இண்ட்ராப் பற்றிய ஒப்பாரியை விடுங்கள்

மலேசியாஇன்று:

பிரதமரின் ஹரி ராயா திறந்த இல்ல உபசரிப்பில் இண்ட்ராப் இயக்கத்தினர் கலந்து கொண்டது பற்றி ஒப்பாரி வைப்பதை அரசியல் தலைவர்கள் நிறுத்திக்கொள்ள வேண்டும் என்று ஜசெக நாடாளுமன்ற உறுப்பினர் சார்ல்ஸ் சந்தியாகு கேட்டுக்கொண்டிருக்கிறார்.

திறந்த இல்ல உபசரிப்பில், ஒரு குழுவினர் தம்மை அணுகி, உள்நாட்டுப் பாதுகாப்புச் சட்டத்தின்கீழ் காவலில் வைக்கப்பட்டுள்ளவர்களை விடுவிக்குமாறு வேண்டிக்கொண்டது ஏமாற்றமளிப்பதாக நாட்டின் உயர்பதவி வகிக்கும் அப்துல்லா அகமட் படாவி கூறியது வேடிக்கையாக இருக்கிறது என்றும் சந்தியாகு குறிப்பிட்டார்.

“இண்ட்ராப் ஆதரவாளர்கள் தம்முடனும் தம் அமைச்சர்களுடனும் கைகுலுக்கவில்லை, வாழ்த்து கூறவில்லை என்று பிரதமர் கூறியதைக் கேட்கப் பரிதாபமாக இருந்தது.

“இண்ட்ராபினரின் செயல் ஜனநாயகத்தின்பாற்பட்டதுதான். மலேசியாவில் எதற்குத் தட்டுப்பாடு நிலவுகிறதோ, அந்தப் பேச்சுரிமை வேண்டும் என்றுதான் இண்ட்ராப்பினர் சுலோகங்களை முழக்கினர் என்பதை அப்துல்லா புரிந்து கொள்ள வேண்டும்”. இன்று வெளியிட்ட அறிக்கை ஒன்றில் சந்தியாகு இவ்வாறு குறிப்பிட்டிருந்தார்.

இண்ட்ராப் ஆதரவாளர்களின் செயல், இசா கைதிகளாக உள்ள இண்ட்ராப் தலைவர்களை விடுவிக்கும் முயற்சியைக் குலைத்துவிட்டதாகக் கவலை தெரிவித்த மஇகா தலைவர் ச. சாமிவேலுவையும் சந்தியாகு சாடினார்.

சாமிவேலு, அப்துல்லாவுக்காகவும் அரசாங்கத்துக்காகவும் பரிந்து பேசுவதை விடுத்து மசீச வையும் கெராக்கானையும் போல் விசாரணையின்றி காவலில் வைக்க வகைசெய்யும் இசா சட்டத்தை அகற்றுவதற்கு துணிச்சலாகக் குரல் கொடுக்க வேண்டும் என்றாரவர்.

திறந்த இல்ல உபசரிப்பில் இண்ட்ராப் ஆதரவாளர்களின் நடத்தை இந்தியப் பண்பாட்டுக்கு ஏற்புடையதல்ல என்று கூறிய மனிதவள அமைச்சரும் மஇகா தலைமைச் செயலாளருமான டாக்டர் எஸ். சுப்ரமணியமும் அந்த கிள்ளான் நாடாளுமன்ற உறுப்பினரிடமிருந்து ‘வாங்கிக் கட்டிக்கொண்டார்’.

“ஒரு புத்திசாலியான சுப்ரமணியம் இப்படிப் பேசக்கூடாது. அடிப்படை உரிமைக்கும் விடுதலைக்குமான போராட்டம், பண்பாட்டை மீறும் செயலாக எப்போது மாறியது?”.

திறந்த இல்ல உபசரிப்பில் இண்ட்ராப்பினர் கலந்து கொண்டதற்கு எதிர்ப்புத் தெரிவிக்கப்போவதாகக் கூறியுள்ள சுயேச்சை நாடாளுமன்ற உறுப்பினர் இப்ராகிம் அலியையும் சந்தியாகு விட்டு வைக்கவில்லை.

“பழங்கால இனவாத அரசியலுக்கு மலேசியாவில் இடமில்லை என்பதை அவர் உணர வேண்டும்.

“இண்ட்ராப் தலைவர்கள் தடுத்து வைக்கப்பட்டிருப்பதை ஒரு இந்தியர் விவகாரமாக பார்ப்பதை அவர் நிறுத்திக் கொள்ள வேண்டும். அதை ஒரு மலேசிய விவகாரமாகக் கருத வேண்டும். திறந்த இல்ல உபசரிப்பில் அவர்கள் கலந்துகொண்டதை முஸ்லிம்களை அவமதிக்கும் செயலாகக் கருதக்கூடாது என்றும் அவர் முஸ்லிம் தரப்புகளைக் கேட்டுக்கொள்ள வேண்டும்”, என்றாரவர்.

“உண்மையான விவகாரங்களைத் திரித்துக்கூறி இனப் பிரச்னைகளைத் தூண்டிவிடக்கூடாது. நவீன சமுதாயத்துக்குத் தேவையில்லாதது இந்த இசா.

“ஆனால் அரசாங்கம் அச்சத்தை உண்டுபண்ணவும் எதிர்ப்புகளை அடக்கவும் அதை ஒரு கருவியாகப் பயன்படுத்திக்கொள்கிறது”, என்று சந்தியாகு கூறினார்.