போபால் யூனியன் கார்பைடு நிறுவனத்தின் தலைவர் தப்பிக்க நான் உதவி செய்யவில்லை: அர்ஜூன்சிங்

நாட்டை உலுக்கிய போபால் யூனியன் கார்பைடு நிறுவனத்தின் தலைவர் ஆண்டர்சன் தப்பிச்செல்ல தான் உதவவில்லை என்று அர்ஜூன்சிங் தெரிவித்துள்ளார்.
மத்திய பிரதேச மாநிலம் போபாலில் கடந்த 1984-ம் ஆண்டு யூனியன் கார்பைடு என்ற நிறுவனத்தில் இருந்து விஷவாயு கசிந்ததில் 20 ஆயிரத்துக்கும் மேற்பட்டவர்கள் இறந்தனர். யூனியன் கார்பைடு நிறுவனம் அமெரிக்கருக்கு சொந்தமானதாகும். விஷவாயு கசிந்த போது அந்த நிறுவனத்தின் தலைவராக அமெரிக்காவைச் சேர்ந்த வாரன் ஆன்டர்சன் என்பவர் இருந்தார்.

விஷவாயு கசிந்து ஏராளமானவர்கள் செத்து விட்டனர் என்ற தகவல் அறிந்ததும் ஆன்டர்சன் விமானத்தில் அமெரிக்காவுக்கு தப்பிச் சென்று விட்டார். சமீபத்தில் இந்த வழக்கில் 26 ஆண்டுகளுக்குப் பிறகு அளிக்கப்பட்ட தீர்ப்பிலும் ஆன்டர்சன் பெயர் இடம் பெறவில்லை. இது பெரும் சர்ச்சையை ஏற்படுத்தி உள்ளது.

இந்த நிலையில் ஆன்டர்சன் தப்பிச் செல்ல மத்தியிலும், மாநிலத்திலும் ஆட்சியில் இருந்த காங்கிரஸ் தலைவர்களே உதவிகள் செய்த தகவல் வெளியாகியுள்ளது. விஷவாயு கசிந்ததும், போபாலில் இருந்து மாநில அரசின் தனி விமானத்தில் ஆன்டர்சன் டெல்லிக்கு சென்று விட்டார். அந்த தனி விமானம் முதல்-மந்திரிக்கு உரிய விமானமாகும்.

விஷவாயு விபத்து நடந்த போது அர்ஜூன்சிங் முதல்- மந்திரியாக இருந்தார். அவர் உத்தரவுப்படி தான் ஆன்டர்சனுக்கு விமானம் கொடுக்கப்பட்டதாக குற்றச்சாட்டு எழுந்துள்ளது. இந்த குற்றச்சாட்டுக்கு பதில் அளிக்கும்படி அர்ஜூன் சிங்குக்கு மத்திய பிரதேச முதல்-மந்திரி சிவராஜ் சவுகான் கடிதம் எழுதியுள்ளார்.

இந்த சர்ச்சையில் மத்திய உள்துறைக்கும் தொடர்பு இருப்பதாக பா.ஜ.க. கூறுகிறது. இது ஆளும் காங்கிரஸ் கட்சிக்கு கடும் நெருக்கடியை ஏற்படுத்தி உள்ளது. ஆனால் இந்த விஷயத்தில் மத்திய அரசு பொறுப்பு ஏற்க முடியாது என்று கூறி காங்கிரஸ் தலைவர்கள் நழுவியபடி உள்ளனர்.

இந்த விவகாரத்துக்கு கடந்த 2 நாட்களாக எந்த பதிலும் சொல்லாமல் அர்ஜூன்சிங் மவுனம் சாதித்து வந்தார். இன்று அவர் இந்திய பத்திரிகை ஒன்றுக்கு பேட்டியளிக்கும் போது போபால் விபத்து குறித்து பேசினார். அவர் கூறியதாவது:-

யூனியன் கார்பைடு தலைவர் ஆன்டர்சனை நான் தான் தனி விமானத்தில் தப்ப வைத்தேன் என்று சொல்வதில் எந்த உண்மையும் இல்லை. விஷவாயு விபத்து நடந்த போது, மக்களின் உயிரைக் காப்பாற்றவே நான் முன்னுரிமை கொடுத்து செயல்பட்டேன்.

ஆன்டர்சன் தப்பிச் செல்ல நான் உதவி செய்ததாக கூறுவதன் மூலம் பிரச்சினையை திசை திருப்புகிறார்கள்.

இவ்வாறு அர்ஜூன்சிங் கூறினார்.

இதற்கிடையே ஆன்டர்சனை தனி விமானத்தில் போபாலில் இருந்து டெல்லிக்கு அழைத்து சென்ற விமான துணை கேப்டன் சையது ஹசன்அலி கூறியதாவது:-

யூனியன் கார்பைட் நிறுவனத்தில் விபத்து ஏற்பட்டதும் அதன் தலைவர் ஆன்டர்சனை உடனடியாக டெல்லிக்கு அழைத்து சென்று விடும்படி எங்களுக்கு மேலிடத்தில் இருந்து உத்தரவு வந்தது. சிறிது நேரத்தில் ஆன்டர்சனை அழைத்து கொண்டு போபால் மாவட்ட கலெக்டரும் போலீஸ் சூப்பிரண்டும் வந்தனர்.