பெண்ணை விலைமகளாக சித்தரித்து இணையத்தில் வெளியிட்ட பொறியாளர் கைது

திருமண இணையதளம் மூலம் பார்த்த பெண் திருமணத்துக்கு சம்மதிக்கவில்லை என்பதால் பெண்ணை விலைமகளாக சித்தரித்து படத்தை இணையத்தில் வெளியிட்ட பெங்களூர் மென்பொருள் பொறியாளர் கைது செய்யப்பட்டுள்ளார்.
ஐதராபாத்தை சேர்ந்தவர் மேகலா (பெயர் மாற்றப்பட்டுள்ளது) கம்ப்யூட்டர் நிறுவனத்தில் என்ஜினீயராக இருக்கிறார்.

இவருக்கு பெற்றோர் திருமண ஏற்பாடு செய்தனர். இதற்காக திருமண ஏற்பாடு செய்யும் நிறுவனத்திடம் பதிவு செய்து இருந்தனர். இந்த நிறுவனம் இணைய தளத்தில் இதுபற்றி தகவல் களை வெளியிட்டு இருந்தது. அவருடைய படமும் அதில் இருந்தது.

இதை பெங்களூரில் சாப்ட்வேர் என்ஜினீயராக இருக்கும் சிவசங்கர் பார்த்து விட்டு மேகலாவை திருமணம் செய்ய விரும்பினார். மேகலாவின் பெற்றோருக்கு தகவல் அனுப்பி பெண் கேட்டார். ஆனால் மேகலாவுக்கு சிவசங்கரை பிடிக்கவில்லை. எனவே திருமணத்துக்கு மறுத்து விட்டார்.

இதனால் சிவசங்கர், மேகலாவிடமே நேரடியாக தொடர்பு கொண்டு பேசினார். எவ்வளவு சொல்லியும் அவர் சம்மதிக்கவில்லை.

இதனால் சிவசங்கர் மேகலாவை பழிவாங்க துடித்தார். மேகலாவின் படத்தை “மார்பிங்” முறையில் ஆபாசமாக்கினார். பின்னர் அவரை விபசாரியாக சித்தரித்து இணையதளத்தில் வெளியிட்டார். “ஆர்குட்”, “பேஸ்புக்” தளங்களில் இவை வெளிவந்தது. அதில் மேகலாவின் தந்தை போன் எண்ணையும் குறிப்பிட்டு இருந்தார்.

இந்த தளத்தை பார்த்தவர்கள் மேகலா தந்தை போன் எண்ணுக்கு தொடர்பு கொண்டு பேசினார்கள். அப்போது தான் இணையதளத்தில் மேகலாவை பற்றி மோசமாக சித்தரித்து இருப்பது தெரிய வந்தது.

இது பற்றி மேகலாவின் தந்தை ஐதராபாத் “சைபர் கிரைம்” போலீசில் புகார் செய்தார். அவர்கள் இந்த தகவலை சிவசங்கர் தான் பரப்பி இருக்கிறார் என்பதை கண்டுபிடித்து விட்டனர். பின்னர் அவரை கைது செய்தனர்.

சிவசங்கர் கம்ப்யூட்டர் நிறுவனத்தில் மாதம் ரூ.1 1/2 லட்சம் சம்பளம் பெற்று வந்தவர் என்பது குறிப்பிடத்தக்கது.