தேசியக் கொடி ஏற்றாததால் புறக்கணிப்பு; தலைமை ஆசிரியர் மீது நடவடிக்கை பாயுமா?

திருவண்ணாமலை: வந்தவாசி அருகே அத்திப்பாக்கம் கிராமத்தில் சுதந்திர
தினத்தன்று தேசியக் கொடி ஏற்றாத சம்பவம் பெரும் சர்ச்சையை
ஏற்படுத்தியுள்ளது. மாணவர்கள் வகுப்பு புறக்கணிப்புப் போராட்டம்
நடத்தினர். வந்தவாசி அடுத்த அத்திப்பாக்கம் கிராமத்தில் 1927ம் ஆண்டு
அரசு ஆரம்பப் பள்ளி துவக்கப்பட்டது. இப்பள்ளி 2004ம் ஆண்டு நடுநிலைப்
பள்ளியாக தரம் உயர்த்தப்பட்டது. பள்ளியில் தலைமை ஆசிரியர் உள்ளிட்ட ஆறு
பேர் பணிபுரிந்து வருகின்றனர். பழைய பள்ளி கட்டடத்தில் போதிய இட வசதி
இல்லாததால் ஒரு கி.மீ., தூரத்தில் புதிய பள்ளி கட்டடம்
கட்டப்பட்டது.புதிய கட்டடத்தில் ஆறாம் வகுப்பு முதல் எட்டாம் வகுப்புகள்
வரை செயல்பட்டு வந்தன. இதில், மூன்று ஆசிரியர்கள் பணிபுரிந்து
வருகின்றனர். பழைய கட்டடத்தில் ஒன்றாம் வகுப்பு முதல் ஐந்தாம் வகுப்பு
வரை செயல்பட்டு வருகின்றன. இந்த பள்ளி கட்டடத்தில் மூன்று ஆசிரியர்கள்
பணியாற்றி வருகின்றனர். மேலும் இப்பள்ளி கட்டடம் ஆதிதிராவிடர் வசிக்கும்
குடியிருப்பு பகுதியில் உள்ளது. கடந்த ஆண்டு வரை சுதந்திர தினத்தன்று
இப்பள்ளியில் பணியாற்றி வந்த தலைமை ஆசிரியர்கள் முதலில் புதிய பள்ளி
கட்டடத்தில் தேசியக் கொடி ஏற்றிவிட்டு பின், பழைய பள்ளி கட்டடத்தில்
தேசியக் கொடியை ஏற்றுவர். இதை அப்பகுதி மக்களும் வரவேற்றனர்.தற்போது,
புதியதாக புவனேஸ்வரி என்ற தலைமை ஆசிரியர் பொறுப்பேற்றுள்ளார். இவர் புதிய
பள்ளி கட்டடத்தில் மட்டும் சுதந்திர தினத்தன்று தேசியக் கொடி ஏற்றிவிட்டு,
பழைய பள்ளி கட்டடத்தில் தேசியக் கொடியை ஏற்றாமல் விட்டுவிட்டார். பழைய
பள்ளி கட்டடத்தில் காத்திருந்த மாணவர்கள் ஏமாற்றத்துடன் வீடு திரும்பினர்.
இது குறித்து மாணவர்களின் பெற்றோருக்கு தகவல் தெரிந்தது. அவர்கள் பள்ளியை
முற்றுகையிட்டனர். ஆனால், யாரும் பள்ளியில் இல்லாததால் அன்று வீட்டுக்கு
சென்று விட்டனர்.கடந்த 16ம் தேதி பள்ளியை திறக்க வந்தபோது அப்பள்ளியை
திறக்க விடாமல் முற்றுகையிட்டு மாணவர்களின் பெற்றோரும், வகுப்புக்கு
செல்லாமல் மாணவர்களும் போராட்டத்தில்
ஈடுபட்டனர். அப்போது, தேசியக் கொடி
ஏற்றாத தலைமை ஆசிரியர் புவனேஸ்வரி மீது நடவடிக்கை எடுக்க வலியுறுத்தி
ஆர்ப்பாட்டம் செய்தனர். இது குறித்து தகவல் அறிந்த திருவண்ணாமலை மாவட்ட
தொடக்கக் கல்வி அலுவலக கண்காணிப்பாளர் சண்முகானந்தம், வந்தவாசி உதவி
தொடக்கக் கல்வி அலுவலர் ராஜகோபால், வந்தவாசி வடக்கு போலீசார் ஆகியோர்
ஆர்ப்பாட்டத்தில் ஈடுபட்டவர்களிடம் பேச்சு வார்த்தை
நடத்தினர். சம்பந்தப்பட்ட தலைமை ஆசிரியர்
புவனேஸ்வரி மீதும், அவரது கணவர் மணவாளன் மீதும் நடவடிக்கை எடுப்பதாக
அப்பகுதி மக்களிடம் உறுதியளித்ததைத் தொடர்ந்து, போராட்டம் வாபஸ்
பெறப்பட்டது. மாணவர்கள் வகுப்புக்கு சென்றனர்.