மாணவிகளிடம் பாலியல் தொல்லை உடற் கல்வி ஆசிரியர் கைது!

மாணவிகளிடம் பாலியல் தொல்லை உடற் கல்வி ஆசிரியர் கைது!
திங்கள், 23 ஆகஸ்டு 2010 15:35 சின்னமுத்து Tamil Nadu
திருநெல்வேலி மாவட்டம் பொட்டல்புதூர் அருகே உள்ள திருமலையப்ப புரம் என்னும் ஊரில் திரு கைலாசம் நினைவு உயர்நிலைப் பள்ளியில் உடற்கல்வி ஆசிரியராக வேலை பார்த்து வருபவர் அரங்கநாதன். அரங்க நாதன் அந்த பள்ளியில் படிக்கும் சுபா ( பெயர் மாற்றப் பட்டுள்ளது ) என்ற 10 வது வகுப்பு படிக்கும் மாணவியிடம் உடற்கல்வி பயிற்சி தருவதாகக் கூறி தன் அறையில் வைத்து சில்மிஷம் செய்துள்ளார்.



மாணவி சுபா அரங்கநாதனின் அத்துமீறலுக்கு இணங்க மறுக்கவே இதை வெளியில் சொன்னால் சக ஆசிரியர்களிடம் சொல்லி மதிப்பெண்ணை குறைத்து விடுவேன் என்று மிரட்டியுள்ளார். அதன் காரணமாக மாணவி சுபாவும் அரங்கநாதனின் அத்துமீறலை யாரிடமும் சொல்ல வில்லை.

இதை தனக்கு சாதகமாக பயன்படுத்திக் கொண்ட அரங்கநாதன் மாணவி சுபாவுக்கு தினம்தோறும் தொல்லை கொடுக்கவே மாணவி சுபாவுக்கு மனநிலை பாதிப்பு ஏற்பட்டு பள்ளிக்கு செல்லாமல் இருந்துள்ளார். மாணவியின் பெற்றோர் மாணவி சுபாவை திருநெல்வேலியில் உள்ள மனநல மருத்துவரிடம் சென்று காட்டவே மருத்துவரிடம் உண்மையை கூறியுள்ளார் மாணவி சுபா.

மருத்துவர் பெற்றோரிடம் நடந்ததை சொல்ல ஆத்திரமும் அதிர்ச்சியும் அடைந்த பெற்றோர்கள் பள்ளியின் தலைமை ஆசிரியர் ஜெயபால சுப்ரமணியனின் கவனத்துக்கு கொண்டு செல்ல தலைமை ஆசிரியரோ, அரங்கநாதனுக்கு சாதகமாக பேசி நடவடிக்கை எடுக்காமல் விட்டுள்ளார்.

பள்ளி நிர்வாகம் நடவடிக்கை எடுக்காததை கண்டித்து மாணவியின் பெற்றோர் நெல்லை சரக காவல்துறை கண்காணிப்பாளர் ஆஸ்ரா கார்க்கிடம் புகார் செய்யவே, இது குறித்து நடவடிக்கை எடுக்குமாறு அம்பை துணை கண்காணிப்பாளருக்கு உத்தரவிட்டார். இதை அடுத்து கடையம் காவல்துறையினர் வழக்குப் பதிவு செய்து அரங்கநாதனை கைது செய்தனர்.

மாணவியின் பெற்றோர் அளித்த புகாரின் பேரில் எந்த நடவடிக்கையும் எடுக்காத பள்ளித் தலைமை ஆசிரியர் ஜெயபால சுப்ரமணியனையும் காவல் துறை வலைவீசி தேடி வருகிறது. சில்மிஷ பேர்வழி அரங்கநாதன், பள்ளித் தலைமை ஆசிரியர் ஜெயபால சுப்ரமணியனுக்கு நெருங்கிய உறவினர் என்பது குறிப்பிடத் தக்கது. அரங்கநாதனின் தந்தை மாதவன் அந்த பள்ளியில் பணி புரிந்து ஓய்வு பெற்ற முன்னாள் ஆசிரியர்.