பாகிஸ்தானிடம் இங்கிலாந்து பிரதமர் கேமரூன் மன்னிப்பு கேட்க மறுப்பு

இஸ்லாமாபாத், ஆக. 3-
பாகிஸ்தான் பயங்கரவாதத்தை ஏற்றுமதி
செய்வதாக கூறிய இங்கிலாந்து பிரதமர் கேமரூனுக்கு பாகிஸ்தானில் எதிர்ப்பு
வலுத்து வருகிறது. அவர் மன்னிப்பு கேட்கவேண்டும் என்று, அந்த நாட்டு அரசு
கோரி உள்ளது. அதற்கு கேமரூன் மறுத்து விட்டார். அவர் பாகிஸ்தானின்
எதிர்ப்பை ஒதுக்கி தள்ளினார்.
பாகிஸ்தான் நாட்டில் இருக்கும் தீவிரவாதிகள், இந்தியா, அமெரிக்கா,
ஆப்கானிஸ்தான் உள்ளிட்ட பல நாடுகளில் பயங்கரவாத செயல்களில் ஈடுபட்டு
வருகிறார்கள். சமீபத்தில் நியூயார்க் நகரில் நடந்த கார் குண்டு தாக்குதல்
முயற்சியில் ஒரு பாகிஸ்தானியர் கைது செய்யப்பட்டார். இந்த நிலையில்
இங்கிலாந்து பிரதமர் கேமரூன் இந்தியா வந்தார். அவர் பெங்களூரில் பேட்டி
அளித்தபோது, பாகிஸ்தான் பயங்கரவாதத்தை பிறநாடுகளுக்கு ஏற்றுமதி செய்வதாக
தெரிவித்தார். இதற்கு பாகிஸ்தானில் எதிர்ப்பு எழுந்துள்ளது. இந்த
பேச்சுக்கு எதிர்ப்பு தெரிவித்து இன்று இங்கிலாந்து செல்லும் திட்டத்தை
பாகிஸ்தான் அதிபர் சர்தாரி ரத்து செய்யப்போகிறார் என்று கூறப்பட்டது.
ஆனால் அவர் திட்டமிட்டபடி இங்கிலாந்தில் சுற்றுப்பயணம் செய்வார் என்று
அறிவிக்கப்பட்டு உள்ளது. ஆனால் பாகிஸ்தான் உளவுத்துறை தலைவர் மட்டும் தன்
லண்டன் பயணத்தை ரத்து செய்து விட்டார்.
பாகிஸ்தானுக்கான இங்கிலாந்து தூதர் ஆடம் தாம்சனை பாகிஸ்தான் வெளிநாட்டு
இலாகா அதிகாரிகள் அழைத்து அவரிடம் கேமரூன் பேட்டிக்கு கண்டனம்
தெரிவித்தனர். அதோடு கராச்சி நகரில் கேமரூனின் கொடும்பாவி
கொளுத்தப்பட்டது. பாகிஸ்தான் அதிபர் சர்தாரி இங்கிலாந்து நாட்டுக்கு இன்று
(செவ்வாய்க்கிழமை) செல்கிறார். அங்கு அவர் பிரதமர் கேமரூனை சந்தித்து
பேசுகிறார். அப்போது அவர் தன் எதிர்ப்பை தெரிவிப்பார் என்றும், உண்மை
நிலவரத்தை எடுத்துக்கூறுவார் என்றும் பாகிஸ்தான் மந்திரி குவாமார்
சமான்கைரா தெரிவித்தார்.
இதற்கிடையில், கேமரூன் மன்னிப்பு கேட்கவேண்டும் என்று இங்கிலாந்து
நாட்டு தொழிற்கட்சி எம்.பி. காலித் மக்மூத் கேட்டுக்கொண்டார். இது
தொடர்பாக அவர் கூறுகையில், இங்கிலாந்து நாட்டில் வசிக்கும் முஸ்லிம்கள்
மத்தியில் கேமரூனின் பேட்டி கோபத்தை ஏற்படுத்தி உள்ளது. பிரதமர்
இந்தியாவுக்கு சாதகமாக செயல்படுவதாகவும் அவர்கள் நினைக்கிறார்கள். எனவே
இந்த பேட்டிக்காக கேமரூன் மன்னிப்பு கேட்கவேண்டும் என்று
கேட்டுக்கொண்டார். இதற்கு கேமரூன் மறுத்து விட்டார். நான் என்ன சொன்னேனோ,
அதில் உறுதியாக இருக்கிறேன். அந்த வார்த்தைகளை திரும்பப்பெற மாட்டேன்
என்று கூறினார்.