இசை சர்வாதிகாரி பரத்வாஜுக்கு புதுப்பட்டம்!

ஆறாக இருந்தால் அளந்து கொட்டலாம். பேச்சுதானே...? படியாவது, அளவாவது என்று பொளந்து கட்டினார்கள் 'நந்தி' படத்தின் பிரஸ்மீட்டில். ஒரு சிலரை தவிர மற்றவர்கள் பேச்சில் அநியாயத்துக்கு சுவாரஸ்யம். முன்னதாக அங்கு வைக்கப்பட்டிருந்த பேனரில் 'இசை சர்வாதிகாரி பரத்வாஜ்' என்று பொறிக்கப்பட்டிருந்த வாசகம் எல்லார் கண்களையும் உறுத்தியது. ஆனால் சர்வாதிகாரியின் பேச்சில் அநியாயத்துக்கு மென்மை.

கள்வனின் காதலி, மச்சக்காரன் ஆகிய இரண்டு படங்களை இயக்கியிருக்கும் தமிழ்வாணனின் மூன்றாவது படம் இது. ஆனா இதுதான் எனக்கு முதல் படம் மாதிரி என்றார் அவர். நான் முதல்ல இயக்கணும்னு நினைச்சுகிட்டிருந்த படமும் இதுதான். ஆனால் இந்த மாதிரி யதார்த்தமான கதையை நேசிக்கிற தயாரிப்பாளர் கிடைச்சதாலதான் என்னோட மூணாவது படமா இது அமைஞ்சது என்றார் தமிழ்வாணன்.

சமீபகாலமாக நகைச்சுவையில் தனி ரூட் போட்டு டிராவல்ஸ் நடத்தும் சிங்கம்புலி மைக்கை பிடித்தார். நகைச்சுவையும், நல்ல விஷயங்களுமாக கழிந்தது நிமிடங்கள். இந்த படத்தை பார்த்துட்டு தம்பி, நீங்க படம் முடியும்போது 'எ பிலிம் பை தமிழ்வாணன்'னு போட்டுக்கணும் என்று சொன்னேன். ஆனா அவரு சொன்னாரு. அண்ணே, ராத்திரி ஒரு மணிக்கு கூட பேங்க் வாசல்ல போயி நிக்காம ஏடிஎம்ல பணம் எடுக்கிறோம். நினைச்சா செல்போன்ல நிமிஷத்துல தகவல் சொல்றோம். ஆனா அதையெல்லாம் கண்டுபிடிச்சவன் யாருன்னு நமக்கு தெரியுமா? அவ்ளோ பெரிய விஷயத்தை பண்ணுன ஆளுங்க எல்லாம் சும்மா இருக்கும்போது நாம என்ன பெரிசா பண்ணிட்டோம், எ பிலிம் பைன்னு என் பெயரை போட்டுக்கறதுக்குன்னு சொன்னார். அவரு பேரை போட்டுக்கல என்றாலும் இந்த படம் அவருக்கு அழியாத பேரு வாங்கி தரும் என்றார் சிங்கம்புலி.

கல்லு£ரி, வால்மீகி படங்களில் ஹீரோவாக நடித்த அகில் இப்படத்தில் ஹீராவாக நடிக்கிறார். அவருக்கு ஜோடியாக ரேணிகுண்டா பட நாயகி சனுஜா நடிக்கிறார். போன படத்தில் வாய் பேச முடியாத பொண்ணா நடிச்சிருந்தாரு. இந்த படத்தில வாயாடியா நடிச்சிருக்காரு. பார்த்திட்டு அசரதான் போறீங்க என்றார் தமிழ்வாணன்.

தியேட்டரை விட்டு நகராம ஓடணும் நந்தி!