ஹீட்டர் அறைக்குள் தங்கும் விபரீத போட்டி:ரஷ்ய வீரர் உடல் வெந்து பலி

ஹெனோலா,


வெப்பம்
தகிக்கும் அறையில் பல மணி நேரம் தாக்குப்பிடிக்கும் விபரீத போட்டியின்போது
அறை வெப்பம் திடீரென அதிகரித்ததால் உடல் வெந்து வீரர் பரிதாபமாக இறந்தார்.
பின்லாந்தில் இச்சம்பவம் பரபரப்பை ஏற்படுத்தியுள்ளது.
பின்லாந்தில்
கடும் குளிர்காலங்களில் சானா என்ற ஹீட்டர் அறைக்குள், மேலாடை இல்லாமல்
அமர்ந்து மக்கள் குளிர்காய்வது வழக்கம். 70 டிகிரி செல்சியஸ் முதல் 90
டிகிரி செல்சியஸ் வரை வெப்பத்தை அதிகப்படுத்தி உடலை வியர்க்க வைக்க
முடியும். இதையே ஆண்டுதோறும் சர்வதேச போட்டியாக நடத்த 1999&ம் ஆண்டு
முடிவு செய்யப்பட்டது.
இந்த ஆண்டுக்கான
போட்டி ஹெனோலா நகரில் நேற்று நடந்தது. 15 நாடுகளில் இருந்து வீரர்கள்
கலந்துகொண்டனர். இறுதி போட்டியில் ரஷ்ய வீரர் விளாடிமிர் (60), பின்லாந்து
வீரர் டிமோ (40) ஆகியோர் கலந்துகொண்டனர். 6 நிமிடங்கள் வரை இவர்கள்
இருவரும் சானா அறையில் வியர்க்க விறுவிறுக்க அமர்ந்திருந்தனர். இதை
நடுவர்கள், பார்வையாளர்கள் பார்த்துக் கொண்டிருந்தனர்.
இந்நிலையில்,
சானா அறைக்குள் வெப்பநிலை திடீரென 110 டிகிரி செல்சியஸை எட்டியது.
இருவரும் மயங்கி விழுந்தனர். உடனே சானா கருவி நிறுத்தப்பட்டது. அறைக்கு
மீட்புக் குழுவினர் ஓடிச்சென்றனர். அதற்குள், வீரர்களின் தோல் உரியத்
தொடங்கியிருந்தது. உடனடியாக இருவரும் வெளியே கொண்டு வரப்பட்டனர்.
அவர்களுக்கு முதலுதவி சிகிச்சைகள் அளித்து ஆஸ்பத்திரிக்கு கொண்டு
செல்லப்பட்டனர். ஆஸ்பத்திரியில் ரஷ்ய வீரர் விளாடிமிர் இறந்தார்.
பின்லாந்து வீரர் டிமோவுக்கு தீவிர சிகிச்சை அளிக்கப்படுகிறது.
விபரீத போட்டியின்போது வீரர் ஒருவர் பரிதாபமாக இறந்தது பின்லாந்தில் பெரும் சோகத்தையும் பரபரப்பையும் ஏற்படுத்தியுள்ளது.