அடுத்த உலக கோப்பை வரை அர்ஜென்டினா பயிற்சியாளராக மரடோனா நீடிப்பார்; கால்பந்து சங்கம் திட்டம்

அடுத்த உலக கோப்பை வரை மரடோனாவை அர்ஜென்டினா பயிற்சியாளராக நீட்டிக்க கால்பந்து சங்கம் திட்டமிட்டு உள்ளது. இந்த கால்பந்து உலக கோப்பையை வெல்லும் என்று எதிர்பார்க்கப்பட்ட அணிகளில் ஒன்றாக அர்ஜென்டினா அணி இருந்தது. இதன் பயிற்சியாளராக “கால்பந்து ஜாம்பாவான்” என்று அழைக்கப்படும் முன்னாள் வீரர் மரடோனா இருந்தார்.

அவருடைய சிறந்த பயிற்சியின் காரணமாக அர்ஜென்டினா வலுவான இடத்தில் இருந்தது. ஆனால் கால் இறுதி போட்டியிலேயே அர்ஜென்டினா அணி தோல்வியுற்று வெளியேறியது.

இது பயிற்சியாளர் மரடோனாவுக்கு கடும் அதிர்ச்சியை ஏற்படுத்தியது. தோல்வி காரணமாக அவர் பயிற்சியாளர் பணியில் இருந்து விலக போவதாக தகவல்கள் வந்தன. ஆனால் அர்ஜென்டினா கால்பந்து சங்கம் மரடோனாவை இழக்க விரும்ப வில்லை. தொடர்ந்து அவர் பயிற்சியாளராக நீடிக்க வேண்டும் என்று விரும்பு கிறது. அர்ஜென்டினா ரசிகர்களும் மரடோனாவை பயிற்சியாளராக நீடிக்க வேண்டும் என்று வற்புறுத்தி வருகின்றனர்.

எனவே மரடோனாவை 2014-ம் ஆண்டு நடக்கும் அடுத்த உலக கோப்பை போட்டி வரை பயிற்சியாளராக நீடிக்க வைக்க அர்ஜென்டினா கால்பந்து சங்கம் திட்டமிட்டு உள்ளது.

இது பற்றி கால்பந்து சங்க செய்தி தொடர்பாளர் எமஸ் டோபியாலோ கூறியதாவது:-

மரடோனாவை தொடர்ந்து பயிற்சியாளராக நீடிக்க வைக்க விரும்புகிறோம். இது தொடர்பாக கால்பந்து சங்க தலைவர் ஜூலியோ காண்டனா அடுத்த வாரம் மரடோனாவை சந்தித்து பேச இருக்கிறார்.

மரடோனாவை தவிர வேறு யாரையும் பயிற்சியாளராக நியமிப்பது பற்றி நாங்கள் சிந்தித்து பார்க்கவில்லை. இந்த தடவை உலக கோப்பை கிடைக்கும் என்று எதிர்பார்த்தோம். எதிர்பார்த்தது நடக்க வில்லை. இதற்காக அணியை குறை சொல்ல முடியாது. ஏற்க னவே பல தடவை இது போன்ற தோல்விகள் ஏற்பட்டு உள்ளன.

இவ்வாறு அவர் கூறினார்.

அர்ஜென்டினா தோல்விக்கு பிறகு நாடு திரும்பிய மரடோனா போன்ஸ்ஏர்ஸ் புறநகரில் உள்ள தனது பண்ணை வீட்டில் முடங்கி கிடக்கிறார்.

அவர் பயிற்சியாளராக நீடிக்க விரும்புகிறாரா? இல்லையா? என்பது கால்பந்து சங்க தலைவர் அவரை சந்தித்த பிறகே தெரியவரும்.