தேக்குமரம் வெட்ட அனுமதி லஞ்சம் கேட்ட ரேஞ்சர் கைது

கோவை: சொந்த தோட்டத்தில் தேக்கு மரம் வெட்ட அனுமதி கேட்ட விவசாயிடம், 50
ஆயிரம் ரூபாய் லஞ்சம் கேட்ட வனத்துறை ரேஞ்சரை, லஞ்ச ஒழிப்புப் பிரிவு
போலீசார் கைது செய்தனர். சமீபகாலமாக அரசு உயர் அதிகாரிகளை பொறிவைத்து
பிடித்து, அரசு ஊழியர்களிடையே கிலியை லஞ்ச ஒழிப்பு மற்றும் ஊழல் தடுப்பு
பிரிவினர் ஏற்படுத்தி வருகின்றனர். சமீபத்தில், பொள்ளாச்சி ஓட்டல் ஒன்றின்
பார் உரிமையை புதுப்பிக்க 20 ஆயிரம் ரூபாய் லஞ்சம் பெற்றபோது, மாவட்ட
கலால் பிரிவு அதிகாரி மூர்த்தி கைது செய்யப்பட்டார். நேற்று, விவசாயிடம்
50 ஆயிரம் ரூபாய் லஞ்சம் கேட்டு பெற்றபோது, கோவை ரேஞ்சர் செல்வையா
விஜயகுமாரை அதிரடியாக கைது செய்தனர். ஆலாந்துறை அருகேயுள்ள
மத்வராயபுரத்தைச் சேர்ந்தவர் ஆறுச்சாமி(45); விவசாயி. இவருக்கு சொந்தமான
தோட்டத்தில் அதிகளவு தேக்குமரங்கள் உள்ளன. சில மரங்களை வெட்ட முடிவு
செய்தவர், போளுவாம்பட்டி வனச்சரக அலுவலகத்தில் அனுமதி கேட்டு
விண்ணப்பித்தார். பரிசீலித்த ரேஞ்சர் செல்வையா விஜயகுமார், மரம் வெட்ட
அனுமதி தர 50 ஆயிரம் ரூபாய் லஞ்சம் கேட்டார். இருவரிடையே நடந்த நீண்ட
பேச்சில், 20 ஆயிரம் ரூபாய் பேசி முடித்தனர். சில மரங்களை வெட்டிய
நிலையில், மற்ற மரங்களையும் வெட்ட முடிவெடுத்தபோது, மேலும் 30 ஆயிரம்
ரூபாய் கேட்டு ரேஞ்சர் வற்புறுத்தியுள்ளார். இதுபற்றி கோவை மாவட்ட லஞ்ச
ஒழிப்பு மற்றும் ஊழல் தடுப்புப் பிரிவில் புகார் செய்தார். அதிகாரிகள்
ஆலோசனையின்படி, நேற்று காலை கணபதி, போலீஸ் குடியிருப்பில் உள்ள ரேஞ்சர்
செல்வையா விஜயகுமாரின் வீட்டுக்கு, அவர் கேட்ட 30 ஆயிரம் ரூபாயுடன்
சென்றார். கேட்ட பணத்தை கொண்டு வந்திருப்பதாகக் கூறிய விவசாயி, ரேஞ்சரிடம்
பணம் கொடுத்தார். மறைந்திருந்த லஞ்ச ஒழிப்புத்துறை கூடுதல் துணை கமிஷனர்
சண்முகப்பிரியா குழுவினர், ரேஞ்சரை கைது செய்து, பணத்தை பறிமுதல்
செய்தனர். தொடர்ந்து, போலீஸ் அதிகாரிகள் ரேஞ்சரின் வீட்டில் தீவிர சோதனை
மேற்கொண்டனர். இதில் ஒரு சில ஆவணங்கள் கைப்பற்றப்பட்டன. மாவட்ட தலைமை
குற்றவியல் நீதிமன்றத்தில் ஆஜர்படுத்தப்பட்ட ரேஞ்சர் செல்வையா விஜயகுமார்,
15 நாள் நீதிமன்ற காவலுக்காக மத்திய சிறையில் அடைக்கப்பட்டார்.

காசுக்காக எதையும் செய்றவனுங்க இருக்குற வரை இந்த நாடு முன்னேறாது