இலங்கை தமிழர் இன்னல் தீர்ந்த பிறகே மாநாடு நடத்த வேண்டும்: ஜெயலலிதா

தமிழர்கள் எதிர்பார்க்கும் உரிமையும், சுயமரியாதையும் கொண்ட சமூகம் இலங்கையில் அமைக்கப்பட்ட பின்னரே தமிழ்நாட்டில் மாநாடு நடத்தப்பட வேண்டும் என்று அதிமுக பொதுச்செயலாளர் ஜெ.ஜெயலலிதா தனது அறிக்கையில் தெரிவித்துள்ளார்.
அதிமுக பொதுச்செயலாளர் ஜெயலலிதா இன்று விடுத்த அறிக்கை:

2009ம் ஆண்டு இறுதிக்குள் இலங்கைத் தமிழர்கள் முன்பு வாழ்ந்த இடங்களுக்கு அனுப்பப்படுவர், அவர்களுக்கு மறுவாழ்வு அளிக்கப்படும் என இலங்கை சென்ற திமுக கூட்டணியை சேர்ந்த தமிழக நாடாளுமன்ற உறுப்பினர்களிடம் இலங்கை அதிபர் உறுதி அளித்தார். ஆனால் இன்னமும் அதே நிலைதான் அங்கு நீடிக்கிறது.

வட இலங்கையில் தமிழர்களின் அடையாளங்களை அழிக்கும் நடவடிக்கையில் அந்நாட்டு ராணுவம் ஈடுபட்டு வருவதாகவும், தமிழர்களின் பண்பாடு, சமயம் ஆகியவற்றின் மீது தாக்குதல் நடத்தப்படுவதாகவும், போரின் போது சிதைந்து போன தமிழர்களின் கோயில்கள், தேவாலயங்கள், மசூதிகள் ஆகியவற்றை கட்டித்தர நடவடிக்கை எடுக்காமல், புத்த விகாரங்கள் புதிது புதிதாக கட்டப்படுவதாகவும் தகவல்கள் வருகின்றன.
இப்படிப்பட்ட சூழ்நிலையில் இலங்கைத் தமிழர்களை அவர்களின் சொந்த இடங்களுக்கு திருப்பி அனுப்புவது என்பது எப்படி சாத்தியமாகும் என்று புரியவில்லை. இந்த லட்சணத்தில் 1000 கோடி ரூபாய் மதிப்பில் 50 ஆயிரம் வீடுகள் கட்டித் தர இருப்பதாக மத்திய அரசு அறிவித்திருக்கிறது. ஏற்கனவே மத்திய அரசின் சார்பில் 500 கோடி ரூபாய் நிதி அளிக்கப்பட்டதே? அந்த நிதி இலங்கை தமிழர்களின் மறுவாழ்விற்காக எந்த அளவுக்கு உபயோகப்படுத்தப்பட்டு இருக்கிறது என்பதை மத்திய அரசு கேட்டறிந்ததா?

முகாம்களில் உள்ள ஒரு லட்சம் பேருக்கு மறுவாழ்வு அளிக்கப்பட வேண்டும், மறு குடியேற்றப்பட்ட மக்களுக்கு நிவாரணம் செய்து தர வேண்டும், அழிக்கப்பட்ட விவசாய நிலங்கள் சீரமைக்கப்பட வேண்டும், கல்வி கொடுக்கப்பட வேண்டும், வருகின்ற அனைத்து உதவிகளும் தமிழ் மக்களுக்கு சரியான முறையில் சென்றடைய வேண்டும், தன்னார்வ தொண்டு நிறுவனங்கள் அங்கு பணியாற்ற அனுமதிக்கப்பட வேண்டும். இப்படி தமிழர்கள் எதிர்பார்க்கும் உரிமையும், சுயமரியாதையும் கொண்ட சமூகம் இலங்கையில் அமைக்கப்பட்ட பின்னரே தமிழ்நாட்டில் மாநாடு நடத்தப்பட வேண்டும்.

சில விசயத்துல அம்மா சொல்றது சரியா தான் இருக்கும்
இப்ப இவனுங்க தமிழ் மாநாடு நடத்தி என்னத்த சாதிக்க போறானுங்க. வெட்டி பசங்க. ஊரை அடிச்சு உலையில போட்டுட்டு என்ன தமிழ் மாநாடு வேண்டி கிடக்கு