ஆதிதிராவிட மாணவ, மாணவியருக்குக் கல்விக்கடன்

மதுரை,'

மதுரை
மாவட்டத்தைச் சேர்ந்த ஆதிதிராவிட மாணவ, மாணவிகளுக்கு தேசிய
தாழ்த்தப்பட்டோர் நிதி மேம்பாட்டுக் கழகத்தின் மூலம் கல்விக் கடன்
வழங்கப்படுகிறது என்று, மாவட்ட ஆட்சியர் சி. காமராஜ் தெரிவித்துள்ளார். இது தொடர்பாக, அவர் வெளியிட்டுள்ள செய்திக்குறிப்பு:பொறியியல்,
கட்டடக் கலை, மருத்துவம், மருத்துவம் சார்ந்த இதர பட்ட, பட்டய
மேற்படிப்புகள், தகவல் தொழில்நுட்பம், சட்டம், கல்வியியல், பத்திரிகை
நிர்வாகம், ஆராய்ச்சிப் படிப்புகள், உணவு விடுதி நிர்வாகம் மற்றும் உணவு
தயாரித்தல் பயிற்சிகள், ஒருங்கிணைந்த பட்ட மேற்படிப்புகள் (5 ஆண்டுகள்)
மற்றும் பட்டயக் கணக்கர் ஆகியவற்றுக்கு கல்விக் கடன் வழங்க வகை
செய்யப்பட்டுள்ளது. இத்திட்டத்தின் கீழ் பயில விரும்புபவர்கள்,
அரசு மற்றும் அரசு அங்கீகாரம் பெற்ற கல்வி நிறுவனங்களில் முழுநேர படிப்பு
பயில்பவராகவும், குடும்ப ஆண்டு வருமானம் கிராமப்புறமாக இருப்பின் ரூ. 40
ஆயிரத்துக்கு மிகாமலும், நகர்ப்புறமாக இருப்பின் ரூ. 55 ஆயிரத்துக்கு
மிகாமலும் இருத்தல் வேண்டும். அரசு மற்றும் அரசு சாராத
நிறுவனங்களில் உதவித்தொகையோ அல்லது கடனோ பெற்றிருத்தல் கூடாது. கல்விக்
கடனானது பயின்றுவரும் அந்தந்த கல்வி நிறுவன முதல்வரின் பரிந்துரையுடன்
பெறப்பட்டு தொடர் நடவடிக்கை எடுக்கப்படும். இத்திட்டத்தின் கீழ்,
இந்தியாவில் பயில்பவர்களுக்கு அதிகபட்சமாக ரூ. 7.50 லட்சமும்,
வெளிநாடுகளில் பயில்பவர்களுக்கு அதிகபட்சம் ரூ. 15 லட்சமும்
வழங்கப்படும். மேற்கண்ட தொகையில் 90 சதவிகிதம் பயிற்சி காலம் முழுவதற்கும்
வழங்கப்படும். 10 சதவீதத் தொகையை மாணவர்களே செலுத்த வேண்டும்.
அவ்வாறு வழங்கப்படும் தொகையில், ஆண்டு 1-க்கு, நபர் 1-க்கு அதிபட்சமாக
இந்தியாவில் இருப்பின் ரூ. 1.875 லட்சமும், அயல்நாடுகளில் பயில்பவர்களாக
இருந்தால் அதிகபட்சமாக ரூ. 3.75 லட்சமும் வழங்கப்படும். கல்விக்
கடனை கல்வியை நிறைவு செய்த நாளிலிருந்து 6 மாதத்துக்குப் பிறகு, 20
காலாண்டுகள் (5 ஆண்டுகள்) அல்லது பணியில் சேர்ந்தவுடன் இதில் எது முன்னதோ
அதன்படி இத்திட்டத்தின் கீழ் பயில்பவர்களுக்கு ஆண்களாக இருப்பின்
வழங்கப்படும் கல்விக்கடனுக்கு ஆண்டுக்கு 5 சதவிகித வட்டியும், பெண்களாக
இருப்பின் 4 சதவிகித வட்டியுடனும் சேர்த்து வசூலிக்கப்படும்.
மேலும் விவரம் வேண்டுவோர், மாவட்ட மேலாளர் அலுவலகம், தாட்கோ, பழைய
ராமநாதபுரம் மாவட்ட ஆட்சியர் அலுவலக வளாகம், மதுரை-2 என்ற முகவரியில்
அலுவலக நாள்களில், அலுவலக நேரத்தில் நேரில் கேட்டுத் தெரிந்துகொள்ளலாம்.