வாகனங்களின் எண்களைப் பதிவு செய்யும் திட்டம் அறிமுகம்

திருச்சி,

திருச்சி மாநகரில் விதிமுறைகளை மீறிச் செல்லும் வாகனங்களின் எண்களை
தானியங்கி கேமராக்கள் மூலம் பதிவு செய்து அபராதம் விதிக்கும் திட்டம்
வியாழக்கிழமை அறிமுகப்படுத்தப்பட்டது. திருச்சி மாநகரில்
போக்குவரத்து விதிமுறைகளை மீறும் வாகனங்களை கண்காணிக்கும் வகையில் முக்கிய
சந்திப்புகளில் கண்காணிப்பு சுழல் கேமராக்கள் நிறுவப்பட்டுள்ளன. ரூ. 3
கோடியில் நிறுவப்பட்டுள்ள இவை கடந்த ஓராண்டாக செயல்பட்டு வருகின்றன.
கன்டோன்மென்டில் உள்ள நவீன காவல் கட்டுப்பாட்டு அறையில் இருந்தபடியே இந்த
கேமராக்கள் மூலம் மாநகர் முழுவதும் முக்கிய இடங்களை கண்காணிக்க முடியும்.
இந்நிலையில், இந்தத் திட்டத்தின் மற்றொரு அம்சமாக சாலைகளில் விதிமுறைகளை
மீறிச் செல்லும் வாகனங்கள், திருட்டு வாகனங்கள், உரிய ஆவணங்கள் இல்லாமல்
செல்லும் வாகனங்கள் ஆகியவற்றின் எண்களை தானியங்கி கேமராக்கள் மூலம் பதிவு
செய்யும் திட்டம் வியாழக்கிழமை அறிமுகப்படுத்தப்பட்டது. மாநகரக்
காவல் ஆணையர் கே. வன்னியபெருமாள் திட்டத்தை தொடக்கிவைத்தார். துணை
ஆணையர்கள் ரூபேஷ்குமார் மீனா (சட்டம் - ஒழுங்கு), தமிழ்ச்சந்திரன்
(குற்றம், போக்குவரத்து) மற்றும் அதிகாரிகள் பலர் கலந்து கொண்டனர்.
பின்னர், ஆணையர் கே. வன்னியபெருமாள் கூறியது: "வாகனப் பதிவு எண்ணை
தானியங்கி கேமிரா மூலம் பதிவு செய்யும் வசதி மூலம் சிக்னல்களில் கோட்டை
தாண்டி நிற்பது, சிகப்பு விளக்கு எரியும்போது நிற்காமல் செல்வது போன்ற
விதிமுறைகளை மீறிச் செல்லும் வாகனங்களின் பதிவு எண் உடனடியாக படம்
பிடிக்கப்பட்டு கட்டுப்பாட்டு அறைக்கு தெரியப்படுத்தப்படும்.
இதுதவிர, காணாமல் போன வாகனங்கள், ஆள் கடத்தலில் ஈடுபட்ட வாகனங்களின்
எண்களை கட்டுப்பாட்டு அறையில் பதிவு செய்வதன் மூலம் அந்த வாகனங்கள்
குறிப்பிட்ட சிக்னலை கடந்துச் செல்லும்போது உடனடியாக தானியங்கி கேமராக்கள்
கட்டுப்பாட்டு அறைக்கு தகவல் தெரிவித்து விடும். மாநகரில்
போக்குவரத்து நெரிசல் மிகுந்த 7 முக்கிய சிக்னல் மற்றும் 8 சோதனைச்
சாவடிகளிலும் இந்த தானியங்கி கேமராக்கள் அமைக்கப்பட்டுள்ளன. ஏறத்தாழ 2
கோடி வாகனங்களின் எண்கள் கணினியில் பதிவு செய்யப்பட்டுள்ளன.
திருச்சி மத்திய பேருந்து நிலையத்திற்குள் மீண்டும் கண்காணிப்பு
கேமராக்கள் அமைப்பதில் தொழில்நுட்ப பிரச்னை இருந்து வருகிறது. விரைவில்
அவை சரி செய்யப்பட்டு, கேமராக்கள் நிறுவப்படும்' என்றார்.