ஆப்கானில் அமெரிக்கத் துருப்புகளின் தாக்குதலில் 3 அப்பாவிகள் பலி

ஆப்கானில் அமெரிக்கத் துருப்புகளின் தாக்குதலில் 3 அப்பாவிகள் பலி

ஆப்கானின் மேற்குப் பிராந்தியமான ஃபராஹ்வில் அமெரிக்கத் துருப்புக்களின் தலைமையில் இடம்பெற்ற தாக்குதலில் ஒரு பெண், இரண்டு குழந்தைகள் கொல்லப்பட்டுள்ளனர்.

நேட்டோவின் சர்வதேசப் பாதுகாப்பு உதவிப்படை சனிக்கிழமை (21.08.2010) வெளியிட்டுள்ள அறிக்கையில், வெள்ளிக்கிழமை இடம்பெற்ற மேற்படி அசம்பாவித நிகழ்வு தற்செயலானது என்று தெரிவித்துள்ளது. அமெரிக்க உபதளபதி ரஃபேல் டொரஸ், நேற்று இடம்பெற்ற இந்த அசம்பாவிதத்திற்குத் தமது ஆழ்ந்த அனுதாபத்தைத் தெரிவித்துக் கொள்வதாகவும், மேற்படி சம்பவம் தொடர்பான விசாரணைகள் மேற்கொள்ளப்பட்டு வருவதாகவும் குறிப்பிட்டிருந்தார்.

இச்சம்பவம் குறித்து, நேசநாட்டு வான்படைக்கும் கிளர்ச்சியாளர்களுக்கும் இடையிலான மோதலில் எதிர்பாராதவிதமாக ஓர்ஆப்கான் பெண்மணியும் இரண்டு குழந்தைகளும் கொல்லப்பட்டுள்ளனர் என ஏ.எஃப்.பி. செய்தி வெளியிட்டுள்ளது.

தமது படையினருள் ஆறுபேர் கொல்லப்பட்டுள்ளனர் என்றும் அனேக இராணுவ வீரர்கள் தாலிபானோடு தொடர்புடைய போராளிகளால் பணயக் கைதிகளாக்கப்பட்டுள்ளனர் என்றும் நேட்டோ தெரிவித்துள்ளது.

இந்நிலையில், ஆப்கானில் வெளிநாட்டுப் படையினர் கொண்டுவந்து குவிக்கப்பட்டுள்ளமை குறித்தும், தொடர்ச்சியாக ஆப்கானிய அப்பாவிப் பொதுமக்கள் அநியாயமாகக் கொல்லப்பட்டும் படுகாயமடைந்தும் வருவதற்கு எதிர்ப்புத் தெரிவித்தும் பரவலான எதிர்ப்புகள் கிளம்பியுள்ளன. அனேக இடங்களில் எதிர்ப்பு ஆர்ப்பாட்டங்கள் முன்னெடுக்கப்பட்டு வருகின்றன.

இந்த வருடத்தில் மாத்திரம் ஆப்கான் பொதுமக்களில் சுமார் 1,300 பேர் கொல்லப்பட்டுள்ளனர் என்றும் அதில் பெரும்பாலானவற்றுக்கு வெளிநாட்டுத் துருப்பினரே பொறுப்பேற்க வேண்டும் என்றும் ஐ.நா. குறிப்பிட்டுள்ளமை கவனிக்கத்தக்கது.

2010 ஆம் ஆண்டின் முதல் ஆறு மாதங்களில் இடம்பெற்ற உயிரிழப்புக்களில் 31% பொதுமக்கள் தரப்பில் ஏற்பட்டுள்ளன என்றும் , அவற்றுள் 55 % குழந்தைகள் தரப்பில் ஏற்பட்ட உயிரிழப்புகளாகும் என்றும் ஐ.நா. வின் கணக்கெடுப்பு தெரிவிக்கின்றது.

அப்பாவிகளைக்கொள்வதே இவர்களின் வேலையாப்போச்சி இந்த வெறிநாய்களுக்கு எல்லாத்துக்கும் ஒருநாள் முடிவு உள்ளது