26 மத்திய ரிசர்வ் போலீசார் சுட்டுக்கொலை, 200 மாவோயிஸ்டுகள் திரண்டு வந்து தாக்குதல்

சத்தீஷ்கார் மாநிலத்தில் 200 மாவோயிஸ்டுகள் நடத்திய தாக்குதலில் 26 மத்திய ரிசர்வ் படை போலீசார் பலியானார்கள்.

அட்டூழியம்

மேற்கு வங்காளம், பீகார், ஜார்கண்ட், சத்தீஷ்கார், ஒரிசா, ஆந்திரா, மராட்டியம், மத்தியபிரதேசம் ஆகிய 8 மாநிலங்களில் மாவோயிஸ்டு தீவிரவாதிகளின் அட்டூழியம் அதிகமாக உள்ளது. அவர்களை ஒடுக்கும் பணியில் அந்தந்த மாநில போலீசாரின் துணையுடன் துணை ராணுவ படையினரான மத்திய ரிசர்வ் படை போலீசார் ஈடுபட்டு வருகிறார்கள்.

மாவோயிஸ்டுகளை ஒடுக்கும் பணியில் ராணுவத்தினரையும் ஈடுபடுத்த வேண்டும் என்ற யோசனை எழுந்துள்ளது. இதுபற்றி மத்திய அரசு ஆலோசனை நடத்தி வருகிறது.

அதே சமயம், மற்றொரு புறம், மாவோயிஸ்டுகளின் வன்முறை நீடித்து வருகிறது. கடந்த மாதம், மேற்கு வங்காளத்தில் மாவோயிஸ்டுகள் ரெயில் கவிழ்ப்பில் ஈடுபட்டதால் சுமார் 150 பயணிகள் உயிரிழந்தனர்.

26 போலீசார் பலி

இந்நிலையில், நேற்று சத்தீஷ்கார் மாநிலத்தில், மத்திய ரிசர்வ் படை போலீசாரை குறிவைத்து மாவோயிஸ்டுகள் மிகப்பெரிய தாக்குதலை நடத்தினர். அம்மாநிலத்தில் நாராயண்பூர் மாவட்டத்தில் தவுரை ரோடு பகுதியில் பிற்பகல் 3 மணி அளவில் ரிசர்வ் போலீசாரும், மாநில போலீசாருமாக மொத்தம் 70 பேர் நடந்து சென்று கொண்டிருந்தனர்.

அப்போது, அங்குள்ள மலை உச்சியில் தானியங்கி துப்பாக்கிகளுடன் பதுங்கி இருந்த சுமார் 200 மாவோயிஸ்டுகள், அங்கிருந்து போலீசார் மீது சரமாரியாக சுட்டனர். உடனே போலீசாரும் எதிர் தாக்குதல் நடத்தினர். இருதரப்புக்கும் இடையே 2 மணி நேரம் கடுமையான துப்பாக்கி சண்டை நடந்தது. தகவல் அறிந்து, வேறு பகுதிகளில் இருந்து போலீசார் வரவழைக்கப்பட்டனர்.

இந்த சண்டையில் 26 ரிசர்வ் படை போலீசார் பலியானார்கள். சத்தீஷ்கார் போலீஸ் படையின் 4 விசேஷ போலீஸ் அதிகாரிகளும், 3 ரிசர்வ் போலீசாரும் படுகாயம் அடைந்தனர். அவர்கள் ஹெலிகாப்டர் மூலம் ஜக்தல்பூர் ஆஸ்பத்திரிக்கு கொண்டு செல்லப்பட்டனர். அவர்களில் ஒரு போலீஸ் அதிகாரியின் நிலைமை கவலைக்கிடமாக உள்ளது.

உடல்கள் மீட்பு

சம்பவத்தை தொடர்ந்து, அப்பகுதிக்கு மருத்துவ குழுக்கள் அனுப்பி வைக்கப்பட்டன. பலியான போலீசாரின் உடல்கள் மீட்கப்பட்டன. சாவு எண்ணிக்கை அதிகமாக இருக்கக்கூடும் என்றும் தகவல்கள் தெரிவிக்கின்றன.

இந்த தாக்குதல் பற்றிய தகவல்களை டெல்லியில் மத்திய உள்துறை செயலாளர் ஜி.கே.பிள்ளை நிருபர்களிடம் தெரிவித்தார்.

3-வது பெரும் தாக்குதல்

சத்தீஷ்காரில் மாவோயிஸ்டுகள் நடத்திய 3-வது பெரிய தாக்குதல் இதுவே ஆகும். கடந்த ஏப்ரல் 6-ந் தேதி, தண்டேவாடா கிராமத்தில் நடத்தப்பட்ட தாக்குதலில் 75 ரிசர்வ் போலீசாரும், ஒரு மாநில போலீஸ்காரரும் பலியானார்கள். கடந்த மே 8-ந் தேதி, நாராயண்பூர் மாவட்டத்தில் நடத்தப்பட்ட கண்ணிவெடி தாக்குதலில் 8 ரிசர்வ் போலீசார் பலியானார்கள்.

அதைத் தொடர்ந்து மாவோயிஸ்டுகளின் நேற்றைய தாக்குதலில் 26 ரிசர்வ் போலீசார் பலியாகி உள்ளனர்.

26 பேர் தானே , இது ஒண்ணும் ஒரு பெரிய பிரச்சினையே இல்லை தானே சிதம்பரம் சார் .

நமக்கு ஆயிரதெட்டு வேலை இருக்கு , தமிழீழத்தில் இன்னும் 2 வயசு 3 வயசு குழந்தைகள் எல்லாம் புலிகள் இயக்கத்தில் மீதம் இருக்கிறார்களாம் வாங்க அங்க நமது ராணுவத்த அனுப்புவோம்