பழங்கால கலாச்சாரத்தை பாதுகாத்து வரும் கிராமம்

**சிவா** · **சிவா** Sun May 30, 2010 10:10 am

தூத்துக்குடி : தூத்துக்குடி மாவட்டம் அயன்வடமலாபுரம் கிராமத்தில் ஆண்டுதோறும் நடக்கும் கோயில் கொடை விழாவில் தமிழரின் பழங்கால கலாச்சாரத்தை பறைசாற்றும், ஆண்களுக்கான "இளவட்டக்கல்' தூக்கும் போட்டி நடந்து வருகிறது. தூத்துக்குடி மாவட்டம் கோவில்பட்டி அருகேயுள்ளது அயன்வடமலாபுரம் கிராமம். இங்கு ஆண்டு தோறும் காளியம்மன் கோயில் கொடைவிழாவில் ஆண்கள், பெண்களுக்கு பல்வேறு விளையாட்டுப் போட்டிகள் நடத்தப்படும். குறிப்பாக, தமிழரின் பழங்கால கலாச்சாரத்தை பாதுகாக்கும் நோக்கத்துடனும், உழைப்பு மற்றும் விவசாயத்தை மறக்காமல் இருக்கவும் இளவட்டக்கல் தூக்கும் போட்டி நடத்தப்படும். கிராமத்தில் ஒருவருக்கு பெண் கொடுப்பதற்கு முன், மாப்பிள்ளை கடின உழைப்பாளியா? விவசாயம் செய்வதில் வல்லவரா? உடல் ஆரோக்யம் உள்ளவரா? கடைசி வரை உழைத்து கட்டிய பெண்ணை காப்பாற்றும் திறன் படைத்தவரா? என்பதை சோதிக்க இந்த, ஆண்களுக்கான இளவட்டக்கல் தூக்கும் போட்டி நடத்தப்படும். இந்த இளவட்டக்கல், மாப்பிள்ளைக் கல் என்றும் கூறப்படுகிறது.

நால்வருக்கு பரிசு: இந்தாண்டு காளியம்மன் கோயில் கொடை விழாவையொட்டி நேற்று முன்தினம் அங்கு 101 கிலோ இளவட்டக்கல் தூக்கும் போட்டி நடத்தப்பட்டது. இதில், பலர் அக்கல்லை தூக்கிய போதும் நால்வரால் மட்டுமே கல்லை முழுமையாக தூக்கி முதுகுப்புறமாக போட முடிந்தது. அவர்களில் , அசோக் முதல் பரிசும், மகேந்திரன் இரண்டாம் பரிசும், 56 வயதான ஜெகந்நாதன் மூன்றாம் பரிசும், ராஜேஷ் நான்காம் பரிசும் பெற்றனர். அவர்களுக்கு விழாக்குழுவினர் பரிசு வழங்கினர். இவர்களைத் தவிர போட்டிகளில் கலந்து கொண்டு சில பெண்களும் அக்கல்லை தூக்க முயன்றனர்.