மாணவர்கள் கல்விக்கடன் பெறுவதில் சிக்கல்

விருதுநகர்: ஒதுக்கீடு செய்யப்பட்ட வங்கிகளில் கணக்கு துவங்காததால்
மாணவர்கள் உயர்கல்விக்கு கடன் பெறுவதில் சிக்கல் ஏற்பட்டுள்ளது. இதை
காரணம் காட்டி மாணவர்களை வங்கிகள் அலைக்கழிப்பு செய்து
வருகின்றன.மாணவர்கள் உயர்கல்வி பயில்வதற்கு வங்கிகளில் கல்விக்கடன்
பெறலாம் என அரசு அறிவித்துள்ளது. ஒரு குறிப்பிட்ட பகுதிகளில் வசிக்கும்
மாணவர்களுக்கு குறிப்பிட்ட வங்கிகளில் தான் கடன் பெற வேண்டும் என மாவட்ட
நிர்வாகம் ஒதுக்கீடு செய்துள்ளன. வங்கிகள் இருக்கும் பகுதியில்
வசிப்பவர்களுக்கு அந்த வங்கிகளில் கணக்கு இல்லாத நிலை ஏற்படுகிறது.
ஒதுக்கீடு செய்யப்பட்டுள்ள வங்கிகளில் மாணவர்களின் பெற்றோர்கள்
கல்விக்கடன் கேட்டு சென்றால் உங்களுக்கு எங்கள் வங்கியில் கணக்கு
இல்லாததால் இங்கு வங்கி கடன் வழங்க முடியாது. உங்களுக்கு எந்த வங்கியில்
கணக்கு உள்ளதோ அங்கு சென்று கல்விக்கடன் பெற்றுக்கொள்ளுங்கள் என
சம்பந்தப்பட்ட வங்கி நிர்வாகங்கள் தெரிவிக்கின்றன.கணக்கு வைத்துள்ள
வங்கிகளில் சென்று கல்விக்கடன் கேட்டால் அந்த பகுதி எங்கள் வங்கிக்கு
ஒதுக்கீடு செய்யப்படவில்லை. எனவே ஒதுக்கீடு செய்யப்பட்ட வங்கியில் தான்
கல்விக்கடன் பெற முடியும் என தெரிவிக்கின்றனர். மீண்டும் ஒதுக்கீடு
செய்யப்பட்ட வங்கியில் கல்விக்கடன் கேட்டு பெற்றோர்கள் முயற்சி செய்தால்
அடுத்த வங்கிகளில் உள்ள கணக்கை காலி செய்து விட்டு வாருங்கள். அப்போது
தான் கல்விக்கடன் தர முடியும் என ஒதுக்கீடு செய்யப்பட்ட வங்கிகள்
தெரிவிக்கின்றன. அடுத்த வங்கியில் உள்ள கணக்குகளை காலி செய்துவிட்டு
வந்தால் எங்கள் வங்கிக்கு ஒதுக்கீடு செய்த அளவுக்கு மேல் கல்விக்கடன்
தொகையை வழங்கி விட்டோம். இனி கடன் வழங்க முடியாது என்கின்றனர்.மாணவர்கள்
உயர்கல்விக்கு அரசு கவுன்சிலிங்கில் இடம் கிடைத்தால் உடனடியாக வங்கிகள்
கல்விக்கடன் வழங்க வேண்டும் என அரசு தெரிவிக்கிறது. ஆனால் வங்கி
நிர்வாகங்களோ கல்விக்கடன் கேட்பவர் களை தேவையில்லாத காரணங் களை கூறி
அலைக்கழிப்பு செய்வதால் கடன் பெறுவதில் சிக்கல் ஏற்பட்டுள்ளது.