மரபுப் பா பயிலரங்கம்

தமிழநம்பி · தமிழநம்பி Wed Mar 03, 2010 11:16 pm

First topic message reminder :

எழுத்து

தமிழ் எழுத்துக்கள் அனைத்தும் நம் எல்லாருக்கும் தெரிந்தவையே. என்றாலும் பாட்டு எழுதுகையில் அவை பயன்படுமாறு அவற்றை வகைப்படுத்தி அறிந்து கொள்வோம்.

அ, ஆ, இ, ஈ, உ, ஊ, எ, ஏ, ஐ, ஒ, ஓ, ஒள – இவை பன்னிரண்டும் உயிர் எழுத்துக்கள்.

இவற்றில்,

அ, இ, உ, எ, ஒ – இவை ஐந்தும் குறில் எழுத்துக்கள்.

ஆ, ஈ, ஊ, ஏ, ஐ, ஓ, ஒள – இவை ஏழும் நெடில் எழுத்துக்கள்.

அடுத்து –

மெய் யெழுத்துக்கள் (புள்ளி வைத்தவை) 18.

க், ங் ச், ஞ், ட், ண், த், ந், ப், ம், ய், ர், ல், வ், ழ், ள், ற், ன்.

உயிர்க்குறில் எழுத்துக்களான அ, இ, உ, எ, ஒ – என்னும் ஐந்தும்

மேற்கண்ட 18 மெய்யெழுத்துக்களோடும் சேர்வதால் பிறக்கும் உயிர் மெய் எழுத்துக்களும் குறில் எழுத்துக்களே.

எடுத்துக்காட்டு :

க் உடன் அ, இ, உ, எ, ஒ சேர்ந்தால் – க, கி, கு, கெ, கொ என்ற உயிர்மெய்க் குறில் எழுத்துக்கள் பிறக்கும்.

இதே போல் ச், ..... ன் வரை ஐந்தைந்து குறில் எழுத்துக்கள் பிறக்கும்.

க் உடன் ஆ, ஈ, ஊ, ஏ, ஐ, ஓ, ஒள கூடினால் கா, கீ, கூ, கே, கை, கோ, கெள என்ற உயிர்மெய் நெடில் எழுத்துக்கள் பிறக்கும்.

இதே போல், ச்..... ன் வரை ஏழேழு நெடில் எழுத்துக்கள் கிடைக்கும்.

குறுகிய ஓசை உடைய எழுத்துக்கள் குறில் எனப்படும்.

நீண்ட ஓசை உடைய எழுத்துக்கள் நெடில் எனப்படும்.

புள்ளியை உடைய எழுத்துக்களும் ஆய்த எழுத்தும் ஒற்று எனப்படும்.

எழுத்துக்களில் இவற்றைத் தெரிந்தால் போதும் இப்போது.

இவற்றில், புரியாதது எதுவும் இருந்தால் தயங்காமல் உடனே பின்னூட்டத்தின் வழி கேளுங்கள்.

அடுத்து, அசை எனபதைத் தெரிந்து கொள்ளப்போகிறோம்.

தமிழநம்பி · தமிழநம்பி Wed Oct 06, 2010 9:56 pm

அருமை!
சரியான வெளிமண்டிலம்.
யாதுமானவர்க்குப் பாராட்டு.

தமிழநம்பி · தமிழநம்பி Wed Oct 06, 2010 10:00 pm

மற்றவர்கள் எங்கே?
வழிப்போக்கனாரின் பாடல் வரவில்லையே?
கிரி, இன்னொரு பாடல் எழுதுங்கள்.
இன்னும் மற்ற அன்பர்களும் பாடலை எழுதிக்காட்டுங்கள்

தமிழநம்பி · தமிழநம்பி Wed Oct 06, 2010 10:24 pm

இந்த வெளிமண்டிலப் பாடலில் மூவசைச்சீர் மட்டுமே வரவேண்டுமென்ற கட்டாயமில்லை. ஈரசைச் சீரும் மூவசைச்சீரும் கலந்தும் வரலாம். வெண்டளை வருமாறு அமைக்க வேண்டும். அவ்வளவே!

குணமதி · குணமதி Wed Oct 06, 2010 10:34 pm

என் பா இது:

இனமழிக்கப் போனான் இழிஞன் துணையாய் – இவனே
தனதின் குடும்பம் தன்னலம் காத்தான் – இவனே
கனலுமெம் நெஞ்சம் கயமையில் வாழ்வான் – இவனே
சினந்திக் கணக்கினைத் தீர்ப்பதைக் காண்பான் – இவனே!

பிழையிருந்தால் திருத்தித் தாருங்கள் என்று அன்புடன் வேண்டுகிறேன்.

**kirikasan** · **kirikasan** Thu Oct 07, 2010 12:33 am

ஐயா

எழுதியவுடன் தருகிறேன். தவறு இல்லையென்றே நம்புகிறேன்.

புயல்வீசி மின்னலிடப் பேய்மழையும் கொட்டும் -நம்நாடு
தயவிழந்த மாந்தர் தருநிழலில் போயொதுங்கும் -நம்நாடு
துயில்கொள் உயிர்பறிக்கத் துள்ளிக் கடல்பாயும் -நம்நாடு
வயலின் அமுதுண்டு வாழ்வோர்க்கு நீருணவாம் -நம்நாடு

இன்னொன்று

அழுவாள் அழுதுவிழி ஆறாகத் தோன்றிடுவாள் - எந்நாளுமே
விழுவாள் எழுந்துபின் வீராப்பில் சூழுரைப்பாள் எந்நாளுமே
தொழுவாள் துணிந்துபின் துன்பம் விளைத்திடுவாள் - எந்நாளுமே
முழுதாய் கதைகாணும் மங்கையிவள் சின்னதிரை - எந்நாளுமே

வழிப்போக்கன் · 18/02/2010

தமிழநம்பி wrote:மற்றவர்கள் எங்கே?
வழிப்போக்கனாரின் பாடல் வரவில்லையே?
கிரி, இன்னொரு பாடல் எழுதுங்கள்.
இன்னும் மற்ற அன்பர்களும் பாடலை எழுதிக்காட்டுங்கள்

தாமதத்திற்கு மன்னிக்கவும் ஐயா !
இதோ என்னால் ஆனது

தேந்தமிழ் தீஞ்சுவைப் பேச்சினில் வீழ்ந்தேன் - வரமென
பைந்தமிழ் பாவையின் பார்வையில் மாய்ந்தேன் - வரமென
காணும் பலபேரில் கோதையே யெந்தன் -வரமென
ஊனுடல் யாவிலும் நானவளாய் ஆனேன் -வரமென புன்னகை

தமிழநம்பி · தமிழநம்பி Thu Oct 07, 2010 8:52 am

குணமதி,
உங்கள் பாடல் நன்றாக உள்ளது.
இனமழிக்கப் போனான் இழிஞன் துணையாய் – இவனே
தனதின் குடும்பம் தன்னலம் காத்தான் – இவனே
கனலுமெம் நெஞ்சம் கயமையில் வாழ்வான் – இவனே
சினந்திக் கணக்கினைத் தீர்ப்பதைக் காண்பான் – இவனே!

குடும்பம் x தன்னலம் – இங்கு மட்டும் தளை தவறுகிறது.
தனதின் குடும்ப நலத்தையே காத்தான் – என்று திருத்தலாம்.
வேறு வகையும் விரும்பியவாறு திருத்தலாம்.
நன்றாக எழுதியதற்குப் பாராட்டு.

தமிழநம்பி · தமிழநம்பி Thu Oct 07, 2010 9:06 am

கிரி,
உங்கள் முதல் பாடல்
புயல்வீசி மின்னலிடப் பேய்மழையும் கொட்டிடும் - ஈழம்
தயவிழந்த மாந்தர் தருநிழலில் போயொதுங்கும் - ஈழம்
துயில்கொள் உயிர்பறிக்கத் துள்ளிக் கடல்பாயும் - ஈழம்
வயலின் அமுதுண்டு வாழ்வோர்க்கு நீருணவாம் – ஈழம்!

நான் செய்துள்ள இரு மாற்றங்களும் எதற்கு என்று அறிந்து கொள்க.
இரண்டாம் பாடல் :

அழுவாள் அழுதுவிழி ஆறாகத் தோன்றிடுவாள் - என்றும்
விழுவாள் எழுந்துபின் வீராப்பில் சூளுரைப்பாள் - என்றும்
தொழுவாள் துணிந்துபின் துன்பம் விளைத்திடுவாள் - என்றும்
முழுதாய்க் கதைகாணும் மங்கையிவள் சின்னதிரை – என்றும்!

தனிச்சொல்லில் மட்டும் மாற்றம்.
தொடர்ந்து எழுதுக.

தமிழநம்பி · தமிழநம்பி Thu Oct 07, 2010 9:12 am

வருக வழிப்போக்கனாரே!
தேந்தமிழ் தீஞ்சுவைப் பேச்சினில் வீழ்ந்தேன் - வரமென
பைந்தமிழ்ப் பாவையின் பார்வையில் மாய்ந்தேன் - வரமென
காணும் பலபேரில் கோதையே யென்றன் - வரமென
ஊனுடல் யாவிலும் நானவளாய் ஆனேன் -வரமென

அருமை. உங்கள் பாடலில் யாப்பு சரியாக அமைந்துள்ளது. பாராட்டு.
தொடர்ந்து வருக. எழுதுக.

யாதுமானவள் · யாதுமானவள் Sun Oct 10, 2010 12:39 pm

வணக்கம் அய்யா, தங்கள் நலம் காக்க!

இன்னொரு முயற்சியை தங்கள் பார்வைக்கு அனுப்புகிறேன்.

தம்மொழித மிழ்மீது மோகமிக கொண்டவன் - எம்மரசன்
தம்குலமக் கள்தனைஇரு கண்ணெனவே காத்தவன்தான் - எம்மரசன்
எம்குலத்து வேந்தர்களில் ஈடில்லா ஓர்தோன்றல்-எம்மரசன்
எம்குலமே கேளீரது யாருமல்ல இராவணன்தான் - எம்மரசன்

அன்புடன்
யாதுமானவள்

Sponsored content · Sponsored content

மரபுப் பா பயிலரங்கம்

மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

Re: மரபுப் பா பயிலரங்கம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக