பணிந்தது மொபைல் நிறுவனம் "பிளாக் பெர்ரி'

புதுடில்லி:

தகவல்களை இடைமறிக்கும் வசதியை அளிக்க பிளாக்பெர்ரி மொபைல்
போனை தயாரிக்கும், "ரிம்' நிறுவனம் ஒப்புக்கொண்டுள்ளது. நம்நாட்டில் 10
லட்சத்துக்கும் அதிகமானவர்கள், "பிளக் பெர்ரி' மொபைல் போனை
பயன்படுத்துகின்றனர். தட்டச்சு இயந்திரத்தின் பாணியில் இந்த மொபைல் போனில்
எழுத்துக்களை டைப் செய்து தகவல்களை பரிமாறும் வசதி உள்ளது. எனவே, இந்த
மொபைல் போன் மூலம் பயங்கரவாதிகள் தங்கள் சதி திட்டங்களை பரிமாறிக்கொள்ள
நேரிடும். எனவே, இந்த மொபைல் போன்களில் பரிமாறிக்கொள்ளப்படும் செய்திகளை
இடைமறித்து அறியும் வசதியை மத்திய புலனாய்வு நிறுவனங்களுக்கும், சட்ட
அமலாக்க அதிகாரிகளுக்கும் அளிக்க வேண்டும் என, அரசு கோரி வந்தது. ஆனால்,
இதை கனடா நாட்டைச் சேர்ந்த, "ரிம்' நிறுவனம் ஏற்க மறுப்பு தெரிவித்தது.
பிளாக்பெர்ரி தகவல்கள் அனைத்தும், "பிளாக்பெர்ரி என்டர்பிரைஸ் சர்வர்'
மூலம் பரிமாறப்படுகின்றன. இந்தத் தகவல்கள் விசேஷக் குறியீடுகள் மூலமே
பரிமாறப்படுவதால், சாதா எழுத்திலிருந்து மாற்றியமைக்கப்பட்ட
குறியீட்டிலேயே சர்வரில் பதியப்படுகிறது. மீண்டும் இன்னொரு போனுக்கு தகவல்
செல்லும்போது மட்டுமே, சாதா எழுத்தில் அனுப்பப்படுகிறது. இந்த விசேஷக்
குறியீட்டைப் படிக்கும் உரிமை வேண்டும் என்பது தான், இந்தியாவின்
கோரிக்கை. மத்திய அரசின் நிபந்தனைகளுக்கு உட்படவில்லை என்றால்,
பிளாக்பெர்ரி சர்வீஸ் முடக்கப்படும் என்று சமீபத்தில் எச்சரிக்கை
விடப்பட்டது. மத்திய அரசின் இந்த எச்சரிக்கையை தொடர்ந்து ரிம் நிறுவனம்,
தகவல்களை இடைமறித்து அறியும் வசதியை ஓரளவுக்கு அளிக்க இசைந்துள்ளது.
அடுத்த மாதம் முதல் இந்த வசதியை அளிக்க ஒப்புக்கொண்டுள்ள ரிம் நிறுவனம்,
இந்த ஆண்டு இறுதிக்குள் தகவல்களை இடைமறித்து அறியும் முழு வசதியையும்
அளிக்க ஒப்புக்கொண்டுள்ளது. இதை உள்துறை செயலர் பிள்ளை, டெலிகாம் செயலர்
தாமசுக்கு தெரிவித்துள்ளார். இதன் படி, சட்டப்படி தகவல்களை இடைமறித்து
ஆராய வழிவகையை அடுத்தமாதம் முதல் உருவாக்கி, அதன் முழு நடைமுறைகளும் ஆண்டு
இறுதிக்குள் முடிக்கப்படும் என்று தெரிவிக்கப்பட்டிருக்கிறது. அமெரிக்கா
உட்பட சில நாடுகளுக்கு இந்த நிறுவனம் தனி வசதிகளை செய்து தந்துள்ளது
என்பது குறிப்பிடத்தக்கது.