மலேசியா: (இசா) இதுவரை 38 சிறார்கள் உட்பட 438 பேர் கைது

* கைதிகளில் 37 பேர் பெண்கள்
* நஜிப்: போலீசார் தீர்மானிக்கட்டும்

இன்று மாநகர் மையத்தில் நடைபெற்ற உள்நாட்டுப் பாதுகாப்புச் சட்ட (இசா) எதிர்ப்புப் பேரணி மீது போலீசார் மேற்கொண்ட மாபெரும் நடவடிக்கையின் ஒரு பகுதியாக மொத்தம் 438 பேர் கைது செய்யப்பட்டார்.

கைது செய்யப்பட்டவர்களில் 435 பேர் மலாய்க்காரர்கள், அதே வேளை 37 பேர் பெண்கள் என கோலாலம்பூர் போலீஸ் தலைமை அதிகாரி முகமட் சப்து ஒஸ்மான் மலேசியாகினியிடம் தெரிவித்தார்.

மேலும் 38 பேர் 18 வயதுக்கும் குறைவான சிறார்களாவர்.

இன்று காலை முன்னேரம் ஏழு மணிவாக்கில் தொடங்கிய கைது நடவடிக்கை, “சட்டவிரோத நடவடிக்கைகளைத்” தடுப்பதற்கு குற்றவியல் சட்டத்தின் பிரிவு 105ன் கீழ், மேற்கொள்ளப்பட்டதாக அவர் கூறினார்.

அவர்களில் பெரும்பாலோர் விசாரிக்கப்படுவதற்காக செராஸ் போலீஸ் நிலையத்துக்குக் கொண்டு செல்லப்பட்டனர். அந்த கைதிகளைச் சந்திப்பதற்கு வழக்குரைஞர்களுக்கு அனுமதி மறுக்கப்பட்டுள்ளதாகவும் கூறப்படுகிறது.

பிகேஆர் நடைமுறைத் தலைவர் அன்வார் இப்ராகிம், பாஸ் தலைவர் அப்துல் ஹாடி அவாங், ஜசெக தலைவர் லிம் கிட் சியாங், இசா ஒழிப்பு இயக்கத்தின்(GMI) தலைவர் சையட் இப்ராகிம் சைய்ட் நோ ஆகியோர் உட்பட மேலும் 11 பேரையும் போலீசார் விசாரிப்பதாக முகமட் சப்து கூறினார்.

அதோடு பாஸ் தலைமைச் செயலாளர் முஸ்தபா அலி, பாஸ் உதவித் தலைவர் மாஃபுஸ் ஒமார், பத்து நாடாளுமன்றச் செயலாளர் தியன் சுவா (பிகேஆர்) மாச்சாங் நாடாளுமன்றச் செயலாளர் சைஃபுடின் நசுதியோன், பாஸ் மத்திய செயலவை உறுப்பினர் முகமட் சாபு ஆகியோரும் விசாரிக்கப்படவிருக்கின்றனர்.

சர்ச்சைக்குரிய பாதுகாப்புச் சட்டத்தை அகற்றும்படி அரசாங்கத்தை கோரி, 20ஆயிரத்துக்கும் மேற்பட்ட மக்கள் தெருக்களில் கூடி மாபெரும் பேரணியை நடத்தினர். அவர்களை நோக்கி போலீசார் கண்ணீர் புகைக் குண்டுகளைப் பயன்படுத்தி நீர்க் குழாய்களால் நீரைப் பீய்ச்சி அடித்தனர்.

நஜிப்: நாம் போலீசாரிடம் விட்டு விடுகிறோம்

இதனிடையே, கைது செய்யப்பட்டவர்கள் இன்று மாலை கட்டம் கட்டமாக விடுதலை செய்யப்பட்டதாக வழக்குரைஞர் லத்திஃபா கோயா கூறினார். இருப்பினும் 40 பேர் மட்டும் புக்கிட் ஜாலில் போலீஸ் நிலையத்தில் இன்னும் தடுத்து வைக்கப்பட்டுள்ளனர் என்றாரவர்.

இரண்டு பஸ் நிறைய கொண்டு செல்லப்பட்ட கைதிகள், ஸ்ரீ பெட்டாலிங்கிலும் மற்றும் சோகோ விற்பனைத் தொகுதியிலும் விடுவிக்கப்பட்டதாக சிலாங்கூர் ஆட்சிக் குழு உறுப்பினர் எலிசபெத் வோங் கூறினார்.

மேலும் கைது செய்யப்பட்டவர்களில் ஒருவரான, சுபாங் நாடாளுமன்ற உறுப்பினர் ஆர். சிவராசா, இன்னும் விடுவிக்கப்படவில்லை என்றாரவர். அவருக்கு மருந்து வழங்கப்படுவதற்குப் போலீசார் மறுத்துள்ளதாயும் அவர் வருத்தத்துடன் குறிப்பிட்டார்.

மற்றொரு நிகழ்வில், கைது செய்யப்பட்டவர்கள், விளைவுகளை எதிர்நோக்க வேண்டும் என்று பிரதமர் நஜிப் அப்துல் ரசாக் கூறியுள்ளார்.

“அவர்களுக்கு நாங்கள் ஆலோசனை கூற விரும்பினோம். ஆனால் அதனை கேட்பதற்கு அவர்கள் மறுத்து விட்டனர். என்னால் என்ன செய்ய முடியும்? முடிவு செய்வது போலீசாரைப் பொறுத்தது.” இவ்வாறு நஜிப் கூறியுள்ளதாக ஸ்டார் ஒன் லைன் தெரிவித்தது.

பல முக்கிய சாலைகள் போலீசாரால் முற்றாக மூடப்பட்டது.