டெஸ்ட் போட்டியில் ஓய்வு அப்ரிடியின் முடிவுக்கு இம்ரான் கண்டனம்

பாகிஸ்தான் கிரிக்கெட் அணி ஆஸ்திரேலியா வுடன் டெஸ்ட் போட்டியில் விளையாடி வருகிறது. முதல் டெஸ்டில் அந்த அணி 150 ரன்னில் மோசமான தோல்வியை சந்தித்தது.

இதைத்தொடர்ந்து ஆஸ்திரேலியாவுக்கு எதிரான டெஸ்ட் தொடர் முடிந்த பிறகு, டெஸ்டில் ஒய்வு பெறுவதாக கேப்டன் அப்ரிடி அறிவித்தார்.

இதற்கிடையே காயம் காரணமாக 21-ந்தேதி தொடங்கும் 2-வது மற்றும் கடைசி டெஸ்டில் அப்ரிடி ஆடவில்லை. அவர் நாடு திரும்பியுள்ளார். ஒருநாள் போட்டி தொடங்கும்போது அவர் அணிக்கு திரும்புவார்.

இதன் காரணமாக பாகிஸ்தான் டெஸ்ட் அணிக்கு சல்மான்பட் கேப்டனாக நியமிக்கப்பட்டுள்ளார். ஆஸ்திரேலியாவுக்கு எதிரான 2-வது டெஸ்ட் மற்றும் இங்கிலாந்துக்கு எதிரான 4 டெஸ்ட் ஆகிய வற்றுக்கு அவர் கேப்டனாக இருப்பார்.

இந்த நிலையில் அப்ரிடி டெஸ்ட் போட்டியில் இருந்து ஓய்வு பெறுவதாக எடுத்துள்ள முடிவுக்கு முன்னாள் கேப்டனும், அரசியல்வாதியுமான இம்ரான்கான் கண்டனம் தெரிவித்து உள்ளார். இது தொடர்பாக அவர் கூறியதாவது:-

பாகிஸ்தான் கிரிக்கெட் வாரியத்துடன் அப்ரிடிக்கு பிரச்சினை இருப்பதாக கருதுகிறேன். அதனால் தான் அவர் இந்த முடிவை எடுத்துள்ளார். கேப்டன் பதவி என்பது சவாலானது தான். ஓய்வு பெறுவதாக அவர் அறிவித்தது சரியானது கிடையாது.

இவ்வாறு அவர் கூறியுள்ளார்.

இதேபோல மற்றொரு முன்னாள் கேப்டனான அமீர் சோகைலும் கண்டனம் தெரிவித்து உள்ளனர்.

அவர் கூறும் போது, எந்த ஒரு வீரருக்கும் ஏற்றம், இறக்கம் இருக்கும். ஒரு டெஸ்டில் தோற்றதற்காக ஓய்வு பெறுவதாக முடிவை அறிவிப்பது சரியில்லை. இதையெல்லாம் யோசித்து அவர் டெஸ்ட் கேப்டன் பதவியை பெற்று இருக்க வேண்டும் என்றார்.
இதற்கிடையே பாகிஸ் தான் கிரிக்கெட்டில் ஏற்பட்டுள்ள இந்த பிரச்சினை களுக்கு எல்லாம் பாகிஸ்தான் கிரிக்கெட் வாரியம் தான் காரணம் என்று முன்னாள் கேப்டன் இன்ஜமாம் உல்-ஹக் குற்றச் சாட்டியுள்ளார்.