புலி, சிறுத்தை நடமாட்டம் கண்காணிக்க புதிய அமைப்பு: வனத்துறை ஏற்பாடு

உடுமலை : புலி மற்றும் சிறுத்தை நடமாட்டத்தை கண்காணிக்க காலடி தடங்களை
பதிவு செய்யும், "டைகர் இம்ப்ரஷன் பேடு' என்ற புதிய அமைப்பு 130 இடங்களில்
அமைக்கப்பட்டுள்ளது.
ஆனைமலை புலிகள் காப்பகத்துக்கு உட்பட்ட உடுமலை, அமராவதி வனச்சரக
பகுதிகளில் வன விலங்குகள் அதிகளவு உள்ளன. மாமிச உண்ணிகளுக்கு தேவையான
மான்கள் ஆயிரக்கணக்கில் உள்ளதால் இப்பகுதிகளில் புலி மற்றும் சிறுத்தை
நடமாட்டம் அதிகளவு காணப்படுகிறது. பெரும்பாலும், மாலை மற்றும் இரவு
நேரங்களில் மட்டுமே இவை வெளி வருகின்றன.
இவற்றை கண்காணிக்கவும், எண்ணிக்கையை அளவிடவும் வனப் பகுதிகளில்
காலடித் தடங்களை பதிவு செய்யும் அமைப்பு (டைகர் இம்ப்ரஷன் பேடு)
ஏற்படுத்தப் பட்டுள்ளது. இதற்காக, வன விலங்குகள் அதிகம் பயன்படுத்தும்
வழித்தடங்கள் தேர்வு செய்யப் பட்டுள்ளன. உணவு மற்றும் குடிநீர் தேவைக்கு
அதிகம் வந்து செல்லும் பாதைகளில் இவை அமைக்கப் பட்டுள்ளன. 3 மீட்டர்
அகலம், 3 மீட்டர் நீளத்தில் குழி வெட்டப் படுகிறது. பின், மணல் மற்றும்
மண்ணால் குழி மூடப்பட்டு, தரை மட்டத்துக்கு அமைக்கப்படுகிறது.
மெலிதான அழுத்தம் கூட பதியும் வகையில் இவை அமைக்கப் படுவதால்,
வழியில் இதை கடக்கும் புலி மற்றும் சிறுத்தையின் காலடி தடம் எளிதில்
பதிவாகி விடும். உடுமலை வனச்சரக பகுதியில் 80 இடங்களிலும், அமராவதி
வனச்சரக பகுதியில் 50 இடங்களிலும் அமைக்கப்பட்டுள்ளன.தினமும் பகல்
நேரத்தில் வனத்துறை ஊழியர்களும், வேட்டை தடுப்பு காவலர்களும் ஆய்வு
செய்கின்றனர்.
வனத்துறையினர் கூறுகையில், "புலி மற்றும் சிறுத்தை கடக்கும்
முக்கிய வழித்தடங்கள் தேர்வு செய்து, உடுமலை, அமராவதி வனச்சரக பகுதியில்
130 இடங்களில், "டைகர் இம்ப்ரஷன் பேடு' அமைக்கப்பட்டுள்ளது. இதன் மூலம்,
புலி மற்றும் சிறுத்தை நடமாட்டம் கண்காணிக் கப்படு வதோடு,
வனப்பகுதியிலுள்ள இவற்றின் எண்ணிக்கை, வயது, உருவ அளவு கணக்கிட முடியும்'
என்றனர்.

நல்லது . கொஞ்சம் புலிகளுக்கு பாதுகாப்பும் கொடுங்க